មុយនិច៖ ក្រុម Bayern Munich បានរកឃើញពានទី៥ នៅឆ្នាំនេះ កាលពីថ្ងៃពុធ ដោយសារគ្រាប់បាល់នៅចុងម៉ោងរបស់ខ្សែបម្រើការពារ Joshua Kimmich ដែលជួយឱ្យក្រុមមានជ័យជម្នះ ៣-២ លើក្រុមគូប្រជែង Borussia Dortmund ដើម្បីក្លាយជាជើងឯកពានកម្មវិធី German Super Cup។
ក្រុមម្ចាស់ផ្ទះ Bayern បើកការនាំមុខ ២-០ មុន ដោយសារគ្រាប់បាល់របស់ខ្សែបម្រើ Corentin Tolisso នាទីទី១៨ និងខ្សែប្រយុទ្ធ Thomas Mueller នាទីទី៣២ តែខ្សែបម្រើ Julian Brandt របស់ Dortmund កាត់បន្ថយការនាំមុខនៅត្រឹម ១ គ្រាប់ មុនចប់វគ្គទី១ ប្រមាណ ៤ នាទី។
ក្រោយសម្រាក ១៥ នាទី ខ្សែប្រយុទ្ធ Erling Braut Haaland នៅនាទីទី៥៥ បន្ទាប់ពីទទួលបាល់ពីការបោះទម្លុះរបស់ខ្សែបម្រើ Thomas Delaney រួចក៏បានបណ្ដើរទៅស៊ុតបំប៉ោងសំណាញ់ទីយ៉ាងស្អាតឱ្យក្រុមភ្ញៀវតាមស្មើ ២-២ វិញ ខណៈនៅ ៤ នាទីបន្ទាប់ពីហ្នឹង កីឡាករសញ្ជាតិស៊ុយអែតមានឱកាសម្ដងទៀត តែការប៉ុនប៉ងលើកនេះ អត់ផុតពីដៃរបស់អ្នកចាំទី Manuel Neuer។
មុន ៨ នាទី ចប់ការប្រកួតម៉ោងធម្មតា កីឡាករ Kimmich បានដោះស្រាយភាពទាល់ច្រកសម្រាប់ការប្រកួតនៅកីឡដ្ឋានទទេស្អាត Allianz Arena តាមរយៈគ្រាប់បាល់សំណាង ព្រោះថា ការស៊ុតលើកទី១ របស់ខ្លួនត្រូវរារាំងដោយអ្នកចាំទី Marwin Hitz តែពេលបាល់ឡងមកវិញ បានប៉ះនឹងប្រអប់ជើងរបស់គេ ហើយហោះរំលងចូលទី ដែលក្លាយជាគ្រាប់បាល់ជ័យជម្នះរបស់ក្រុមតែម្ដង។
កីឡាករ Neuer ប្រធានក្រុម Bayern សរសើរKimmich ថា៖ «Kimmich គឺជាកីឡាករមានគុណភាព។ វិធីឆ្កឹះបាល់នោះ គឺឆ្លាតណាស់»។
ដោយជ័យជម្នះជាប់ៗគ្នាចំនួន ២៣ លើក ត្រូវបានដល់ទីបញ្ចប់ ក្រោយពីបរាជ័យទាំងមិនគួរឱ្យជឿក្រោមថ្វីជើងរបស់ក្រុម Hoffenheim កាលពីថ្ងៃអាទិត្យ ក្រុម Bayern បានប្រសើរឡើងវិញ ដោយមានរួមចំណែកយ៉ាងធំធេងពីការប្រឹងប្រែងរបស់ Kimmich។
គ្រូបង្វឹករបស់ក្រុម Bayern លោក Hansi Flick បានប្រាប់ប្រព័ន្ធផ្សព្វផ្សាយ ZDF ថា៖ «ខ្ញុំបានដឹងពីគេ (Kimmich) យូរហើយ។ លក្ខណសម្បត្តិផ្ទាល់ខ្លួនរបស់គេ គឺពិសេសណាស់។ គេធ្វើបានល្អតាមវិធី ដើម្បីឱ្យបានក្លាយជាម្នាក់ក្នុងចំណោមកីឡាករទាំងឡាយ ដែលមានឥទ្ធិពលចំពោះក្លិបនេះ»។
Bayern ឈ្នះពាន Bundesliga ៨ រដូវកាលជាប់ៗគ្នារួចហើយ អមដោយពាន German Cup, Champions League និង UEFA Super Cup នាឆ្នាំនេះ ហើយនេះជាលើកទី៤ ក្នុងរយៈពេល ៥ ឆ្នាំ ដែលបានលើកពានមួយនេះ។
ជាមួយគ្នានេះដែរ កម្មវិធីប្រកួតពាន Super Cup របស់ប្រទេសអាល្លឺម៉ង់ នេះ គឺជាការប្រកួតចុងក្រោយរបស់អាជ្ញាកណ្ដាល Bibiana Steinhaus វ័យ ៤១ ឆ្នាំ ដែលជាស្ត្រីទី១ បានធ្វើតួនាទីកាត់ក្ដី សម្រាប់ប្រកួតផ្លូវការឱ្យលីក ១ ក្នុងចំណោមលីកធំៗទាំង ៥ របស់អឺរ៉ុប មុនពេលសម្រេចចិត្តចូលនិវត្តន៍៕ AFP/VN