ភ្នំពេញ: ការ​ប្រកួត​ក្របខ័ណ្ឌ​អង់គ្លេស Premier League សប្តាហ៍​ទី​២៦ ដែល​បាន​បញ្ចប់​កាលពី​ថ្ងៃ​អាទិត្យ​កន្លង​ទៅ បាន​ផ្តល់​នូវ​ភាពរំភើប​ដ៏គួរ​ឲ្យ​កត់សម្គាល់ ខណៈ​ដែល​គ្រាប់បាល់​ដល់​ទៅ​២៩​គ្រាប់​ត្រូវ​បាន​ស៊ុត​បញ្ចូល​ទី ហើយ​ក្រុម Man City បាន​រក្សា​ការ​ដេញ​តាម​ពីក្រោយ​ក្រុម Chelsea យ៉ាង​ប្រកៀក​នៅលើ​កំពូល​តារាង​។ Man City បាន​កាត់បន្ថយ​ការ​ដេញ​តាម​ពីក្រោយ Chelsea មក​នៅ​ត្រឹម​៥​ពិន្ទុ ក្រោយពី​ក្រុម​ឈរ​លេខ​១​មួយ​នេះ​ទទួល​បាន​ត្រឹម​លទ្ធផល​ស្មើ ១-១ ពេល​ប្រកួត​ជាមួយ​នឹង Burnley ហេតុនេះ វា​គ្មាន​អ្វី​ត្រូវ​ភ្ញាក់ផ្អើល​ឡើយ​ដែល​កីឡាករ​ក្នុង​ក្រុម Man City រក​បាន​ពិន្ទុ​ខ្ពស់​ជាង​គេ​ប្រចាំ​សប្តាហ៍​ក្នុង​ក្របខ័ណ្ឌ Cellcard Fantasy League របស់​យើង និង​គ្រប់គ្រង​ក្នុង​ក្រុម​នៃ​ក្តីស្រមៃ​នោះ​។