ក្រុងឡុងដ៍ៈ គ្រូបង្វឹកក្រុម Tottenham លោក Mauricio Pochettino បានទទួលស្គាល់ថា កូនក្រុមរបស់គាត់ដែលអស់កម្លាំងទៅហើយនោះបានចាប់ផ្តើមជំរុញខ្លួនឯងឲ្យស្ទុះស្ទាឡើងវិញ បន្ទាប់ពីខ្សែប្រយុទ្ធ Christian Eriksen បានស៊ុតបាល់បញ្ចូលទីនៅប៉ុន្មាននាទីចុងក្រោយធ្វើឲ្យឈ្នះក្រុម Brighton ១-០ កាលពីថ្ងៃអង្គារ។
ក្រុមរបស់លោក Pochettino ដែលស្ថិតនៅចំណាត់ថ្នាក់ទី ៣ នៃក្របខ័ណ្ឌ Premier League នេះបានខិតខំប្រឹងលេងតាំងពីដើមរហូតដល់ចុងបញ្ចប់នៅកីឡដ្ឋាន Tottenham Hotspur ដោយក្រុមទាំង ២ នេះបានវាយសម្រុកគ្នាទៅវិញទៅមករហូតដល់នាទីទី ៨៨ ទើបខ្សែប្រយុទ្ធ Eriksen ស៊ុតបាន ១ គ្រាប់ ដើម្បីបញ្ចប់ភាពអន្ទះអន្ទែងរបស់ក្រុម Spurs ។
ជ័យជម្នះដែលបានមកពីការស៊ុតបញ្ចូលទីរបស់ Eriksen នេះបានធ្វើឲ្យក្រុម Tottenham បន្តស្ថិតនៅចំណាត់ថ្នាក់ទី ៣ និងមាន ៣ ពិន្ទុនាំមុខក្រុម Chelsea ដែលកំពុងឈរនៅចំណាត់ថ្នាក់ទី ៤ និងមាន ៤ ពិន្ទុនាំមុខក្រុម Arsenal ដែលស្ថិតនៅចំណាត់ថ្នាក់ទី ៥ កាលពីថ្ងៃពុធ។
លោក Pochettino បាននិយាយថា៖ «ក្រុមរបស់យើងគ្មានអារម្មណ៍ស្រស់ថ្លា ដូចអ្វីដែលយើងចង់បានទេ ព្រោះជើងក៏រួយ និងហត់ទាំងចិត្តថែមទៀត ដូច្នេះហើយយើងត្រូវអបអរសាទរចំពោះកីឡាកររបស់យើង។ ខ្ញុំពិតជាមានមោទនភាពចំពោះពួកគាត់ខ្លាំងណាស់។ ក្រុម Brighton គឺពិតជាគូប្រជែងដ៏ស្វិតស្វាញមួយ ប៉ុន្តែអ្វីសំខាន់បំផុតនោះគឺយើងត្រូវជឿថា យើងមិនត្រូវបោះបង់ចោលនោះទេ»។
បើទោះជាក្រុម Arsenal អាចនឹងបាន ៣ ពិន្ទុទៀតនៅពេលក្រុមមួយនេះឈ្នះក្រុម Wolves នៅរាត្រីថ្ងៃពុធក៏ដោយ ប៉ុន្តែវានៅតែចាញ់ក្រុម Spurs ១ ពិន្ទុដដែល ហើយនេះជាលទ្ធផលសំខាន់មួយសម្រាប់ Spurs ក្នុងការបានទៅលេងនៅក្របខ័ណ្ឌ Champions League រដូវកាលក្រោយតាមរយៈការស្ថិតនៅតំបន់កំពូលតារាងទាំង ៤ នេះ។ ពេលនេះ Spurs បានឈ្នះទាំង ៤ ប្រកួតនៅក្នុងកីឡដ្ឋានថ្មីរបស់ខ្លួនដោយរកគ្រាប់បាន ៨ គ្រាប់ និងគ្មានរបូត ១ គ្រាប់សោះឡើយ។
ក្រុម Spurs បានប្រកួតដ៏តានតឹងបំផុតនៅលើកីឡដ្ឋានថ្មីរបស់ខ្លួនដែលបានចំណាយការសាងសង់អស់ទឹកប្រាក់ចំនួន ១ ពាន់លានផោនស្មើនឹង ១.៣ ពាន់លានដុល្លារអាមេរិកនេះ ខណៈក្រុមម្ចាស់ផ្ទះមួយនេះបានសម្លឹងមើលដោយអន្ទះសា នៅពេលគ្មានខ្សែប្រយុទ្ធ Harry Kane ចូលលេងដោយសាររបួសរហូតទាល់តែខ្សែបម្រើប្រយុទ្ធ Eriksen បានជួយសង្គ្រោះដោយការស៊ុតបញ្ចូលទីលើកទី ៩ របស់គេនៅរដូវកាលនេះ។
ទោះយ៉ាងណាលោក Pochettino បានបង្ហាញការសប្បាយចិត្តចំពោះទម្រង់លេងរបស់កូនក្រុមលោកដែលបានតស៊ូប្រកួតយ៉ាងស្វិតស្វាញរហូតដល់នាទីបញ្ចប់ បើទោះជាមានការរារាំងខ្លាំងពីក្រុម Brighton ដែលមានទម្រង់លេងបានល្អក៏ដោយ។
លោកនិយាយថា៖ «មានឱកាសស៊ុតបញ្ចូលទីជាង ២០ លើក ហើយការវាយបកវិញគឺមានច្រើន។ ទោះយ៉ាងណាពេលនេះយើងបាន ៣ ពិន្ទុថែមទៀត និងរក្សាបានកន្លែងល្អដដែលនៅលើកំពូលតារាងទាំង ៤»។
ក្រុម Tottenham អាចបោះមួយជំហានទៅមុខទៀតដោយធានាបាននូវការបន្តស្ថិតនៅលើកំពូលទាំង ៤ នៅក្នុងការប្រកួតនៅទីក្រុងឡុងដ៍ដ៏សំខាន់នៅថ្ងៃសៅរ៍នេះដោយប៉ះជាមួយក្រុម West Ham មុនពេលផ្ដោតលើការប្រកួតជើងដំបូងនៃវគ្គ ៤ ក្រុមចុងក្រោយសម្រាប់ក្របខ័ណ្ឌ Champions League ជាមួយក្រុម Ajax នៅសប្ដាហ៍ក្រោយ៕ SN