ក្រុងប៊ែរឡាំង៖ ក្រុម Hoffenheim បានបញ្ចប់តំណែងរបស់គ្រូបង្វឹកលោក Alfred Schreuder ជាផ្លូវការហើយ នៅមុន ៤ ប្រកួត ដែលរដូវកាលនេះត្រូវបញ្ចប់ ហើយមូលហេតុនៃការសម្រេចនេះ គឺដោយសារមានគំនិតខុសគ្នា ចំពោះវិធីដែលពួកគេជឿជាក់ថា ធ្វើឲ្យក្រុមមានភាពប្រសើរ។ នេះបើតាមក្លិបនៅ Bundesliga បានឲ្យដឹងកាលពីថ្ងៃអង្គារ។
បុរសសញ្ជាតិហូឡង់ ដែលមានកិច្ចសន្យាដល់ឆ្នាំ ២០២២ នោះ ធ្វើដំណើរមកដល់ទឹកដី PreZero Arena កាលពីដើមរដូវកាល ដោយចាកចេញពីក្រុមនៅប្រទេសកំណើតរបស់ខ្លួន Ajax Amsterdam ហើយជាមួយគ្នានេះ ជំនួយការ និងជាបងប្រុសរបស់លោក គឺលោក Dick Schreuder ក៏នឹងចាកចេញផងដែរ។
ក្រោយមានការចែកផ្លូវគ្នានេះ ប្រធានផ្នែកកីឡាលោក Alexander Rosen បានប្រាប់ឲ្យដឹង នៅក្នុងសេចក្តីថ្លែងការណ៍មួយថា៖ «បញ្ហាសំខាន់នៃរឿងនេះ គឺយើងមានការយល់ឃើញខុសគ្នា ដូច្នេះ កិច្ចសហការរដូវកាលចុងក្រោយនេះ គ្មានន័យអ្វីទៀតទេ»។
មុនការចាកចេញរបស់ខ្លួននេះ អតីតគ្រូបង្វឹកវ័យ ៤៧ ឆ្នាំ លោក Schreuder បានជួយឲ្យក្រុម Hoffenheim ស្ថិតក្នុងចំណាត់ថ្នាក់លេខ ៧ ដោយមាន ៤៣ ពិន្ទុ ហើយកំពុងតែប្រជែងដណ្តើមតំណែង សម្រាប់ទៅលេងនៅក្របខ័ណ្ឌ Europa League របស់អឺរ៉ុប រដូវកាលក្រោយ ខណៈអ្នកមកអង្គុយកៅអីគ្រូបង្វឹកនេះបណ្ដោះអាសន្ន ដើម្បីដឹកនាំក្រុមសម្រាប់ការប្រកួតដែលនៅសល់ គឺលោក Marcel Rapp។
លោក Schreuder បាននិយាយថា៖ «ជាអកុសល យើងមិនអាចឯកភាពគ្នាធ្វើដំណើរលើផ្លូវរួមមួយ សម្រាប់អនាគតក្រុម។ ខ្ញុំមានការសោកស្តាយណាស់ចំពោះអ្វីដែលកើតឡើងនេះ។ ប៉ុន្តែវាលែងជារឿងប្រក្រតីហើយ ពេលដែលមានការយល់ឃើញខុសគ្នា ក្នុងរបៀបធ្វើការរបស់អ្នក»៕ AFP/VN