ក្រុងឡុងដ៍: ខ្សែបម្រើ Henrikh Mkhitaryan របស់ក្លិប Manchester United បានយល់ព្រមចូលរួមជាមួយនឹងក្លិប Arsenal ខណៈដែល Alexis Sanchez នឹងត្រូវចូលរួមជាមួយនឹងក្រុមបិសាចក្រហមវិញ ជាថ្នូរនៃការផ្ទេរមួយនេះ។ នេះបើយោងទៅតាមការចេញផ្សាយរបស់បណ្តាញសារព័ត៌មាន BBC។
ខ្សែបម្រើអន្តរជាតិអាមេនី Mkhitaryan វ័យ ២៨ ឆ្នាំ នឹងត្រូវទទួលការត្រួតពិនិត្យសុខភាពនៅថ្ងៃចន្ទនេះ ខណៈដែលខ្សែប្រយុទ្ធអន្តរជាតិស៊ីលី Sanchez វ័យ ២៩ ឆ្នាំ បានទទួលការត្រួតពិនិត្យសុខភាពកាលពីថ្ងៃអាទិត្យ។
នេះមានន័យថា វានឹងមានការដោះដូរដោយទឹកប្រាក់ណាមួយរវាងក្លិបទាំង ២ ឡើយ ខណៈ Man Utd បានដាក់តម្លៃខ្លួនលើ Mkhitaryan ប្រមាណជា ៣៥ លានផោន (ស្មើនឹង ៤៨,៥ លានដុល្លារអាមេរិក) ពោលគឺស្មើនឹងតម្លៃខ្លួនដែលក្លិប Arsenal ទាមទារសម្រាប់ការលក់ Sanchez។
Sanchez ដែលនឹងផុតកិច្ចសន្យារបស់គេនៅឯ Arsenal នៅពេលបញ្ចប់រដូវកាលនេះ ត្រូវបានរំពឹងទុក នឹងចុះហត្ថលេខាលើកុងត្រាជាមួយនឹង Man United ដែលនឹងធ្វើឲ្យរូបគេក្លាយជាកីឡាករទទួលចំណូលច្រើនជាងគេបំផុត ស្របពេលដែលមានការលើកឡើងថា រូបគេអាចនឹងទទួលបានរហូតដល់ទៅ ១៤ លានផោន ក្នុងមួយឆ្នាំ បន្ទាប់ពីកាត់ពន្ធ ឬ ៥០ ម៉ឺនផោន ក្នុងមួយសប្តាហ៍។
លោក Arsene Wenger គ្រូបង្វឹករបស់ Arsenal បានបញ្ជាក់កាលពីពេលមុននេះថា Sanchez នឹងចូលរួមជាមួយនឹង Man United លុះត្រាតែ Mkhitaryan យល់ព្រមផ្ទេរទៅកាន់ Arsenal។
Sanchez បានអវត្តមានក្នុងពេលក្រុម Arsenal យកឈ្នះលើក្រុម Crystal Palace ក្នុងលទ្ធផល ៤-១ កាលពីថ្ងៃសៅរ៍ ដោយសារតែរូបគេបានធ្វើដំណើរទៅកាន់ទីក្រុង Manchester។ លោក Wenger បានបញ្ជាក់ថា៖ «រូបគេមិនចូលលេង ពីព្រោះអ្នកមិនអាចធ្វើដំណើរទៅកាន់ភាគខាងជើង និងលេងបាល់ទាត់ក្នុងពេលតែមួយបានឡើយ»។
ស្របពេលជាមួយគ្នានេះ លោក Jose Mourinho អ្នកចាត់ការទូទៅរបស់ Man Utd បានបញ្ជាក់ថា ការព្រមព្រៀងគ្នាមួយក្នុងការចុះហត្ថលេខាជាមួយនឹង Sanchez កំពុងតែស្ថិតយ៉ាងប្រកៀក ក្រោយពីក្រុមរបស់លោកទទួលជ័យជម្នះ ១-០ លើក្រុម Burnley កាលពីថ្ងៃសៅរ៍។
Man United បានយកឈ្នះលើ Arsenal ដើម្បីចុះហត្ថលេខាជាមួយនឹង Mkhitaryan នៅពេលដែលរូបគេបានសម្រេចចិត្តផ្ទេរទៅកាន់កីឡដ្ឋាន Old Trafford ក្នុងតម្លៃខ្លួន ២៦,៣ លានផោន ពីក្លិប Borussia Dortmund កាលពីខែកក្កដា ឆ្នាំ ២០១៦។
រូបគេបានបង្ហាញខ្លួន ៦៣ លើកសម្រាប់ Man United និង ២២ លើកនៅរដូវកាលនេះ ដោយបានស៊ុតបាល់បញ្ចូលទី ១៣ គ្រាប់៕IS