ក្រុងប៉ារីស៖ គ្រូបង្វឹកក្លិប PSG លោក Thomas Tuchel បានប្ដេជ្ញាចិត្តថា គាត់នឹងមិនអនុញ្ញាតឲ្យ Neymar ឈប់សម្រាកយ៉ាងស្រួលនោះទេ ក្រោយពីមានយុទ្ធនាការជាច្រើនសប្ដាហ៍ពាក់ព័ន្ធនឹងការផ្ទេរទៅកាន់ក្លិប Barcelona។
ក្រុមអ្នកគាំទ្រក្លិប PSG មិនសូវជាមានការចាប់អារម្មណ៍ពេកនោះទេ នៅពេលតារាខ្សែប្រយុទ្ធរបស់ក្លិបនេះបានប៉ុនប៉ងវិលត្រឡប់ទៅអតីតក្លិបរបស់រូបគេវិញក្នុងអំឡុងពេលបិទបញ្ចប់រដូវកាលមុន។
ខ្សែប្រយុទ្ធរូបនេះ បានចាប់ផ្ដើមចូលលេងនៅកីឡដ្ឋាន Parc des Princes របស់ក្លិប PSG កាលពីខែកញ្ញា ជាមួយការរកបានគ្រាប់បាល់ ៤ គ្រាប់ ក្នុង ៥ ប្រកួត មុនពេលឈប់សម្រាកសម្រាប់ការប្រកួតអន្តរជាតិ។
លោក Tochel បានប្រាប់ទស្សនាវដ្ដី The Guardian ថា៖ «ក្រុមអ្នកគាំទ្របានសម្ដែងមតិយោបល់របស់ខ្លួន ហើយខ្ញុំពិតជាអាចយល់ចិត្តពួកគេ»។
គ្រូបង្វឹករូបនេះបានបន្ថែមថា៖ «វាជាសិទ្ធិរបស់ពួកគេក្នុងការបញ្ចេញមតិខ្លួនឯង ហើយពួកគេមានមោទនភាពចំពោះក្លិបពួកគេ ប៉ុន្តែវាមិនល្អនោះទេនៅពេលអ្នកស្ដាប់ឮកីឡាករជជែកគ្នាជាច្រើនសប្ដាហ៍ដោយនិយាយថា គាត់ចង់ចាកចេញនោះ»។
គ្រូបង្វឹកដដែលនេះបានបន្ថែមទៀតថា៖ «ដូចខ្ញុំបានប្រាប់ Neymar អ៊ីចឹងថា ពេលខ្លះជីវិតគឺបែបនេះឯង ដូច្នេះអ្នកត្រូវហ៊ានប្រឈមនឹងការពិត និងដោះស្រាយផលវិបាកទាំងនេះ។ ពេលខ្លះ វាលំបាកបន្តិចហើយដែលឃើញថា គាត់ជាមនុស្សល្អម្នាក់នៅពេលអ្នកបានឃើញគាត់លេងតែពីខាងក្រៅ ប៉ុន្តែគាត់ពិតជាមនុស្សល្អម្នាក់មែន»។
លោក Tuchel បានបញ្ជាក់ថា៖ «ខ្ញុំបានប្រាប់គាត់ថា អ្នកគិតថា ផ្នែកលំបាកបំផុតបានបញ្ចប់ហើយ ប៉ុន្តែពីពេលនេះទៅអ្នកត្រូវតែដោះស្រាយនឹងខ្ញុំ ហើយខ្ញុំនឹងរុញអ្នកឲ្យកាន់តែខ្លាំងដូច្នេះរឿងលំបាកបំផុត គឺនៅតែមានសម្រាប់អ្នក»៕ AFP/SN