ក្រុងឡាសវ៉េហ្គាស: អតីតម្ចាស់ខ្សែក្រវាត់ពិភពលោកក្នុងទម្ងន់ ៦៦,៧ គីឡូក្រាម Floyd Mayweather បានបញ្ជាក់កាលពីថ្ងៃសៅរ៍ថា រូបគេនឹងត្រូវប្រកួតជាមួយនឹងកីឡាករ Ma-nny Pacquiao នៅចុងឆ្នាំនេះ ក្នុងជំនួបសងសឹកមួយ ក្រោយពីការប្រកួតដ៏កក្រើករបស់ពួកគេកាលពីឆ្នាំ ២០១៥។
នៅលើបណ្តាញសង្គម Instagram កីឡាករ Mayweather បានឲ្យដឹងថា រូបគេនឹងចាកចេញពីការចូលនិវត្តន៍ ដើម្បីប្រកួតជាមួយនឹង Pacquiao ក្នុងរយៈពេល ៣ ឆ្នាំ ក្រោយពីបានឈ្នះពិន្ទុជាឯកច្ឆន្ទលើកីឡាករជើងចាស់របស់ហ្វីលីពីនរូបនេះ។
Mayweather បានសរសេរនៅលើបណ្តាញសង្គម Instagram ថា៖ «ខ្ញុំនឹងវិលត្រឡប់ទៅវិញដើម្បីប្រកួតជាមួយនឹង Pacquiao នៅឆ្នាំនេះ ជាមួយនឹងតម្លៃខ្លួនប្រកួតដែលមានចំនួនលេខ ៩ ខ្ទង់»។ មិនមានសេចក្តីលម្អិតបន្ថែមទៀតត្រូវបានផ្តល់ជូនឡើយ។
ការបង្ហោះរូបភាពវីដេអូ ១ បានបង្ហាញថា Mayweather និង Pacquiao កំពុងតែពិភាក្សាគ្នាក្នុងព្រឹត្តិការណ៍មួយ ប៉ុន្តែ ការផ្លាស់ប្តូរពាក្យសម្តីគ្នារវាងកីឡាករទាំង ២ មិនត្រូវបានឮឲ្យច្បាស់លាស់នោះឡើយ។
Mayweather ទទួលបានចំណូលប្រមាណជា ២២០ លានដុល្លារពីការប្រកួតលើកទី ១ ជាមួយនឹង Pacquiao ដែលបានកើតឡើងក្រោយពីការចរចាគ្នាអស់រយៈពេលជាច្រើនឆ្នាំ។
Pacquiao ទទួលបានចំណូលចំនួន ១០០ លានដុល្លារពីការប្រកួតនេះ។ ក្រោយមក Mayweather បានចូលនិវត្តន៍នៅចុងឆ្នាំ ២០១៥ ក្រោយពីការដណ្តើមបានជ័យជម្នះជាលើកទី ៤៩ របស់គេ ប៉ុន្តែ វិលទៅកាន់សង្វៀនប្រកួតវិញ ដើម្បីយកឈ្នះលើកីឡាករគុនចម្រុះ Conor McGregor។
Pacquiao ដែលបានអះអាងថា ខ្លួនបានរងរបួសស្មា ក្នុងការប្រកួតទី ១ របស់គេជាមួយ Mayweather នោះ បានបង្ហាញពីបំណងនៃការប្រកួតសងសឹកជាយូរមកហើយ។
Pacquiao ដែលមានកំណត់ត្រាឈ្នះ ៦០ លើក ចាញ់ ៧ លើក និងស្មើ ២ លើក ក្នុងនោះផ្តួលដៃគូឲ្យសន្លប់ ៣៩ លើកនោះ បានវិលទៅកាន់សង្វៀនប្រកួតវិញកាលពីខែកក្កដា ក្រោយពីអវត្តមាន ១ ឆ្នាំ ដើម្បីផ្តួលកីឡាករអាហ្សង់ទីន Lucas Matthysse ក្នុងទឹកទី ៧ ក្នុងទីក្រុងគូឡាឡាំពួរ។
Alvarez ផ្តួល Golovkin ក្រោយពីឈ្នះដោយពិន្ទុមិនឯកច្ឆន្ទ
កីឡាករប្រដាល់សញ្ជាតិម៉ិកស៊ិក Saul "Canelo" Alvarez បានបញ្ចប់រជ្ជកាលនៃការមិនស្គាល់ចាញ់របស់ Gennady Golovkin ក្នុងនាមជាម្ចាស់ខ្សែក្រវាត់រួមទម្ងន់ ៧៣ គីឡូក្រាម កាលពីថ្ងៃសៅរ៍ (ត្រូវនឹងព្រឹកថ្ងៃអាទិត្យ នៅកម្ពុជា) ក្រោយពីបានយកឈ្នះដោយពិន្ទុមិនឯកច្ឆន្ទ ក្នុងការប្រកួតសងសឹកដ៏រំភើបមួយ។
Alvarez បានបង្ហាញពីទេពកោសល្យ និងភាពខ្លាំងរបស់ខ្លួន ដើម្បីផ្តួល Golovkin ក្នុងការប្រកួតដ៏ជក់ចិត្តមួយផ្សេងទៀតរវាងកីឡាករទាំង ២ នៅលើសង្វៀន T-Mobile Arena ក្នុងរយៈពេលត្រឹមតែ ១ ឆ្នាំ ក្រោយពីពួកគេបានបញ្ចប់ក្នុងលទ្ធផលត្រឹមស្មើ នៅលើសង្វៀនដូចគ្នានេះ។
Alvarez បានផ្តល់ការបរាជ័យជាលើកទី ១ ដល់ Golovkin ក្នុងអាជីពរបស់កីឡាកាហ្សាក់ស្ថានរូបនេះ ក្រោយពីចៅក្រម ២ នាក់ បានផ្តល់ពិន្ទុឈ្នះ ១១៥-១១៣ ខណៈដែលចៅក្រមម្នាក់ទៀតបានផ្តល់ពិន្ទុស្មើ ១១៤-១១៤។
កីឡាករ Golovkin ដែលមានកំណត់ត្រាឈ្នះ ៣៨ លើក ចាញ់ ១ លើក និងស្មើ ១ លើក ក្រោយពីបរាជ័យពេលនេះបានចាកចេញពីសង្វៀនដោយមិននិយាយទៅកាន់អ្នកយកព័ត៌មានទូរទស្សន៍សូម្បីតែ ១ ម៉ាត់៕