.jpg)
ខ្សែប្រយុទ្ធ Neymar (ឆ្វេង) បានអបអរនឹង Kylian Mbappe ដែលរកបានគ្រាប់បាល់។ រូបថត AFP
ក្រុងប៉ារីស៖ គ្រូបង្វឹកក្លិប Paris Saint-Germain (PSG) លោក Thomas Tuchel បានទទួលស្គាល់ថា ការធ្វើពិធីខួបកំណើតថ្មីៗរបស់កីឡាករ Neymar គឺជា «ការរំខាន» នៅចំពេលសំខាន់មួយ ក្នុងរដូវកាលនេះបន្ទាប់ពីខ្សែប្រយុទ្ធរបស់ប្រេស៊ីលរូបនេះបានជួយឲ្យក្លិបនាំមុខគេក្នុងក្របខ័ណ្ឌ Ligue 1 ដោយទទួលបានជ័យជម្នះ ៥-០ លើក្លិប Montpellier ដែលនៅសល់គ្នាត្រឹម ៩ នាក់ កាលពីថ្ងៃសៅរ៍។ ចំណែកខ្សែប្រយុទ្ធ Kylian Mbappe ក៏បានបង្ហាញទង្វើ នាំឲ្យគ្រូបង្វឹករូបនេះខកចិត្តខ្លាំងផងដែរ។
ខ្សែប្រយុទ្ធ Neymar ដែលលាបសក់ពណ៌ផ្កាឈូកនោះ បានរងរបួស និងខឹងសម្បា ចំពោះមន្រ្តីរៀបចំការប្រកួត ខណៈកីឡាករ Pablo Sarabia, Angel Di Maria, Kylian Mbappe និង Layvin Kurzawa សុទ្ធតែរកបានម្នាក់ ១ គ្រាប់ ចំណែក ១ គ្រាប់ទៀតជាការធ្វើឲ្យបាល់ចូលទីខ្លួនឯងរបស់កីឡាករ Daniel Congres នៃក្លិប Montpellier ហើយជ័យជម្នះនេះបានជួយឲ្យ PSG នាំមុខគេ ១៣ ពិន្ទុដាច់ និងឈរនៅលើកំពូលតារាង Ligue 1។
កាលពីថ្ងៃអាទិត្យ ខ្សែប្រយុទ្ធ Neymar គ្រោងនឹងធ្វើពិធីជប់លៀងសម្រាប់ថ្ងៃខួបកំណើតលើកទី ២៨ របស់ខ្លួននៅក្លិបរាត្រី ១ កន្លែង បើទោះជាក្រុមរបស់គេត្រូវប្រកួតជាមួយក្រុម Nantes នៅថ្ងៃអង្គារក៏ដោយ។
លោក Tuchel បាននិយាយថា៖ «វាជាការរំខានមួយ គឺពិតជារំខាន។ ខ្ញុំតែងតែចង់ការពារកូនក្រុមរបស់ខ្ញុំ ហើយប្រសិនបើមានរឿងពិបាកនឹងជជែកគ្នានោះ ខ្ញុំចូលចិត្តនិយាយនឹងពួកគេដោយត្រង់ៗតែម្ដង។ មានការរំខានជាច្រើន ហើយពួកគេផ្ដល់ការចាប់អារម្មណ៍ដែលយើងមិនចាំបាច់ទាល់តែសោះ ប៉ុន្តែខ្ញុំពិតជាចង់ជជែកគ្នាពីបញ្ហានេះ ព្រោះពេលនោះរឿងនេះបានក្លាយជាបញ្ហាសំខាន់»។
កីឡាករ Neymar បានកម្ដៅសាច់ដុំ ដោយពាក់អាវមានសរសេរឈ្មោះ Kobe Bryant និងលេខ ២៤ របស់តារាបាល់បោះ ដែលបានស្លាប់ក្នុងគ្រោះថ្នាក់ធ្លាក់ឧទ្ធម្ភាគចក្រ កាលពីចុងសប្ដាហ៍មុន។ នៅពេល Neymar រកមិនបានគ្រាប់បាល់ ដោយគ្រាន់តែជួយឲ្យមិត្តរួមក្រុមរកបានគ្រាប់បាល់នោះ រូបគេបានបង្ហាញទម្រង់លេងដូចធម្មតា ប៉ុន្តែបានរងរបួសនៅចុងម៉ោងតង់ទី ១ ដែលត្រូវការសម្រាកព្យាបាលរយៈពេលយូរ នៅពេលរូបគេបានប៉ះទង្គិចគ្នាជាមួយ Arnaud Souquet របស់ក្លិប Montpellier។
ជាមួយគ្នានេះ គ្រូបង្គោលលោក Tuchel ក៏បានបង្ខំចិត្តឆ្លើយសំណួរមួយចំនួនពាក់ព័ន្ធនឹងប្រតិកម្មតបដោយកំរោលរបស់ខ្សែប្រយុទ្ធ Mbapee ដែលបានកើតឡើងនៅតង់ទី ២ ខណៈដែលកីឡាករ Edinson Cavani បានចូលបង្ហាញខ្លួនជាលើកដំបូង តាំងពីផែនការទៅចូលរួមនឹងក្លិប Atletico Madrid កាលពីខែមករា បានបរាជ័យ។
គ្រូបង្វឹករូបនេះបានបន្ថែមថា៖ «វាមើលទៅមិនល្អទេ ក្នុងនាមយើងជាកីឡាករលេងនៅក្លិបល្អមួយបែបនេះ»។ ក្រុមនេះ គឺជាក្រុមដែលមានវិជ្ជាជីវៈ និងត្រូវបានចាប់អារម្មណ៍ចំពោះពួកគេរៀងរាល់ថ្ងៃ ប៉ុន្តែការបង្ហាញទង្វើបែបនេះ បានធ្វើឲ្យខ្ញុំខកចិត្តយ៉ាងខ្លាំង ព្រោះវាមិនសមទាល់តែសោះ»។
លោក Tuchel បន្តថា៖ «ខ្ញុំបានពន្យល់ប្រាប់ Mbapee ពីមូលហេតុដែលគាត់ចូលលេងរួចហើយ។ ខ្ញុំតែងតែធ្វើការសម្រេចចិត្តសម្រាប់រដូវកាលលេងកីឡានេះ ហើយនេះជាកីឡាបាល់ទាត់ គឺមិនមែនវាយកូនបាល់នោះទេ ហើយអ្នកត្រូវគោរពគ្រប់គ្នា»៕ AFP/SN
