.jpg)
ខែ្សប្រយុទ្ធ Son Heung-min បារម្ភរឿងជំងឺកូវីដ ១៩ ខណៈមិត្តរួមក្រុមកូរ៉េខាងត្បូងចំនួន ៦ រូប មានលទ្ធផលវិជ្ជមាន។ រូបថត សហការី
ក្រុងសេអ៊ូល៖ ខែ្សប្រយុទ្ធ Son Heung-min របស់ក្រុមមាន់ខ្នាយមាស Tottenham- Hotspur បានផ្ដាច់ខ្លួនពីអ្នកដទៃ ដោយនៅតែក្នុងបន្ទប់ ក្រោយកីឡាករមិត្តរួមជាតិកូរ៉េខាងត្បូង ៦ រូប បានធ្វើតេស្តវិជ្ជមាននៃជំងឺកូវីដ ១៩ នៅថ្ងៃបំពេញភារកិច្ចប្រកួតអន្តរជាតិក្នុងប្រទេសអូទ្រីស។ នេះបើតាមការឱ្យដឹងពីមន្រ្តីសហព័ន្ធកាលពីថ្ងៃចន្ទ។
ទោះបីជាកីឡាករ Son វ័យ ២៨ ឆ្នាំ តេស្តអវិជ្ជមានក៏ដោយក៏រូបគេ និងកីឡាករដទៃទៀត ត្រូវបានប្រាប់ឱ្យស្នាក់នៅក្នុងបន្ទប់សណ្ឋាគារ នាក្រុងវីយែនតែប៉ុណ្ណោះ លើកលែងតែត្រូវហ្វឹកហាត់។
ទោះជាមានករណីវិជ្ជមានក្ដី ក៏ក្រុមកូរ៉េខាងត្បូងបានធ្វើការប្រកួតមិត្តភាពជាមួយម៉ិកស៊ិករួចហើយដែរ ដោយជាលទ្ធផលក្រុមទៅពីអាស៊ីមួយនេះ ចាញ់ ៣-២ ហើយមានកាលវិភាគត្រូវប្រឈមជាមួយក្រុមរួមទ្វីបកាតា នៅថ្ងៃអង្គារនេះ តែត្រូវរង់ចាំលទ្ធផលតេស្ដដំណាក់កាលចុងក្រោយសិន។
សហព័ន្ធបាល់ទាត់កូរ៉េខាងត្បូងអះអាងប្រាប់ AFP ថា កីឡាករ Kwon Chang-hoon, Lee Dong-jun, Hwang In-beom, Na Sang-ho, Kim Moon-hwan និងអ្នកចាំទី Jo Hyeon-woo សុទ្ធតែមានវិជ្ជមានទាំងអស់គ្នា។
ជាមួយគ្នានេះ មន្រ្តីសហព័ន្ធ ១ រូប បានប្រាប់ថា៖ «ការប្រកួតជាមួយក្រុមជម្រើសជាតិកាតានឹងដំណើរការធម្មតា ប្រសិនបើកីឡាករយ៉ាងហោចណាស់ ១៣ នាក់ ទទួលបានលទ្ធផលអវិជ្ជមានពីការធ្វើតេស្តចុងក្រោយ»។
សប្ដាហ៍កន្លងទៅនេះ ឃើញថា អត្តពលិកបាល់ទាត់អន្តរជាតិមួយចំនួនធ្វើតេស្តទទួលបានលទ្ធផលវិជ្ជមាននៃវីរុសនេះ ក្នុងនោះរួមមានទាំងខ្សែប្រយុទ្ធឆ្នើម Mohamed Salah របស់ក្រុមហង្សក្រហម Liverpool និងខ្សែបម្រើ Alan Browne របស់ក្រុមជម្រើសជាតិសារ.អៀរឡង់ផងដែរ។
សម្រាប់ប្រកួតកាលពីថ្ងៃសៅរ៍កន្លងទៅ Son ដែលជាប់ឈ្មោះជាកីឡាករអាស៊ីដ៏ឆ្នើម នៅឯក្របខ័ណ្ឌ Premier League អង់គ្លេសរួមចំណែកបញ្ជូនបាល់ឱ្យ Hwang Ui-jo ស៊ុតឱ្យកូរ៉េខាងត្បូងបើកការនាំមុខ។
ប៉ុន្តែម៉ិកស៊ិកទម្លុះសំណាញ់ទី ៣ គ្រាប់ ផ្ទួនៗនៅវគ្គទី ២ ហើយទោះជាកីឡាករ Kwon Kyung-won អាចរកបាន ១ គ្រាប់ ក៏នៅមិនអាចតាមស្មើវិញបានដែរ៕ AFP/VN
