ក្រុងឡុងដ៍៖ លោក Erik ten Hag គ្រូបង្វឹកក្លិប Ajax ពីថ្ងៃចន្ទបានសំរេចចិត្តថា គាត់នឹងមិនទទួលតំណែងជាគ្រូបង្វឹកនៅក្លិប Bayern Munich នៅពេលនេះទេដោយនិយាយថា គាត់នឹងបន្តដឹកនាំក្លិបម្ចាស់ជើងឯកហូឡង់នេះ រហូតដល់ចុងបញ្ចប់នៃរដូវកាលនេះ។
ក្លិប Bayern បានបណ្ដេញគ្រូបង្វឹកលោក Niko Kovac កាលពីថ្ងៃអាទិត្យ ដែលបង្កឲ្យមានការសង្ស័យយ៉ាងខ្លាំងថា តើអ្នកណានឹងបន្តដឹកនាំក្លិបដ៏ធំមួយដែលលេងនៅក្របខ័ណ្ឌអាល្លឺម៉ង់ Budesliga នេះ?
លោក Ten Hag ត្រូវបានរាយការណ៍ថា បានជាប់ក្នុងបញ្ជីឈ្មោះជាជម្រើសទី ១ ក្រោយពីគាត់បានដឹកនាំឲ្យក្រុម Ajax ឲ្យឡើងដល់វគ្គពាក់កណ្ដាលផ្ដាច់ព្រ័ត្រក្របខ័ណ្ឌ Champions League ពីរដូវកាលមុន និងបានចាប់ផ្ដើមគួរឲ្យចាប់អារម្មណ៍នៅរដូវកាលនេះផងដែរ។
លោក Ten Hag គឺជាគ្រូបង្វឹកបម្រុងរបស់ក្លិប Bayern ពីឆ្នាំ ២០១៣-១៥ ក្រោមការដឹកនាំរបស់លោក Pep Guardiola ប៉ុន្តែគាត់បានប្រាប់អ្នកកាសែតពីថ្ងៃចន្ទថា គាត់មិនទាន់ចង់ត្រឡប់ទៅរដ្ឋ Bavaria ប្រទេស អាល្លឺម៉ង់ វិញនៅឡើយទេ។
នៅពេលគេសួរនៅកីឡដ្ឋាន Stamford Bridge មុនពេលក្លិប Ajax ប្រកួតជាមួយក្រុម Chelsea ក្នុងក្របខ័ណ្ឌ Champions League ពីថ្ងៃអង្គារថា តើគាត់នឹងបន្តស្ថិតនៅក្លិប Ajax ឬយ៉ាងណា? គាត់បាននិយាយថា៖ «ខ្ញុំអាចបញ្ជាក់ពីបញ្ហានោះបានគឺថា ខ្ញុំមានទំនាក់ទំនងរឹងមាំមួយជាមួយក្រុមរបស់ខ្ញុំ និងគ្រប់គ្នានៅក្លិប Ajax ដូច្នេះខ្ញុំអាចបញ្ជាក់ថា ខ្ញុំនឹងបន្តស្ថិតនៅក្លិប Ajax នៅរដូវកាលនេះ»។
ទោះបីយ៉ាងណា លោក Ten Hag ដែលជាប់កុងត្រាជាមួយក្រុម Ajax រហូតដល់ឆ្នាំ ២០២២ នោះ មិនបានបញ្ជាក់ទាំងស្រុងថា គាត់នឹងមិនទៅដឹកនាំក្រុមនេះឲ្យបានច្បាស់នោះទេ។
គ្រូបង្វឹករូបនេះបានបន្ថែមថា៖ «Bayern គឺជាក្លិបដ៏អស្ចារ្យមួយដែលខ្ញុំពិតជាមានអារម្មណ៍កក់ក្ដៅ និងរីករាយធ្វើការនៅទីនោះ ហើយពួកគេនៅតែស្ថិតនៅក្នុងបេះដូងរបស់ខ្ញុំ ប៉ុន្តែឥឡូវខ្ញុំចង់បន្តស្ថិតនៅក្លិប Ajax ដល់ចប់រដូវកាលនេះ»៕ AFP/SN