អាល្លឺម៉ង់៖ ក្រុម Wolfsburg ដែលលេងនៅ Bundesliga នៃក្របខ័ណ្ឌលំដាប់កំពូលរបស់ប្រទេស អាល្លឺម៉ង់ បានត្រឡប់ទៅហ្វឹកហាត់វិញហើយ បើទោះជាការរាតត្បាតនៃវីរុសកូរ៉ូណា មិនទាន់ធ្លាក់ចុះ និងបើទោះជាមានចំណាត់ការពីរដ្ឋាភិបាលអាល្លឺម៉ង់ ដែលដាក់ឲ្យមានការនៅឃ្លាតពីគ្នាក៏ដោយ។
ជំងឺកូវីដ ១៩ កំពុងបន្តធ្វើទុក្ខបុកម្នេញវិស័យកីឡានានា ទូទាំងពិភពលោកក្នុងនោះក្របខ័ណ្ឌ Bundesliga ក៏ជាលីកមួយ ក្នុងចំណោមលីកអាជីពធំៗដទៃទៀត ដែលសម្រេចផ្អាកការប្រកួត ដែលនៅសល់ក្រោយការផ្ទុះឡើងនូវជំងឺឆ្លងដ៏សែនគ្រោះថ្នាក់នេះ។
សម្រាប់ប្រទេស អាល្លឺម៉ង់ មនុស្សជាង ១២០ នាក់ ត្រូវបានអះអាងថា បានបាត់បង់ជីវិតក្នុងចំណោមអ្នកឆ្លងយ៉ាងហោចណាស់ ២៩ ០០០ ករណី ហើយស្របដែលពិភពលោកកំពុងតស៊ូប្រយុទ្ធប្រឆាំង និងទប់ស្កាត់ការរាលដាលនៃវីរុសកូរ៉ូណានេះ លោកស្រីអធិការបតី Angela Merkel បានចេញសេចក្ដីណែនាំមិនឲ្យមានការជួបជុំគ្នា ជាសាធារណៈលើសពី ២ នាក់។
បើទោះជាមានការបារម្ភ ទាំងនៅក្នុងប្រទេស អាល្លឺម៉ង់ និងជុំវិញពិភពលោកក៏ដោយ ក៏ក្រុម Wolfsburg នៅតែចាប់ផ្ដើមធ្វើការហ្វឹកហាត់ឡើងវិញដែរ គ្រាន់តែថា ព្យាយាមចែកចេញជាក្រុមតូចៗ ទៅតាមចំនួនមនុស្ស ដែលអាចធ្វើបាន ដើម្បីចៀសវាងការនៅជុំគ្នាច្រើនពេក។
ជាជាងប្រើប្រាស់កន្លែងហាត់ប្រាណ នៅ VfL-Center តែមួយនោះ ក្រុម Wolfsburg ដែលបច្ចុប្បន្នឈរនៅចំណាត់ថ្នាក់ទី ៧ ក្នុងតារាងពិន្ទុនៃក្របខ័ណ្ឌទី១ របស់ប្រទេស អាល្លឺម៉ង់ បានឲ្យក្រុមកីឡាកររបស់ខ្លួនប្រើបន្ទប់ផ្លាស់សម្លៀកបំពាក់ ៤ ផ្សេងគ្នាក្នុងកីឡដ្ឋាន Volkswagen Arena។
ក្រោយវិលត្រឡប់មកហ្វឹកហាត់វិញ ខ្សែប្រយុទ្ធ Daniel Ginczek បាននិយាយថា៖ «ច្បាស់ណាស់ ពួកយើងទាំងអស់គ្នាចូលចិត្តលេងបាល់ទាត់ តែពួកយើងក៏ត្រូវតែដឹងដែរថា ពួកយើងត្រូវតែសម្របខ្លួនជាមួយនឹងស្ថានការណ៍ដែលកំពុងតែកើតមាន។ វាជាការងាររបស់ពួកយើង ដែលត្រូវធ្វើឲ្យរាងកាយមាំទាំល្អ មិនថាពួកយើងហាត់នៅផ្ទះ ឬជាក្រុមតូចៗ ដូចថ្ងៃនេះ។ គ្រប់ក្រុមទាំងអស់ ចែកពេលចូលកន្លែងហាត់ប្រាណដោយឡែកពីគ្នា ហើយពួកយើងព្យាយាមហ្វឹកហាត់ពង្រឹងជើង និងដងខ្លួន»។
កីឡាករមានអាយុ ២៨ ឆ្នាំ សញ្ជាតិអាល្លឺម៉ង់រូបនេះ បានបន្តថា៖ «ក្លិបបានប្រយ័ត្នប្រយែងខ្លាំងណាស់ ដោយធ្វើគ្រប់យ៉ាងទាក់ទងនឹងអនាម័យ។ បន្ទប់នៅកីឡដ្ឋានធំៗណាស់ ហើយក្រុមនីមួយៗ មានបន្ទប់ផ្លាស់សម្លៀកបំពាក់ផ្ទាល់ខ្លួន ដែលវាអំណោយផលឲ្យកីឡាករទាំងអស់ អាចអង្គុយក្នុងគម្លាតឆ្ងាយពីគ្នាបាន។ គ្រប់គ្នាមានរបស់ប្រើប្រាស់រៀងៗខ្លួន មានដូចជាកន្សែងជូតខ្លួន និងកម្រាលសម្រាប់ហាត់ជាដើម»។
ក្របខ័ណ្ឌ Bundesliga នៃប្រទេស អាល្លឺម៉ង់ គ្រោងនឹងចាប់ផ្ដើមការប្រកួតរបស់ខ្លួនឡើងវិញ ក្រោយថ្ងៃទី ២ ខែមេសា ខាងមុខ ដោយក្រុម Wolfsburg ត្រូវធ្វើដំណើរទៅទឹកដីរបស់ក្រុម Bayer Leverkusen តែដោយសារស្ថានការណ៍បច្ចុប្បន្នការប្រកួតដែលត្រៀមដំណើរការឡើងវិញនេះ ទំនងជាកើតឡើងដោយលំបាកណាស់៕ AFP/ VN