ភ្នំពេញៈ ទីបំផុតកម្មវិធីឈ្មោះថា «ពេទ្យយើង» ត្រូវបានជ្រើសរើសជាបេក្ខភាពអាជីវកម្មសង្គម ដើម្បីចូលរួមប្រកួតប្រជែងលក្ខណៈអន្តរជាតិមួយ នៅទីក្រុងហ្សឺណែវ ប្រទេស ស្វ៊ីស ក្នុងខែ តុលា ឆ្នាំ ២០១៩ ខាងមុខ ក្រោយពីបានជាប់ជាក្រុមជម្រើសចុងក្រោយ ៣ នៃបេក្ខភាពអាជីវកម្ម ដែលតំណាងឲ្យប្រទេស កម្ពុជា ប្រចាំឆ្នាំ ២០១៩។
បេក្ខភាពអាជីវកម្មសង្គមចំនួន ៣ គឺមានកម្មវិធីប្រព័ន្ធគ្រប់គ្រងមន្ទីរពេទ្យឌីជីថល «ពេទ្យយើង» របស់ក្រុមហ៊ុន First Womentech Asia Co, LTD អង្គការ Center for Sustainable Water និងក្រុមហ៊ុន SmartAgro បានឈ្នះការប្រកួតកម្មវិធីគោលដៅអភិវឌ្ឍន៍ប្រកបដោយចីរភាពសកលឆ្នាំ ២០៣០ ថ្នាក់ជាតិប្រចាំឆ្នាំនៅកម្ពុជា កាលពីថ្ងៃព្រហស្បតិ៍ទី ២២ ខែ សីហា ឆ្នាំ ២០១៩ ដែលរៀបចំដោយក្រុមហ៊ុនបណ្តុះបណ្តាលសហគ្រិន (IMPACT HUB) និងកម្មវិធីអភិវឌ្ឍន៍នៃអង្គការសហប្រជាជាតិ (UNDP) ដែលចម្រាញ់ផ្តាច់ព្រ័ត្រក្នុងចំណោមក្រុមហ៊ុន និងអង្គការចំនួន ៧។
លោកស្រី ប៉ុង លឹមសាន ជាវិស្វករកម្មវិធីព័ត៌មានវិទ្យា និងស្ថាបនិកនៃកម្មវិធីប្រព័ន្ធគ្រប់គ្រងមន្ទីរពេទ្យឌីជីថល «ពេទ្យយើង» បានថ្លែងថា៖ «ការទទួលបានការគាំទ្រពីក្រុមគណៈកម្មាធិការវិនិច្ឆ័យជាចៅក្រមទាំង ៤ រូប ចំពោះកម្មវិធី «ពេទ្យយើង» និងការសម្រេចជ្រើសរើសកម្មវិធីយើងទៅចូលរួមប្រកួតលក្ខណៈអន្តរជាតិបន្តទៀតនេះ គឺពិតជាមោទនភាពសម្រាប់នាងខ្ញុំជាស្ត្រីខ្មែរ ក្រុមការងារជាកូនខ្មែរ និងប្រជាជនខ្មែរយើង ដែលមានស្នាដៃជារបស់យើងត្រូវបានទទួលស្គាល់ និងជ្រើសរើសយកទៅចូលរួមប្រកួតនៅលើវេទិកាអន្តរជាតិដ៏ធំមួយរៀបចំដោយក្រុមហ៊ុន និងស្ថាប័នអន្តរជាតិដ៏ល្បីៗគឺ IMPACT HUB និងUNDP។ ស្នាដៃយើងត្រូវបានគេមើលឃើញថា វានឹងចូលរួមចំណែកជំរុញឲ្យសម្រេចបាននូវសុខុមាលភាព មិនត្រឹមតែពលរដ្ឋកម្ពុជាយើងប៉ុណ្ណោះទេ ថែមទាំងជួយសុខុមាលភាពនៃពលរដ្ឋក្នុងតំបន់ និងសកលផងដែរ»។
ស្ថាបនិកកម្មវិធីប្រព័ន្ធគ្រប់គ្រងមន្ទីរពេទ្យឌីជីផល «ពេទ្យយើង» លោកស្រី ប៉ុង លីមសាន បានបន្តថា៖ «ក្នុងចំណោមបេក្ខភាពអាជីវកម្មទាំង ៣ ដែលត្រូវបានជ្រើសរើសទៅចូលរួមប្រកួតប្រជែងនៅទីក្រុងហ្សឺណែវ ប្រទេស ស្វ៊ីស ខាងមុខនោះ គឺសុទ្ធតែជាអាជីវកម្មថ្មីបង្កើតឡើងដោយស្ថាបនិក ជាជនបរទេសរស់នៅ និងធ្វើការនៅកម្ពុជា (២ ក្រុម) គឺមានតែកម្មវិធី «ពេទ្យយើង» របស់នាងខ្ញុំ តែប៉ុណ្ណោះបង្កើតឡើងដោយស្ថាបនិកខ្មែរ និងក្រុមការងារខ្មែរ ត្រូវជ្រើសរើសចូលរួមក្នុងកម្មវិធីអន្តរជាតិមួយនេះ នៅខែតុលា ដែលត្រូវប្រជែងគ្នាចំនួន ១៦ ប្រទេសទូទាំងពិភពលោក។
«នេះគឺជាឱកាសដ៏ល្អមួយសម្រាប់ខ្មែរ ជាពិសេសស្ត្រីខ្មែរយើងតែម្តង គឺអាចបង្ហាញឲ្យពិភពលោកបានដឹងថា យើងអាចធ្វើបាន ហើយទង់ជាតិយើងលែងក្លាយជាទង់ជាតិ ដែលគេស្គាល់ក្រោមរូបភាពថា គឺជាទង់ជាតិប្រល័យពូជសាសន៍ទៀតហើយ»។
គួរបញ្ជាក់ថា កម្មវិធីប្រព័ន្ធគ្រប់គ្រង មន្ទីរពេទ្យឌីជីថល «ពេទ្យយើង» កាលពីខែ មីនា ឆ្នាំ ២០១៩ កន្លងមក បានទទួលពានជាម្ចាស់ជយលាភីសហគ្រិនស្ត្រីកម្ពុជាក្នុងវិស័យបច្ចេកវិទ្យារួចម្តងមកហើយ ចំពោះគំនិតច្នៃប្រឌិតផ្នែកបច្ចេកវិទ្យា ព័ត៌មានវិទ្យា ដែលផ្តល់ដំណោះស្រាយផ្នែកបច្ចេកវិទ្យាទៅដល់វិស័យសុខាភិបាល សេវាព្យាបាល និងប្រព័ន្ធគ្រប់គ្រងរបស់មន្ទីរពេទ្យ និងគ្លីនិកបែបទំនើបៗនានាដែលមាននៅក្នុងប្រទេស កម្ពុជា៕