ក្រុងហ្ស៊ឺណែវ៖ ប៉ូលិសស្វ៊ីសបានអះអាងកាលពីថ្ងៃពុធថា ពួកគេបានស៊ើបអង្កេតពីកុមារាអាយុ ៨ ឆ្នាំម្នាក់ ក្រោយពីក្មេងនេះបានសាកសួរថា តើខ្លួនអាចប្រើក្រដាសលុយក្មេងលេងចាយនៅហាងក្នុងភូមិបានឬទេ?។
សារព័ត៌មាននានា បានចុះផ្សាយថា ហាង និងប៉ូលិសមានការខឹងសម្បាយ៉ាងខ្លាំងលើករណីនេះ ដោយឈ្មោះរបស់កុមារារូបនេះនឹងស្ថិតក្នុងកំណត់ត្រាប៉ូលិសរហូតដល់ខែឧសភា ឆ្នាំ ២០៣២។
កុមារាដែលមិនត្រូវបានបង្ហាញអត្ដសញ្ញាណមិនត្រូវបានចោទពីបទល្មើសអ្វីមួយនោះទេ។ កាសែត Basler Zeitung (BaZ) បានរាយការណ៍ថា ក្រដាសអឺរ៉ូក្លែងក្លាយ គឺជាក្រដាសប្រាក់ក្លែងក្លាយផលិតនៅចិន ឬហៅថា «លុយឆេងម៉េង» ដែលប្រើសម្រាប់ដុតថ្វាយដល់បុព្វការីជនដែលបានចែកឋានសម្រាប់ចាយវាយនៅបរមលោក។
ក្រដាសប្រាក់អឺរ៉ូឆេងម៉េង ត្រូវបានគេបោះចោលកាលពីដើមខែមីនា នៅពិធីក្នុងទីក្រុង Sissach ក្នុងតំបន់ Basel-Landschaft ភាគខាងជើងប្រទេសស្វ៊ីស ជាទីដែលហ្វ្រង់ស្វ៊ីស គឺជារូបិយប័ណ្ណត្រូវបានប្រើជាផ្លូវការ។
នៅដំណាច់ខែមេសា កុមារាជាបងប្រុសអាយុ ១០ ឆ្នាំ និងកុមារីផ្ទះជិតខាងបាននាំគ្នាទៅហាងមួយក្នុងភូមិក្បែរតំបន់ Dietgen ជាទីដែលប្អូនប្រុសបានសាកសួរថា តើខ្លួនអាចចាយប្រាក់នេះបានឬទេ?។
ថ្វីដ្បិតតែក្រដាសប្រាក់នេះរំលេចច្បាស់ថា វាជាក្រដាសប្រាក់ក្លែងក្លាយយ៉ាងណាក៏ដោយ ក៏បុគ្គលិកហាងត្រូវតែប្ដឹងប៉ូលិសដែរ។ កាលពីថ្ងៃទី ២៨ ខែឧសភា ប៉ូលិសបានទាក់ទងឪពុកម្ដាយក្មេង និងចុះផ្ទាល់ដល់ផ្ទះពួកគេរយៈពេល ៣ ម៉ោង ដើម្បីស៊ើបករណីនេះ៕ AFP/HR