.jpg)
អ្នកស្រី ម៉ៅ សំណាង និងកូនស្រី ម៉ៅ ចាន់រស្មី។, អ្នកនិពន្ធវ័យ ២៥ ឆ្នាំមានចំណូលចិត្តអានសៀវភៅច្រើនប្រភេទ។ សហការី
ភ្នំពេញ៖ ជាកូនទោលក្នុងគ្រួសារ ដែលមានម្តាយជាអ្នកនិពន្ធល្បីឈ្មោះ ១ រូប កញ្ញា ម៉ៅ ចាន់រស្មី បានរំឭកអតីតកាលមិនធ្លាប់ចង់ធ្វើអ្នកនិពន្ធ ទោះបីខ្លួនចូលចិត្តអានសៀវភៅប្រលោមលោក និងទស្សនាភាពយន្តព្រមទាំងជួយកិច្ចការវាយអត្ថបទអ្នកម្តាយតាំងពីខ្លួននៅក្មេងក៏ដោយ។
កញ្ញា ម៉ៅ ចាន់រស្មី ជាកូនស្រីតែម្នាក់របស់អ្នកនិពន្ធល្បីឈ្មោះ ម៉ៅ សំណាង រហស្សនាម «ទន្សាយ»។
កញ្ញារហស្សនាម កូនទន្សាយ បានប្រាប់ ភ្នំពេញ ប៉ុស្តិ៍ ថា៖ «ខ្ញុំគឺក្មេងស្រីសាមញ្ញម្នាក់ ដែលចូលចិត្តអានប្រលោមលោក និងមើលភាពយន្តតាំងពីបឋមសិក្សា។ រហូតដល់ឆ្នាំ ២០១១ ទើបខ្ញុំចាប់ផ្តើមរៀនសូត្រពីការងារនិពន្ធតាមរយៈការវាយអត្ថបទនិពន្ធរបស់ម៉ាក់ (ម៉ៅ សំណាង) ដើម្បីជួយការងារគាត់ ដោយគ្មានបំណងចង់ក្លាយជាអ្នកនិពន្ធអ្វីទេ»។
អ្នកនិពន្ធវ័យក្មេង ដែលធ្លាប់បានសម្តែងនៅក្នុងភាពយន្ត ព្រហ្មលិខិត និងឃុនឆាង ឃុនផែន ពីកុមារភាពក្នុងអំឡុងឆ្នាំ ២០០៤ ទទួលស្គាល់ថា អ្វីដែលធ្វើឲ្យនាងសម្រេចចិត្តចាប់ស្លាបប៉ាកកានិពន្ធនោះ អាចមកពីឥទ្ធិពលប្រឡូកការងាររបស់អ្នកស្រី ម៉ៅ សំណាង ជាម្តាយបង្កើត។
ទន្ទឹមនឹងបទពិសោធជួយម្តាយ និងបានចាប់ផ្តើមសិក្សារៀនសូត្រអំពីការងារទាំងនេះ កញ្ញា ម៉ៅ ចាន់រស្មី ក៏បានសម្គាល់ឃើញថា អ្នកនិពន្ធមានទេពកោសល្យភាគច្រើនសុទ្ធតែឈានចូលវ័យចំណាស់ ដូច្នេះទើបនាងបានសម្រេចចិត្តធ្វើខ្លួនជាទំពាំងស្នងឫស្សីលើផ្នែកតែងនិពន្ធ។
កញ្ញាបានលើកឡើងថា៖ «ខ្ញុំគ្រាន់តែគិតថា ខ្ញុំចង់ធ្វើអ្វីដែលអាចផ្តល់ផលប្រយោជន៍ជាងហ្នឹង ហើយមិនមែនមានប្រយោជន៍តែខ្លួនឯងនោះទេ ចង់ឲ្យមានប្រយោជន៍ដល់សង្គម ដើម្បីជាតិ ឬក៏ដើម្បីសិល្បៈផ្នែកណាមួយក្នុងសង្គមយើង»។
កញ្ញា ម៉ៅ ចាន់រស្មី មានបទពិសោធនិពន្ធអត្ថបទភាពយន្ត។ សហការី
អ្នកនិពន្ធអត្ថបទភាពយន្តវ័យក្មេង ដែលបញ្ចប់ការសិក្សានៅសាកលវិទ្យាល័យកម្ពុជា ផ្នែកពាណិជ្ជកម្មអន្តរជាតិបន្តរៀបរាប់ពីភាពសំខាន់នៃការនិពន្ធថា៖ «ខ្ញុំចាប់ផ្តើមយល់ពីគុណតម្លៃនៃការងារអ្នកនិពន្ធថា មានតម្លៃប៉ុនណា មានប្រយោជន៍ប៉ុនណាសម្រាប់សង្គមជាតិ ព្រោះថា បើវប្បធម៌យើងស្លាប់ បើសិនជាអក្សរសាស្ត្រយើងស្លាប់ អ៊ីចឹងជាតិយើងក៏ដើរទៅមិនបានឆ្ងាយដែរ ដូចគេថា វប្បធម៌រលត់ជាតិរលាយអ៊ីចឹង»។
ទោះបីជាកញ្ញា ម៉ៅ ចាន់រស្មី មិនបានបញ្ចប់ការសិក្សាផ្នែកតែងនិពន្ធនៅក្នុងសាកលវិទ្យាល័យណាមួយក៏ដោយ ក៏អ្នកនិពន្ធអត្ថបទកុន និងដឹកនាំភាពយន្តរូបនេះបានព្យាយាមដុសខាត់សមត្ថភាពតាមរយៈការនិពន្ធអត្ថបទភាពយន្តតាំងពីឆ្នាំ ២០១៣ មក និងសិក្សាស្រាវជ្រាវនៅតាមប្រព័ន្ធអ៊ីនធឺណិត សិក្ខាសាលា និងវគ្គបណ្តុះបណ្តាលខ្លីៗ ដែលពាក់ព័ន្ធនឹងការនិពន្ធអត្ថបទភាពយន្ត។
ដោយមើលឃើញពីកង្វះអ្នកនិពន្ធរលកក្រោយ កញ្ញា ម៉ៅ ចាន់រស្មី ហៅ កូនទន្សាយ បានលើកឡើងថា៖ «បើសិនជាក្មេងដូចជាយើងទាំងអស់គ្នាមិនព្យាយាមស្នងការងារទាំងអស់នេះ តើថ្ងៃក្រោយទៅ ឬច្រើនឆ្នាំខាងមុខទៅ ខ្មែរយើងម៉េចនឹងមានអ្នកនិពន្ធខ្មែរ ដើម្បីនិពន្ធរឿង និពន្ធសៀវភៅ និងអត្ថបទភាពយន្តទាំងអស់ហ្នឹងឡើងមកទៀត»។
កញ្ញា រស្មី បានចាប់ផ្តើមនិពន្ធភាពយន្តតាំងពីឆ្នាំ ២០១៣ ដែលបានបញ្ចេញស្នាដៃរឿងដំបូង «មីនុយធ្នាក់អន្ទាក់ស្នេហ៍»។
កញ្ញា ម៉ៅ ចាន់រស្មី ធ្លាប់បាននិពន្ធភាពយន្តភាគបានចំនួន ១០ រឿង និងភាពយន្តដុំចំនួន ១០ រឿងដូចគ្នា ដែលសុទ្ធសឹងតែបង្កប់សារអប់រំទាក់ទងនឹងបញ្ហាក្នុងសង្គម និងវប្បធម៌ ដែលជាតម្លៃនៃការនិពន្ធផងដែរ។
ក្នុងនោះអ្នកនិពន្ធវ័យ ២៥ ឆ្នាំរូបនេះ ក៏បានលើកឧទាហរណ៍ពីរឿង បងប្អូនភ្លោះ ២ នាក់ «ណូលីណូឡា» យ៉ាងដូច្នេះថា៖ «ដោយសារតែខ្ញុំធ្លាប់ជួបមិត្តភក្តិខ្ញុំដែលតែងតែឈ្លោះគ្នាជាមួយបងស្រីរហូត ហើយប្រៀងធៀបនឹងខ្ញុំ ដែលជាកូនស្រីតែម្នាក់មិនធ្លាប់មានបងប្អូននោះទេ ហើយក៏តែងតែស្រមៃថា មានបងមានប្អូនមានគ្នា ទៅណាមកណាអាចដើរជាមួយគ្នាបាន អាចនិយាយលេងជាមួយគ្នាបាន។ ផ្ទុយទៅវិញអ្នកដែលមានបងប្អូនតែងតែឈ្លោះគ្នារហូត ហើយក៏ចង់បង្ហាញថា សាមគ្គីភាពបងប្អូនវាសំខាន់ប៉ុនណា? ហើយហេតុអ្វីបានជាយើងត្រូវតែជួយគ្នាក្នុងនាមជាបងប្អូន»។
ក្នុងនាមជាអ្នកនិពន្ធអត្ថបទភាពយន្តម្នាក់ ម៉ៅ ចាន់រស្មី គឺជាមនុស្សដែលចូលចិត្តអានសៀវភៅប្រលោមលោក ប្រវត្តិសាស្ត្រ នយោបាយ ជីវប្រវត្តិ និងទស្សនវិជ្ជា។
កញ្ញាបានប្រាប់ពីចំណូលចិត្តនេះថា៖ «វាដូចទៅនឹងការដែលយើងហូបអាហារ ដើម្បីបំពេញក្រពះបំពេញជីវជាតិនៅក្នុងខ្លួនយើង អ៊ីចឹងការអានសៀវភៅសម្រាប់ខ្ញុំដូចជាអាហារសម្រាប់ខួរក្បាលដែរ យើងគួរតែបន្តការអានរហូត ដូចជាការហូបបាយដែរ។ សៀវភៅប្រភេទណាក៏មានប្រយោជន៍ដែរ សំខាន់តើសៀវភៅមួយណាយើងចង់អាន ហើយចង់ដឹងពីខ្លឹមសារក្នុងសៀវភៅនោះ»។
ដោយមានបទពិសោធក្នុងការតែងនិពន្ធអត្ថបទភាពយន្តជាច្រើនឆ្នាំ កញ្ញា ម៉ៅ ចាន់រស្មី ហៅ កូនទន្សាយ ក៏មានគម្រោងបញ្ចេញស្នាដៃនិពន្ធប្រលោមលោករឿងដំបូងក្នុងឆ្នាំ ២០២០ ដែលជាស្នាដៃស្នងកេរ្តិ៍របស់អ្នកម្ដាយ ម៉ៅ សំណាង ផងដែរ។
កញ្ញាបានបង្ហើបថា៖ «បច្ចុប្បន្ននេះ ខ្ញុំកំពុងតែព្យាយាមនិពន្ធប្រលោមលោកមួយក្បាលដែរ ដែលជាប្រភេទរឿងមនោសញ្ចេតនា លាយឡំជាមួយអភិនីហារខ្លះ ដែលគ្រោងនឹងបោះពុម្ពផ្សាយនៅអំឡុកខែសីហា ខាងមុខនេះដែរ ដោយនឹងចែកចាយនៅតាមបណ្ណាគារធំៗ»៕
