.jpg)
ភ្នំពេញ: ខណៈមហាជននៅទន្ទឹងចាំមើល និងកំពុងតែចាំអ៊ុតមើល ថាតើពេលវេលានៃថ្ងៃកំណត់ចូលរោងការជាមួយនឹងអនាគតស្វាមីទី ២ ដែលមានមុខរបរជាអ្នកជំនួញក្មេងមានប្រាក់ស្តុកស្តម្ភឈ្មោះ ហេង ឡុង មិនទាន់មានពន្លឺច្បាស់ឬទេនៅឆ្នាំ ២០១៨នេះ ក៏ស្រាប់តែគេឃើញតារាសម្តែងជើងចាស់អ្នកនាង ចន ច័ន្ទលក្ខិណា បានព្រលយពាក្យពេចន៍ការពារខ្លួនគួរឲ្យភ្ញាក់ផ្អើល។
បច្ចុប្បន្ននេះ ទាំងការទទួលស្គាល់គ្នាដូចជាប្ដីប្រពន្ធ ការចាត់ទុកកូនៗទាំងសងខាង ដូចជាឈាមបង្កើត ទ្រនំវីឡាខ្ពង់ខ្ពស់សាងគ្រួសារថ្មីក៏មាន ហើយខាងចាស់ទុំទាំងសងខាងក៏ព្រមព្រៀងនោះ ឃើញថា ជីវិតស្នេហ៍ថ្មីរបស់អ្នកនាង ចន ច័ន្ទលក្ខិណា នៅខ្វះតែពិធីក្រាបផ្ទឹមបង្គ្រប់កិច្ចតាមប្រពៃណីតែប៉ុណ្ណោះ។
ពេលកន្លងមក លោក ហេង ឡុង ក៏ធ្លាប់បានបង្ហើបឲ្យដឹងជាតម្រុយខ្លះៗដែរថា៖ «ចំពោះថ្ងៃចូលរោងការនោះ សម្រាប់ពួកយើងពិតជាមានមែន។ ដោយសារយើងទាំងពីរ សុទ្ធតែធ្លាប់បានឆ្លងកាត់ថ្ងៃមង្គលការរៀងៗខ្លួន រួចម្តងមកហើយ ដូច្នេះសម្រាប់លើកទី ២ នេះ ពួកយើងនៅចង់បានពេលវេលាមួយ ឲ្យបានសមស្របក្រែលបន្តិចសិនក្នុងការស្វែងយល់ចិត្តគ្នាឲ្យបានច្រើនបន្តទៀត ហើយណាមួយមកដល់ពេលវ័យនេះ ក៏ពួកយើងបានយល់ច្បាស់ផងដែរថា ថ្ងៃមង្គលការហាក់គ្រាន់តែជាពេលវេលាមួយ កើតបន្ទាប់បន្សំពីការយល់ចិត្តថ្លើមគ្នាតែ ប៉ុណ្ណោះ»។
រូបថត ស៊ូវុទ្ឋី
ខណៈដំណឹងចូលរោងការ ដែលមហាជនចង់ដឹងដោយក្តីអន្ទះសារ រវាងតារាសម្តែងស្រីជើងចាស់មេម៉ាយកូនមួយ អ្នកនាង ចន ច័ន្ទលក្ខិណា អតីតភរិយាតារាសម្តែងប្រុសជើងចាស់ លោក យុត្ថារ៉ា ឆានី និងគូស្នេហ៍ថ្មីជាអ្នកជំនួញពោះម៉ាយកូនមួយដែរ គឺលោក ហេង ឡុង ហៅ រដ្ឋ ចេះតែបន្លាយពេលទៅមុខនោះ ក៏ស្រាប់តែថ្មីៗនេះ ក៏ផូស្ត៍ចេញនូវសារបង្ហើបប្រាប់ពីមូលហេតុនៃការពន្យាពេលចូលរោងការរបស់តារាសម្តែងស្រីជើងចាស់ និងជាប្រធានសមាគមអ្នកសិល្បៈតែម្តង។
អ្នកនាង ចន ច័ន្ទលក្ខិណា បង្ហោះសារប្រាប់ពីមូលហេតុដែលនាងចេះតែពន្យាពេលរៀបការខ្លួនជាមួយនឹងលោក ហេង ឡុង ខណៈពេលជិតរៀបមង្គលការប្អូនស្រីបង្កើតខ្លួនថា៖ «សង្ឃឹមថា មហាជននឹងលែងងឿងឆ្ងល់ថា ហេតុអ្វីបានជាខ្ញុំមិនទាន់រៀបការ។ គ្រួសារខ្មែរគ្រប់ៗគ្នា កូនច្បងត្រូវមានតួនាទី និងភារៈទទួលខុសត្រូវការគ្រប់គ្រង ពាក់កណ្តាលជាឪពុក ពាក់កណ្តាលជាម្តាយ និងជាប្អូន។ ជួបគ្នាថ្ងៃទី១៨ ខែមករា ឆ្នាំ២០១៨ នៅកោះពេជ្រ អគារ K & L មង្គលការ Chornchan Raksmey & Lyveng Chea » ដែលហាក់ចង់ប្រាក់ថា នេះជាមូលពិតនៃការពន្យាពេលចូលរោងជ័យខ្លួនឯង និងអនាគតស្វាមីទី២ លោក ហេង ឡុង នោះ៕
