ភ្នំពេញៈ នា​មួយរយៈ​ចុងក្រោយ​នេះ គេ​ដូចជា​ឧស្សាហ៍​ឃើញ​តារាចម្រៀង​ប្រុស​ខ្លួនតូច​សំឡេង​ធំលំដាប់​កំពូល​ក្រោម​ទ្រនំ​ផលិតកម្ម​សាន់ដេ លោក ឆាយ វីរៈ​យុទ្ធ បង្ហោះ​រូបថត​បែប​ជាការ​រំឭក​អនុស្សាវរីយ៍​ចាស់ៗ ដែលជា​មនុស្ស​មានគុណ​ចំពោះ​រូបលោក។ ដូច​ចុងឆ្នាំ ២០១៦ នេះ លោក​ក៏បង្ហាញ​រូបថត​មួយ​សន្លឹក​ជាមួយ​នឹង​លោក គង់ វិសាល ជា​អ្នកគ្រប់គ្រង​កម្មវិធី​ទូរទស្សន៍ និង​រៀបចំ​ការប្រគំ​តន្ត្រី​ទេសចរណ៍​តាមខេត្ត​នានា ដ៏ល្បី​ម្នាក់​ធ្វើឲ្យ​មហាជន​ភ្ញាក់ផ្អើល​ម្តងទៀត បន្ទាប់ពី​តារា​ប្រុស​រូបនេះ​បានបង្ហោះ​រូបថត​ជាមួយ​ម្តាយបង្កើត​លោក​កាលគ្រា​ក្មេងខ្ចី​កន្លងផុត​ជាង ២០ ឆ្នាំមុន​នោះ។