.jpg)
ឌី សូនីតា បង្ហើរសារចេញមុខការពារអ្នកសិល្បៈដែលត្រូវគេនិន្ទា។ អីុនស្តាក្រាម
ភ្នំពេញៈ តារាសម្តែងស្រីស្រស់រាងស្ល៊ីម កញ្ញា ឌី សូនីតា ដែលមហាជនរមែងឃើញបង្ហាញពីភាពស្និទ្ធស្នាល និងផ្អែមល្ហែមតាមភាសាហៅគ្នានៅសម័យទំនើបនេះ ជាការរាប់អានគ្នាដូចបងប្អូនថា «Sis និង Bro» ជាមួយតារាសម្តែងប្រុសលោក អាឡិចហ្ស៊ូរ៉ា ទើបតែរសាត់សំឡេងពីត្រចៀកសោះនោះ ក៏បង្កការភ្ញាក់ផ្អើលជាថ្មីនឹងសាររបស់នាង ដែលមើលទៅដូចជាតូចចិត្តតូចថ្លើមដោយការនិន្ទាពីជីវភាពរបស់អ្នកសិល្បៈពេលមានភាពធូរធារ ហ៊ឺហាទៅវិញ។
សារតូចចិត្តតូចថ្លើម ដែលតារាសម្តែងស្រីទើបតែបានថតខ្សែភាពយន្តដុំខ្នាតធំរឿង «The Prey» ចប់ថ្មីៗ និងមានភាពមមាញឹកនឹងការងារប្រកបអាជីវកម្ម និងការងារចេញក្រៅប្រទេសញឹកញាប់ ឌី សូនីតា បានបង្ហើរនោះថា៖ «ពេលក្រគេថាយើងគ្មានកំណើត ពេលខំប្រឹងដល់មានគេថាយើងមានគេចិញ្ចឹម។ ពេលមិនល្បីគេថា គ្មានសមត្ថភាព ពេលល្បីគេថាតាមខ្សែ។ ពេលយើងសប្បាយគេថា យើងភ្លេចកំណើត ពេលយើងធ្លាក់ខ្លួនឈឺ គេថាយើងចង់ស្រែករកជំនួយ។ ពេលមិនញញឹមសើចដាក់ គេថាយើងឫក ពេលសើចសប្បាយដាក់ គេថាយើងអាស។ ពេលខំប្រឹងមានហើយជួយសប្បុរសធម៌ គេថាយើងជោរពេលមិនធ្វើអីសោះ គេថាយើងគ្មានចិត្តបុណ្យ គ្មានគុណធម៌។ ពេលធ្វើល្អមិនសូវជាមើលឃើញ ពេលខុសម្តងនាំគ្នាជេរពេញប្រទេស។ តារាខ្មែរធ្វើអីក៏ខុស តារាគេជីវិតអបលក្ខណ៍សោះធ្វើមើលមិនឃើញ។ និយាយឡើងសិល្បៈត្រូវតែជាគំរូគេ ប៉ុន្តែអ្នកដែលមិនមែនជាសិល្បៈធ្វើគំរូអីខ្លះហើយ?»។
សាររបស់កញ្ញា ឌី សូនីតា បន្តថា៖ «បើខ្មែរឯងមិនឲ្យតម្លៃផង កុំថាឡើយ ១០ ឆ្នាំ ក្រោយសិល្បៈខ្មែរនឹងរីកចម្រើន ២០ ឆ្នាំ ទៀតដឹងម៉េចផង។ ឱខ្មែរអើយខ្មែរ....ខ្ញុំស្រឡាញ់ជាងគេ ស្រុកសម្បូរពោរពេញ មានសិល្បៈតន្ត្រីប្រដេញ រលកតាមបោករលីង សូមជួយទន្ទេញ ជួយថែរក្សា (ជួយថែរក្សា.....ជួយថែរក្សាសិល្បៈដូនតា) នៅចាំបទនេះបានទេ? បទពូឃ្លាំង ពីរោះណាស់ ចាំក្នុងខួររហូត។ ចាំជាងគេគឺ ឱខ្មែរអើយខ្មែរ»។
តែរាល់អត្ថន័យខ្លឹមសារដែលរៀបរាប់ខាងលើនេះ ជាពិសេសពាក់ព័ន្ធនឹងការនិន្ទារឿងអ្នកសិល្បៈមានអ្នកចិញ្ចឹម តាមរយៈពួកគេបង្ហាញពីជីវភាពហ៊ឺហា និងប្រើប្រាស់សម្ភារទំនើបៗ ក៏ត្រូវបានតារាសម្តែងស្រី ដែលបានហក់ប្រឡូកលើវិថីសិល្បៈតាំងពីឆ្នាំ ២០០៨ មករូបនេះ បានបញ្ជាក់ប្រាប់ភ្នំពេញប៉ុស្តិ៍ថា៖ «តាមពិតទៅ សម្រាប់នាងខ្ញុំផ្ទាល់ ពុំដែល ឬពុំទាន់មានការរិះគន់ដល់រូបនាងខ្ញុំនៅឡើយនោះទេ ដោយច្រើនតែឃើញមានការសរសើរ និងលើកទឹកចិត្តឲ្យខំប្រឹង»។
កញ្ញា ឌី សូនីតា បន្តថា៖ «ការចេញសារនេះ ដោយសារនាងខ្ញុំចេញការពារតម្លៃអ្នកសិល្បៈព្រោះខ្ញុំក៏ជាអ្នកសិល្បៈមួយរូបដែរ ដូច្នេះក៏ចង់ធ្វើការពញ្ញាក់អារម្មណ៍បងប្អូនមហាជនខ្មែរទាំងអស់ សុំមេត្តាកុំមើលមកអ្នកសិល្បៈតែមួយជ្រុងអី សុំមើលឲ្យបានច្រើនជ្រុងផង ទើបដឹងថា អ្នកសិល្បៈមិនមែនដូចដែលបងប្អូនវាយតម្លៃនោះឡើយ ហើយបើតាមរយៈជាបទពិសោធសិល្បៈ ដែលនាងខ្ញុំប្រឡូកមកដល់ពេលនេះ ១០ ឆ្នាំ គត់នោះ សង្កេតឃើញថា ភាគច្រើនអ្នកសិល្បៈតែងមានការបង្កើតមុខរបរផ្សេងៗទៀតបន្ថែមលើអាជីពសិល្បៈស្ទើរតែទាំងអស់ហ្នឹង នាងខ្ញុំក៏មានដែរ ទើបអាចធ្វើឲ្យជីវភាពធូរធារបានគឺមិនអាចពឹងតែការងារសិល្បៈមួយមុខនោះឡើយ»៕
