ភ្នំពេញៈ តារាសម្តែងស្រីដែលនិយមបញ្ចេញភាពសិចស៊ីសាច់សខ្ចីព្រមទាំងចូលចិត្តបង្ហើបបន្លិចចេញនូវដើមទ្រូងដ៏ទ្រលុកទ្រលន់ និងអតីតជាស្រីស្អាត (FreshieGirl) លេខ ១ កាលពីឆ្នាំ ២០១២ ក្នុងជំនាន់ទី ១១ កញ្ញា ជា ម៉ារី នឹងបញ្ចប់ភាពនៅលីវនៅត្រឹមថ្ងៃទី ៤ ខែសីហា ឆ្នាំ ២០១៩ ចុងសប្តាហ៍នេះហើយ ក្រោយពីបានបង្កាត់ភ្លើងស្នេហ៍ជិត ២ ឆ្នាំមកនោះ។
ការលាភាពនៅលីវរបស់តារាសម្តែងស្រីស្រស់ ជា ម៉ារី នាថ្ងៃចុងសប្តាហ៍នេះ អាចជាដំណឹងមួយធ្វើឲ្យប្រុសៗទាំងឡាយដែលធ្លាប់លួចស្នេហ៍នាងមានការខកចិត្តមិនតិចឡើយ ព្រោះថាពេលនេះគឺអស់ឱកាសដណ្តើមយកបេះដូងនាងទៀតហើយ ដោយសារតែនាងសម្រេចទទួលយកក្តីស្រឡាញ់ពីបុរសជាអ្នកជំនួញទ្រព្យស្តុកម្នាក់មានឈ្មោះលោក វិសាល វ័យ ២៨ ឆ្នាំ។
ស្រីស្អាតសាច់សខ្ចីដែលរាងរយាលការងារសិល្បៈ ដោយសារតែមានមុខជំនួញលក់ផលិតផលរក្សាសម្រស់តាមអនឡាញកញ្ញា ជា ម៉ារី បានបង្ហើបឲ្យដឹងពីការកំណត់វេលារៀបការរបស់នាងថា៖ «នេះជារឿងពិត ខ្ញុំនឹងរៀបការនៅថ្ងៃអាទិត្យ ទី ៤ ខែសីហា ក្នុងឆ្នាំ ២០១៩ ហ្នឹងហើយ។ មង្គលការខ្ញុំរៀបចំនៅមជ្ឈមណ្ឌលកោះពេជ្រ អគារ L ដែលគ្រោងរៀបចំទទួលភ្ញៀវចំនួន ៧០ តុ តែខ្ញុំហៅអ្នកសិល្បៈរួមអាជីពតែត្រឹម ១ ទៅ ២ នាក់ទេ ព្រោះអត់ហ៊ានហៅខ្លាចចិត្ត។ ស្វាមីខ្ញុំទើបតែអាយុ ២៨ ទៅ ២៩ ឆ្នាំហើយគាត់ជាអ្នករកស៊ីម្នាក់មិនពាក់ព័ន្ធជាមួយនឹងសិល្បៈនោះទេ»។
កញ្ញា ជា ម៉ារី ក៏បានបន្តឲ្យដឹងដែរថា៖ «ពួកយើងទើបតែស្រឡាញ់គ្នាប្រមាណរយៈពេល ១ ឆ្នាំកន្លះតែប៉ុណ្ណោះ ហើយមូលហេតុដែលនាងខ្ញុំជ្រើសរើសយកគាត់ជាស្វាមី ដោយសារតែគាត់ចេះយល់ចិត្ត ហើយមិនដែលមានភាពរកាំរកូសគ្នាខ្លាំងឡើយ ចាប់តាំងពីស្រឡាញ់គ្នាមក»។
ដោយសារមានរូបសម្រស់ស្រស់ស្អាតគួបផ្សំនឹងសាច់សខ្ចីដូចបណ្តូលចេក និងរាងតូចស្រឡូន កញ្ញា ជា ម៉ារី មិនខ្លាចនឹងបង្ហាញរាងក្នុងឈុតប៊ីគីនីនោះទេ ទោះបីមានការរិះគន់តិចតួចក៏ដោយ។
យ៉ាងណាក្រោយរៀបការរួចសម្រាប់អាជីពសិល្បៈទំនងជានាងមិនអាចបន្តពេញទំហឹងដូចនៅពេលនេះទេគឺអាចទទួលយកការងារសិល្បៈណា ដែលមានរយៈពេលខ្លីៗដូចជាការថតស្ប៉ត និងថត MV បទចម្រៀងតែប៉ុណ្ណោះ ខណៈថតកុនដែលចំណាយពេលយូរថ្ងៃនោះប្រហែលជានាងមិនអាចទទួលថតបានឡើយ ដោយសារតែរវល់ការងាររកស៊ីជាមួយនឹងស្វាមី។
តារាស្រីវ័យ ២៥ ឆ្នាំជាអតីត Freshie Girl លេខ ១ កាលពីឆ្នាំ ២០១២ ធ្លាប់ថតសម្តែងខារ៉ាអូខេឲ្យផលិតកម្មមួយចំនួន និងកម្មវិធីកម្សាន្តនានាដែរដូចជាប្រហុកធីវី ជាដើម ខណៈខ្សែភាពយន្តវិញសម្តែងបាន ២ រឿងគឺរឿង «ភពផែនដែនស្នេហ៍» និងរឿង «ខ្មោចទឹកកក»៕