.jpg)
សូត្រ សក្ការៈ ជាកូនប្រុសអតីតអគ្គរាជទូតខ្មែរនៅកូរ៉េខាងត្បូងគឺជាគូស្នេហ៍ នីឡា។ រូបថត ហ្វេសប៊ុក
ភ្នំពេញៈ ថ្មីៗនេះកញ្ញា វ៉ាន់ នីឡា តារាកំប្លែងស្រីវ័យ ១៩ ឆ្នាំដែលមានទំនាក់ទំនងស្នេហានឹងគូស្នេហ៍ថ្មីវ័យក្មេងដូចគ្នាជាង ២ ឆ្នាំមកហើយ និងទើបបាននាំឪពុកម្តាយទាំងសងខាងជួបជុំគ្នាសោះ ឥឡូវនេះក៏លេចឮដំណឹងថា នាងគ្រោងចូលរោងការនៅឆ្នាំ ២០២០ គឺមុនពេលចូលឆ្នាំថ្មីប្រពៃណីខ្មែរ។
គេចាំបានថា វេលាចូលរោងការនោះត្រូវតារាកំប្លែងស្រីវ័យក្មេងមានរូបសម្រស់កាន់តែស្អាតឡើងៗកញ្ញា វ៉ាន់ នីឡា ថានឹងកំណត់ចូលរោងជ័យនៅឆ្នាំ ២០២១ តែឥឡូវនេះបែរជាដូរចិត្តមករៀបចំនៅក្នុងឆ្នាំ ២០២០ វិញ។
បើតាមលោកតាវ៉ិចទ័រដែលត្រូវជាឪពុកតារាកំប្លែងស្រីកញ្ញា វ៉ាន់ នីឡា នោះក៏បានទទួលស្គាល់ថា ដំណឹងនេះគឺជាការពិតមែន ប៉ុន្តែលោកមិនទាន់ប្រាប់ពីថ្ងៃជាក់លាក់នៃមង្គលការរបស់កូនស្រីលោកនោះឡើយ ដោយលោកគ្រាន់តែបានថ្លែងដូច្នេះថា៖ «កូនស្រីខ្ញុំនឹងចូលរោងការនៅឆ្នាំ ២០២០ ហ្នឹងមែនគឺមុនចូលឆ្នាំខ្មែរ»។
លោកតាវ៉ិចទ័រ ក៏បានបញ្ជាក់ឲ្យដឹងពីហេតុផលដែលមានការផ្លាស់ប្តូរចិត្តរៀបចំពិធីមង្គលការកូនស្រីលោកឆាប់ៗខុសពីការអះអាងរបស់កូនស្រីលោកពេលមុននេះផងដែរថា៖ «ដោយសារយល់ថា កូនស្រីពេញវ័យសមល្មមអាចរៀបចំពិធីមង្គលនេះបាន។
ហើយម្យ៉ាងទៀតនោះគាត់ក៏អាចចេះគ្រប់គ្រងអារម្មណ៍ខ្លួនបានប្រសើរជាងមុនដែរ គឺនៅឆ្នាំក្រោយនេះគាត់នឹងមានវ័យ ២០ ឆ្នាំ»។
មុននេះបន្តិចទើបតែបានបកស្រាយប្រាប់មហាជនឲ្យយល់ពីរឿងបាននាំឪពុក-ម្តាយក្មេកមកលេងផ្ទះ គ្រាន់តែជាការជួបជុំធម្មតាក្នុងនាមចាស់ទុំទាំងសងខាង ហើយក៏លេចឮថា តារាកំប្លែងស្រីវ័យក្មេងមានដុងពីកំណើតកញ្ញា វ៉ាន់ នីឡា បាននាំគូស្នេហ៍ថ្មីទៅរកទិញផ្ទះវីឡាសម្រាប់ទុកសាងនូវទ្រនំស្នេហ៍មុនពេលរៀបការ បង្កការភ្ញាក់ផ្អើលផ្ទួនៗគ្នាតែម្តង។
តែដំណឹងនេះក៏ត្រូវបានតារាកំប្លែងស្រី និងជាថៅកែលក់ផលិតផលរក្សាសម្រស់តាមអនឡាញកញ្ញា វ៉ាន់ នីឡា បានចេញមកបដិសេធភ្លាមៗ ក្រោយពីនាងបានឃើញការចុះផ្សាយថា នាង និងម្ចាស់បេះដូងថ្មីគឺលោក សូត្រ សក្ការៈ បាននាំគ្នាទៅទិញផ្ទះវីឡាមុនពេលចូលរោងការនោះ។
តារាកំប្លែងស្រីវ័យក្មេងមានសម្តីញ៉ែតៗ មិនសូវជាចាញ់តារាកំប្លែងរៀមច្បងរួមក្រុមប្រចាំនៅទូរទស្សន៍ CTN & CNC ដែលជាកូនស្រីសំណព្វចិត្តលោក សុវណ្ណ ឫទ្ធី ហៅតាវ៉ិចទ័រ កញ្ញា នីឡា ធ្លាប់បានប្រាប់ភ្នំពេញប៉ុស្តិ៍ឲ្យដឹងថា៖ «ចាសបង!ចំពោះរឿងនោះ គ្រាន់តែយើងបាននាំគ្នាទៅមើលសិនតែប៉ុណ្ណោះ ហើយនោះគឺជាផ្ទះវីឡាដែលស្ថិតនៅឯបុរីប៉េងហួតមានទីតាំងនៅលើផ្លូវជាតិលេខ ៦ អា កាលពី ២-៣ ថ្ងៃមុន។ ហើយពួកយើងក៏នៅមិនទាន់គិតទៅដល់រឿងថាត្រូវទៅទិញផ្ទះនោះទុកនៅឡើយទេ ព្រោះថាយើងក៏មិនទាន់មានលុយដែរ»៕
