ភ្នំពេញ៖ ចាប់តាំងពីក្លាយជាប្តីប្រពន្ធស្របច្បាប់ដោយបានក្រាបផ្ទឹមរោងជ័យកាលពីខែមីនា កន្លងមករំលងជាង ៥ ខែនោះ តារាសម្តែងស្រីរូបស្រស់ អ្នកនាង ម៉ាក់ សែនសូនីតា និងសា្វមីលោក ប៉ុល វិបូ រឹតតែមានភាពសកម្មខ្លាំងនឹងការបើកអាជីវកម្មរកស៊ីបន្ថែមនៅមុនពេលបុត្រដំបូងរបស់ពួកគេចាប់កំណើត។ ខណៈមុនពេលរៀបការពួកគេ ក៏ធ្លាប់ដាក់ទុនរួមគ្នាបើកហាងអាហារឈ្មោះ «ផែសមុទ្រ» ដែលពង្រីកសាខាច្រើនជាបន្តបន្ទាប់ នៅទីក្រុងភ្នំពេញ និងខេត្តកណ្តាល មុននឹងឈានដល់ការដាក់ទុនបេះដូងបង្កើតចំណងស្នេហ៍នោះ។
ខណៈពេលថ្មីៗនេះ ស្រាប់តែផុសចេញនូវការបើកអាជីវកម្មទ្រង់ទ្រាយ ២ ផ្សេងៗគ្នា របស់ប្តីប្រពន្ធអ្នកនាង តូតា និងលោក ប៉ុល វិបូ បានបើកកសិដ្ឋានចិញ្ចឹមសត្វគោ មាន់ ទា ១ កន្លែង ស្ថិតនៅក្នុងខេត្តកំពង់ស្ពឺ និងបើកហាងលក់គ្រឿងអលង្ការមួយទៀតមានឈ្មោះ «Tota Jewelry» មានទីតាំងនៅក្បែរផ្សារសាំហាន់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
នេះបើតាមការបង្ហើបឲ្យដឹងពីគណនីហ្វេសប៊ុករបស់តារាសម្តែងស្រីរូបស្រស់ មានបបូរមាត់សិចស៊ី អ្នកនាង តូតា បានឲ្យដឹងថា៖ «ការងារថ្មីប្តីប្រាប់ថា មករៀនមើលឲ្យហើយទៅ តិចទៀតអូនឯងក៏ត្រូវជួយ Promote លក់គោ លក់មាន់ឲ្យបងដែរហើយ ឱបងប្អូនអើយ បងប្អូនណាត្រូវការទិញគោ ទិញមាន់អី ទាក់ទងបានចាស មានបោះដុំ និងលក់រាយ ទីតាំងនៅខេត្តកំពង់ស្ពឺ ហើយក៏មានទទួលទិញគោដែរចាស!» និងសារបើកហាងលក់គ្រឿងអលង្ការថា៖ «សែនតិចតួចយកហេងយកជ័យ ថ្ងៃចន្ទ ដើមទ្រព្យ សូមឲ្យកូនចៅបើកលក់ពីថ្ងៃនេះទៅ ហេងហេង លក់ដូរឲ្យដាច់ៗ មានភ្ញៀវមានម៉ូយច្រើនៗ ហាងលក់គ្រឿងអលង្ការ (Tota Jewelry) ទីតាំង អគារ Sky Tree (ក្បែរផ្សារសាំហាន់)»។
តារាសម្តែងស្រីមានបបូរមាត់សិចស៊ី ម៉ាក់ សែនសូនីតា ហៅ តូតា ក្រោយពីបានបង្កាត់ភ្លើងស្នេហ៍ជាមួយនឹងលោក ប៉ុល វិបូ ដែលអតីតជាថៅកែផលិតកម្មអង្គរភិចឈ័រ និងបានដាក់ទុនរកស៊ីរួមគ្នាដំបូងលើមុខរបរនៃអាជីវកម្មក្រោមយីហោមួយថា «ផែសមុទ្រ» ដែលពង្រីកសាខាបន្តបន្ទាប់ លក្ខណៈលក់ franchise នៅមិនទាន់អស់ចំហាយល្បីផង ក៏ស្រាប់តែបន្តផុលផុសបើករីសតថ្មីសន្លាងមួយឈ្មោះថា «ផែសមុទ្ររីសត» មានទីតាំងស្ថិតនៅភូមិតាដិប សង្កាត់អណ្តូងខ្មែរ ក្រុងកំពត ខេត្តកំពត ស្ថិតនៅលើទំហំដី ៤ ហិកតា និង ១ កន្លែងទៀតនៅកំពង់ស្ពឺ។
គួររំឭកផងដែរថា អ្នកនាង តូតា ក៏មានជំនាញលក់គ្រឿងមាសពេជ្រ រួចស្រាប់ តាំងពីនៅវ័យក្មេងមកហើយដែរ ព្រោះថាអ្នកម្តាយរបស់អ្នកនាង ក៏មានមុខរបររកស៊ីបែបនេះ តាំងពីដើម ហើយនាងក៏តែងតែជួយលក់ដូរម្តាយ នៅឯផ្សារផងដែរ គ្រាន់តែអ្នកគាំទ្រមួយចំនួនមិនបានដឹង ហេតុដូច្នេះការបើកហាងលក់គ្រឿងអលង្ការនាពេលថ្មីៗនេះ គឺថាមិនមែនជារឿងលំបាកសម្រាប់តារាស្រីរូបស្រស់នេះឡើយ៕