ក្រុងតូក្យូ : អ្នកខ្លះថា វាមានក្លិនឈ្ងុយ ខណៈអ្នកខ្លះថា ស្អុយណាស់។ ទោះទុរេនជាផ្លែឈើ ដែលចាត់ទុកថាបានផ្ដល់សុខុមាលភាពដល់អ្នកទទួលទានយ៉ាងណាក៏ដោយ ក៏វាជាប់ពាក់ព័ន្ធនឹងបញ្ហាមួយចំនួន ដូចជា ជំងឺលើសឈាម ដាច់សរសៃឈាម និងស្លាប់ជាដើម។
របាយការណ៍ខ្លះអះអាងថា ការទទួលទានទុរេនរួមនឹងគ្រឿងស្រវឹងអាចបង្កឲ្យស្លាប់។ ប៉ុន្តែអ្នកវិទ្យាសាស្ដ្រអះអាងថា វាមិនពិតទេ តែក៏មិនល្អចំពោះសុខភាពផងដែរ។ ខាងក្រោមនេះជាចំណេះដឹងខ្លះៗស្ដីពីឥទ្ធិពលទុរេន និងគ្រឿងស្រវឹង។
១. សមាសធាតុក្នុងផ្លែទុរេនកាន់តែធ្វើឲ្យអ្នកទទួលទានស្រាស្រវឹងខ្លាំង
ច្បាស់ណាស់ ត្រៀមខ្លួនឲ្យគេគ្រាទៅ បើអ្នកចង់សាកល្បងវត្ថុទាំងពីរនេះរួម។ កាលពីឆ្នាំ២០០៩ ក្រុមអ្នកស្រាវជ្រាវមកពីសាកលវិទ្យាល័យត្សូគូបា ប្រទេសជប៉ុន បានរកឃើញថា មនុស្សជាច្រើនដែលរោលក្រហមមុខ ញ័របេះដូង រងាក់រងើក និងក្អួតចង្អោរ ខណៈទទួលទានគ្រឿងស្រវឹង និងផ្លែទុរេន។
ពួកគេក៏បានរកឃើញថា ទុរេនផ្ទុកសារធាតុស្ពាន់ធ័រឈ្មោះ Diethyl Disulfide ដែលបង្អាក់ការរំលាយជាតិអាកុលក្នុងរាងកាយ។ ដោយឥតមានសមត្ថភាពរំលាយជាតិអាកុលនេះជាតិពុលនឹងរត់តាមសរសៃដោយសេរី។
២. បង្កើនជាតិពុលក្នុងខ្លួនពេលទទួលទានទុរេននិងគ្រឿងស្រវឹងពេលបុគ្គលម្នាក់ទទួល ទានគ្រឿងស្រវឹង សារធាតុអេតានពីគ្រឿងស្រវឹងប្រែទៅជាជាតិពុលចូលក្នុងថ្លើមតាមរយៈ «អង់ហ្ស៊ីមអាក្រក់» ឈ្មោះ Alcohol Dehydrogenase។ ប៉ុន្ដែ «អង់ហ្ស៊ីមល្អ» ឈ្មោះ Aldehyde Dehydrogenase នឹងបំលែងជាតិពុលទាំងនេះទៅជាសារធាតុគ្មានគ្រោះថ្នាក់ ដូចជាអាស៊ីដខ្លាញ់ ឬកាបោនឌីអុកស៊ីតជាដើម។
ជាអកុសលពេលអ្នកទទួលទានទុរេនជាតិស្ពាន់ធ័រពីផ្លែឈើបែរជារារាំងសមត្ថភាព «អង់ហ្ស៊ីមល្អ» បំលែងជាតិពុលទៅជាសារធាតុគ្មានគ្រោះថ្នាក់។ ដូច្នេះ វាបានបង្កើនជាតិពុលក្នុងរាងកាយដែលអាចបង្កគ្រោះថ្នាក់ដល់សុខភាព។
៣. គ្មានភ័ស្ដុតាងវិទ្យាសាស្ដ្រភ្ជាប់ទំនាក់ទំនងទុរេន និងគ្រឿងស្រវឹងទៅនឹងមរណភាពដំណឹងល្អគឺថាការសិក្សារបស់ សាកលវិទ្យាល័យនេះលើកណ្ដុរ ២០០ ក្បាលមិនធ្វើឲ្យសត្វណាមួយងាប់ទេ។
ប៉ុន្ដែគេមិនដឹងថាកណ្ដុរមានអារម្មណ៍ពិបាកក្នុងខ្លួនយ៉ាងម៉េចឡើយ។ មិនថាវាឈឺពោះញ័រខ្លួនក្ដៅទ្រូង ឬតប់ប្រមល់យ៉ាងណានោះទេ។ អាការទាំងនេះមិនត្រូវបានសិក្សានោះទេ ដែលភាគច្រើនមនុស្សតែងតែជួបបទពិសោធផ្ទាល់។
៤. ទោះគ្មានភ័ស្ដុតាង តែមានអ្នកស្លាប់ពាក់ព័ន្ធនឹងទុរេនការពាក់ព័ន្ធសំដៅលើសុខភាពមុនទទួលទានដូចជាជំងឺបេះដូង ឬលើសឈាម ឬទឹកនោមផ្អែម។
ជាក់ស្ដែងបុរសវ័យ ៦០ ឆ្នាំម្នាក់ បានស្លាប់ក្រោយទទួលទានទុរេនច្រើនពេក។ ប្រភពបានឲ្យដឹងថា បុរសនោះកើតជំងឺលើសឈាម។ ករណីមួយទៀតកើតឡើងនៅប្រទេសហ្វីលីពីន ដែលបុរសវ័យកណ្ដាលម្នាក់ដែលបានស្លាប់ក្រោយពីទទួលទានទុរេនច្រើន បន្ទាប់ពីកូកាកូឡា។
បើអ្នកមានបញ្ហាសុខភាពគួរតែឧស្សាហ៍ទៅពិនិត្យសុខភាព បើចង់ទទួលទានទុរេន ឬ/និងបន្ថែមគ្រឿងស្រវឹង។ បើអត់មានបញ្ហាសុខភាពអ្វីទេអ្នកគួរតែប្រយ័ត្ន។ ជម្រើសល្អទទួលទានក្នុងបរិមាណសមល្មម និងព្យាយាមកុំទទួលទានទុរេន និងគ្រឿងស្រវឹងតំណាលគ្នា។ ការពារប្រសើរជាងព្យាបាល៕ HR
ប្រភព www.worldofbuzz.com