ក្រុងតូរ៉ុនតូ: ស្ដ្រីឥឡូវផលិតថូផ្កាពីគំរូរូបភាពសុដន់របស់ខ្លួនឯងដើម្បីអបអរពីភាពសម្បូរបែបនៃរាងកាយស្ដ្រី។ វិចិត្រករផលិតថូរូបសុដន់ នាង អេមម៉ា លូវ ចាប់ផ្ដើមទំនោរថ្មីនេះពេលនាងរចនាថូមួយ ដោយប្រើសណ្ឋានសុដន់ផ្ទាល់ខ្លួន សម្រាប់ជាកាដូឲ្យមិត្ដប្រុសនៅថ្ងៃបុណ្យគ្រីសស្មាក់។
ពេលកាដូផ្ទាល់ខ្លួនប្រែក្លាយជាវត្ថុពេញនិយម នាង លូវ ចាប់ផ្ដើមបង្កើតក្រុមហ៊ុន Pot Yer Tits Away Luv ក្នុងឆ្នាំ២០១៧ ដែលមានបំណងបង្ហាញនូវទ្រង់ទ្រាយសុដន់ជាច្រើនប្រភេទ។
លើអ៊ីនស្ដាក្រាម ដែល កញ្ញា លូវ បានចែករំលែករូបភាពស្នាដៃថ្មីៗបំផុត បានច្នៃបន្ថែមនូវស្លាកស្នាមអាចម៍រុយ ក្រវិល និងសណ្ឋានប្លែកៗទៅតាមសុដន់ពិត ដែលក្រុមហ៊ុនមានអ្នកគាំទ្រជាង ៤៥០០០ នាក់។
រូបរាងសុដន់លើថូឆ្លុះបញ្ចាំងពីទម្រង់សុដន់ពិត ដែលស្ដ្រីអាចស្វែងរកពីភាពជាក់ស្ដែងរបស់ខ្លួនឯង ឬភាពវិសេសរបស់ខ្លួន។ យោងតាមវេបសាយ បេសកកម្ម Pot Yer Tits Away Luv ចង់ផលិតថូផ្កាដែលស្ដែងចេញពីភាពវិសេសរបស់ស្ដ្រី ដោយមិនខ្វល់ពីរូបរាងទំហំភេទ ឬពណ៌សម្បុរ។
ពេលប្រជាប្រិយភាពក្រុមហ៊ុនកើនឡើង ស្ដ្រីចាប់ផ្ដើមកុម្ម៉ង់ផលិតថូដោយប្រើទម្រង់សុដន់ផ្ទាល់ខ្លួន ដែលកញ្ញាលូវអាចផ្គាប់អតិថិជន។ អតិថិជនក៏អាចទិញថូផលិតស្រាប់ដែលបង្ហាញពីទម្រង់សុដន់ប្លែកៗ។
ក្នុងបទសម្ភាសជាមួយទស្សនាវដ្ដីBricksកញ្ញាលូវបានពន្យល់ថា៖ «វាឆ្លុះបញ្ចាំងពីភាពវិសេស ដែលថូនីមួយៗសុទ្ធតែមានលក្ខណៈខុសប្លែកពីគ្នា»។
ដើម្បីផលិតថូ ដែលត្រូវចំណាយពេលពី ២០ ទៅ ៤៥ នាទី កញ្ញា លូវ បានប្រើដីឥដ្ឋហាល រួចប្រើទឹកថ្នាំគូរ។ ក្រោយពីហាលស្ងួតនាងបានបន្ថែមភាពលម្អិតផ្សេងៗ ដូចជាចុងសុដន់ ភ្លឺ (ជំងឺសើស្បែក) ចោះពាក់ក្រវិលសាក់ អាចម័រុយ ឬស្លាកស្នាមផ្សេងៗទៅតាមភិនភាគជាក់ស្ដែង។
រូបសណ្ឋានសុដន់ដ៏សម្បូរបែបនេះ ត្រូវបានយកលំនាំតាមថាមពលពិសេសរបស់កញ្ញា លូវ «សុដន់ទាំងអស់សុទ្ធតែធម្មតា»។ ថូទាំងនេះមានរូបសណ្ឋានប្លែកៗ និងលក់ក្នុងតម្លៃពី ២៥ ទៅ ៤០ ផោន (ជាង ១៣ ម៉ឺនរៀល ទៅជាង ២១ ម៉ឺនរៀល)។
ថ្វីដ្បិតតែ Pot Yer Tits Away Luvទទួលធ្វើតាមតម្រូវការអតិថិជនយ៉ាងណាក៏ដោយ ក៏អតិថិជននោះត្រូវមានអាយុលើសពី ១៨ ឆ្នាំដោយពេលនេះក្រុមហ៊ុនមិនទទួលការកុម្ម៉ង់ថ្មីៗឡើយពីព្រោះតម្រូវការច្រើនលើសលប់ពេក៕ HR
ប្រភព: www.independent.co.uk