.jpg)
បុប្ផាណា នឹងប្រើកម្មវិធី Zoom ដើម្បីជជែកគ្នារវាងផលិតករ និងទស្សនិកជនជំនួសការជួបជុំផ្ទាល់។ រូបថត សហការី
ភ្នំពេញ៖ ក្រោយពីការបញ្ចាំងភាពយន្តឯកសារ ១០ រឿង ដែលអាចឲ្យទស្សនាតាមអនឡាញបានចប់មក កាលពីល្ងាចថ្ងៃសៅរ៍ទី ១៨ ខែមេសា ឆ្នាំ ២០២០ នៅមជ្ឈមណ្ឌលបុប្ផាណា បានសាកល្បងប្រើប្រាស់កម្មវិធីបច្ចេកវិទ្យាទំនាក់ទំនងបណ្តាញសង្គមមួយឈ្មោះ Zoom ដែលអាចឲ្យទស្សនិកជន និងផលិតករអាចពិភាក្សាគ្នា ឬសំណេះសំណាលចោទជាសំណួរ និងចម្លើយ បានពីចម្ងាយ ឬពីផ្ទះ នៅក្នុងកាលៈទេសៈទាំងអស់គ្នាសំងំនៅក្នុងផ្ទះ មិនអាចចេញក្រៅជួបជុំគ្នាបានដូចជាកាលពីមុន ដែលមិនទាន់មានវិបត្តិកូវីដ ១៩ នោះ។
នេះគឺជាការត្រឡប់មកសាជាថ្មីម្ដងទៀតសម្រាប់ចុងសប្ដាហ៍ ដោយមាននាំយកនូវចំណីចក្ខុថ្មី កម្រងភាពយន្តឯកសារខ្លីៗចំនួន ១០ ដែលបានរំលេចពីបញ្ហា ដែលយើងកំពុងជួបប្រទះមានដូចជា ប្រវតិ្តសាស្ត្រ បេតិកភណ្ឌ សិល្បៈ និងបរិស្ថាន ផលិតដោយក្រុមផលិតករវ័យក្មេងនៃគម្រោង ឈ្មោះ «មួយដុល្លារ» របស់មជ្ឈមណ្ឌលបុប្ផាណា។
លោក ជា សុភាព ដែលជានាយកប្រតិបត្តិនៃមជ្ឈមណ្ឌលបុប្ផាណាប្រាប់ភ្នំពេញប៉ុស្តិ៍ថា៖ «ភាពយន្តឯកសារចំនួន ១០ រឿង ដែលបានចាក់បញ្ចាំងជូនទស្សនានោះ យើងក៏សាកល្បងប្រើកម្មវិធី Zoom ដើម្បីផ្តល់ការជជែកគ្នារវាងទស្សនិកជន និងផលិតករ ឲ្យចូលរួមជាមួយពួកយើង។
នេះជាលើកដំបូង នៃកិច្ចពិភាក្សាគ្នារវាងទស្សនិកជន និងផលិតករ អាចឃើញគ្នាពីចម្ងាយតាមបណ្តាញទំនាក់ទំនងនេះ។ ដោយយើងមានការចូលរួមពីផលិតករខ្លះ មិនបានគ្រប់ចំនួន ១០ រូបនោះឡើយ។ កម្មវិធីនេះ គឺអាចភ្ជាប់ទំនាក់ទំនងនៃការចោទជាសំណួរទៅកាន់ពួកគាត់បានតាមរយៈការផ្សាយផ្ទាល់នៃកម្មវិធីតែម្តង ខណៈរយៈពេលប្រើមានត្រឹម ៤៥ នាទីតែប៉ុណ្ណោះ ដោយសារយើងស្ថិតនៅក្នុងកាលៈទេសៈសាកល្បងប្រើឥតគិតថ្លៃ»។
នាយកប្រតិបត្តិនៃមជ្ឈមណ្ឌលបុប្ផាណា លោក ជា សុភាព ក៏លើកឡើងពីផលលំបាកនៃចង្វាក់ផលិតកម្ម និងគម្រោងនានារបស់ខ្លួនផងដែរ ក្នុងគ្រាមានវិបត្តិដោយសារការរីករាលដាលនៃជំងឺកូវីដ ១៩ នេះថា៖ «ដោយសារយើងមិនអាចជួបជុំគ្នាដូចជា កាលពីមុនបាន ហើយរឹងរឹតតែមិនអាចចេញក្រៅដើម្បីទៅថតយកសកម្មភាពនានា តាមសាច់រឿងដែលផលិតកុនឯកសាររបស់ផលិតករយើងនោះ ទើបសាកល្បងប្រើកម្មវិធីណា អាចមានសកម្មភាពខ្លះពាក់ព័ន្ធទៅនឹងគម្រោងយើងនេះ។ ភាពយន្តទាំង ១០ រឿង នេះ ជាសមិទ្ធផលនៃគម្រោងទី ១ របស់បុប្ផាណា មានឈ្មោះថា «មួយដុល្លារ» ដែលបណ្តុះបណ្តាលយុវជននៅតាមសហគមន៍ឲ្យចេះថតភាពយន្តឯកសារផ្ទាល់ខ្លួនបង្ហាញឲ្យទស្សនិកជន បានទស្សនា និងយល់ដឹង ហើយក៏ជាទុនសម្រាប់ការប្រែក្លាយខ្លួនជាផលិតករនាពេលអនាគតដែរ ហើយគម្រោង «មួយដុល្លារ» នេះ យើងបានកំណត់ឲ្យយុវជនថតពីសកម្មភាពរស់នៅរបស់ពលរដ្ឋខ្មែរ នៅក្នុងរយៈពេល ១ ថ្ងៃ ថា តើពួកគាត់មានការរស់រានបែបណា ឬប្រកបរបរចិញ្ចឹមជីវិតខ្លួនបែបណា ខណៈនេះ គឺជាឱកាសឲ្យផលិតករ ចេះតាមដានមើលអំពីបញ្ហាសង្គមពីចំណុចតូចៗទៅ»៕
