ក្រុងហ្សាការតា៖ បុរសកាណាដាម្នាក់ត្រូវបានបណ្ដេញចេញពីដែនកោះបាលី ចំពោះការបើកបង្ហាត់យោគៈ «កាមតម្រេក» ក្រោយពីអាជ្ញាធរឥណ្ឌូនេស៊ី បានឱ្យដឹងថាបុរសរូបនេះមិនគោរពប្រពៃណី និងតម្លៃអ្នកស្រុក។
លោក គ្រី ស្ដូហ្វើរគីន ម៉ារទីន ត្រូវបានបណ្ដេញចេញពីប្រទេសឥណ្ឌូនេស៊ីកាលពីថ្ងៃអាទិត្យក្រោយពីលោកបានផ្សព្វផ្សាយតាមអនឡាញនូវថ្នាក់រៀន «ការសម្រេចកាមពេញរាងកាយតាមប្រពៃណីតាន់ទ្រីក» ក្នុងតម្លៃ ២៤ ដុល្លារ។ ការផ្សព្វផ្សាយសេវាកម្មនេះបានបង្កការភ្ញាក់ផ្អើលដល់អ្នកប្រើប្រាស់បណ្ដាញសង្គមនៅឥណ្ឌូនេស៊ី ដែលរំខានដល់ក្រុមអ្នកអភិរក្សនិយម។
អភិបាលក្រុងបាលីអាយវ៉ាយ៉ាន់កូស្ទ័របានឱ្យដឹងកាលពីថ្ងៃអាទិត្យក្នុងសន្និសីទខ្លីមួយ ដោយលោក ម៉ារទីន អង្គុយក្បែរមន្ដ្រីអន្ដោប្រវេសន៍ថា៖ «សកម្មភាពនេះបង្កការប៉ះពាល់ដល់កេរ្ដិ៍ឈ្មោះប្រទេសឥណ្ឌូនេស៊ី និងកោះបាលីជាគោលដៅទេសចរណ៍ល្បីល្បាញ និងមិនបានគោរពដល់ប្រពៃណីកោះបាលីផងដែរ»។
លោកអភិបាលបានបន្ដថា៖ «បើលោកឯងចង់មកទីនេះម្ដងទៀត លោកត្រូវគោរពដល់ប្រពៃណីទំនៀមទម្លាប់កោះបាលីនេះផង»។
យោងតាមមន្ដ្រីអន្ដោប្រវេសន៍បានឱ្យដឹងថាលោក ម៉ារទីន បានប្រកែកថាថ្នាក់រៀនយោគៈនេះមិនទាក់ទងនឹងសកម្មភាពសិច និងផ្ដោតចម្បងលើតិចនិកដង្ហើមប៉ុណ្ណោះ។
ថ្នាក់រៀនយោគៈដ៏ចម្រូងចម្រាសនេះត្រូវបានលុបចោលក្រោយមានការរិះគន់ច្រើន។
កោះបាលីជាដែនដីប្រកាន់លទ្ធិព្រហ្មញ្ញសាសនាភាគច្រើនបានបណ្ដេញជនបរទេសជាច្រើននាក់ពីបទមិនគោរពទីឋានពិសិដ្ឋ ឬមិនគោរពតាមវិធានការរឹតបន្តឹងក្នុងការទប់ស្កាត់ជំងឺកូវីដ។
កាលពីឆ្នាំមុនអ្នកលេងយោគៈស៊ីរីម្នាក់ត្រូវបានបណ្ដេញពីកោះបាលីចំពោះការប្រមូលផ្ដុំគ្នាច្រើន ដែលបំពាននឹងការទប់ស្កាត់ការរីករាលដាលវីរុសកូរ៉ូណា៕ HR