ភ្នំពេញៈ ក្រោយពីប្រកាសផ្អាកឈប់សិល្បៈប្រមាណជិត ២ ឆ្នាំមកនោះ តារាសម្តែងស្រីដែលបានផុសភាពល្បីដោយសារភាពសិចស៊ី និងធ្លាប់បែកធ្លាយរូបថតអាក្រាតល្វែងលើកញ្ញាបេននី យ៉ាំង ក៏ទទួលរងការរិះគន់នឹងទង្វើផ្ទាល់ខ្លួន សាជាថ្មីម្តងទៀតគឺសកម្មភាពបង្ហោះរូបសិចស៊ី ដ៏ទាក់ទាញ សម្រាប់ការផ្សព្វផ្សាយក្នុងមុខរបរលក់ផលិតផលសម្អាងកាយតាមអនឡាញ។
ភាពផុសផុលរកវិធីសាស្ត្រផ្សព្វផ្សាយលក់ផលិតផលតាមការ Live វីដេអូក្នុងបណ្តាញហ្វេសប៊ុកដ៏ទាក់ទាញដោយហ៊ានថតសកម្មភាពទាំងមានកាយសិចស៊ីខ្លាំង ដែលសឹងតែអាក្រាតកាយអស់នេះ ក៏បង្កឲ្យមានការទើសទាល់ទៅដល់ក្រុមអ្នកចូលចិត្តអភិរក្សវប្បធម៌ខ្មែរផងដែរ ដោយក្នុងនោះមានលោកអាចារ្យធំនគររាជ បានរិះគន់យ៉ាងចាស់ដៃទៅលើកញ្ញា បេននី យ៉ាំង ក្រោយពីបានឃើញរូបភាព និងវីដេអូរបស់នាង។
ចេញពីគណនីហ្វេសប៊ុករបស់បុរសមានសក់វែងឈ្មោះថា អាចារ្យធំនគររាជ ដែលមហាជនតែងកត់សម្គាល់ និងឲ្យងារថា ជាអ្នកចូលចិត្តការអភិរក្សវប្បធម៌ខ្មែរ បានសរសេររិះគន់ទៅលើរូបរបស់តារាស្រីមានសាច់សខ្ចីល្វក់ និងចូលចិត្តបង្ហោះនូវរូបស្និទ្ធស្នាលខ្លាំងនឹងគូស្នេហ៍ក៏ដូចជារូបសិចស៊ីផ្ទាល់កញ្ញា បេននី យ៉ាំង ថា៖ «អាសូរតម្លៃនៃភាពថ្លៃថ្នូរស្ត្រីដូចនេះ!ក្រៅពីស្រាត តើមានវិធីណាអាចល្បីបានទេ?»។
ក្រោយមកកញ្ញា បេននី យ៉ាំង ដែលមួយរយៈចុងក្រោយនេះ សម្គាល់ឃើញថា នាងតែងពាក់ម៉ាស់មុខបាំងត្រង់ច្រមុះជាប់ ទំនងជាមានបញ្ហាទៅលើការវះកាត់ច្រមុះនោះ ក៏បានតបសារទៅអាចារ្យធំនគររាជវិញថា៖ «រូបរបស់ប្អូន ខ្លួនប្អូន អ្វីៗជារបស់ប្អូន។ ប្អូនពុំបានរុករាន ឬថតលើក្បាលបងឯណា បងកុំបាច់ចោទ ឬឆ្ងល់ជាសំណួរអីរឿងប្អូន ខ្វល់រឿងរកលុយចូលផ្ទះ ឬរកអង្ករដាក់ឆ្នាំងផ្ទះបងទៅណា!»។
តារាស្រីដែលមានរាសីឡើងហក់ស្ទុយលើវិថីសិល្បៈតែមួយប៉ប្រិចភ្នែក ហើយនាងមានឈ្មោះពីកំណើតថា កញ្ញា លី សុគន្ធារី ហៅកញ្ញា បេននី យ៉ាំង បានបន្តសារវែងអន្លាយ ១ ទៀតតបនឹងការរិះគន់លើភាពសិចស៊ីផ្ទាល់ខ្លួនរបស់នាងថា៖ «អ្នកគ្រប់គ្នាដឹងទេថាប៉ុន្មានរូបដែលផូស្តនេះ តើខ្ញុំចង់បានន័យថាម៉េច?ខ្ញុំប្រាប់ ខ្ញុំមិនខ្វល់នរណាមិនចូលចិត្តខ្ញុំនៅពេលខ្ញុំសិចស៊ី ទោះជ្រុលសិចស៊ីពេក ក៏ខ្ញុំនៅតែចង់ផូស្តព្រោះជារូបខ្ញុំ ខ្ញុំមានអ្វីជារបស់ខ្លួនខ្ញុំ។ ប្រាកដ ខ្ញុំសិចស៊ី តែខ្ញុំមានរបររកស៊ីថ្លៃថ្នូរត្រឹមត្រូវ ខ្ញុំពិតជាមិនបានលក់ខ្លួនយកប្តីអ្នកណា។
ជេរថា ម្តាយឪពុកអ្នកណា ឬការរុករាននរណា ដែលពុំនាំភាពក្តៅក្រហាយមកឲ្យខ្ញុំ ហើយខ្ញុំមានពេលទំនេរខ្ញុំតែងតែធ្វើឲ្យខ្លួនឯងសប្បាយចិត្ត ខ្ញុំចង់ជួយអ្នកណា ខ្ញុំទៅជួយអ្នកនោះ។ ខ្ញុំចង់ចេញទៅឯក្រៅប្រទេស ខ្ញុំក៏ហោះទៅភ្លាម ខ្ញុំចង់កែសម្ផស្ស ខ្ញុំអាចហោះទៅគ្រប់ពេលដែលខ្ញុំចង់ ដោយពុំចាំបាច់សុំអ្នកណាទេព្រោះខ្ញុំរស់នៅឯករាជ្យលើជីវិតរបស់ខ្ញុំ ផ្ទះក៏របស់ខ្ញុំ ឡានក៏របស់ខ្ញុំ ហាងនោះក៏របស់ខ្ញុំ មិនមែនលុយស្មោកគ្រោកអ្នកណាឬបោកប្រាស់គេទេ»។
តារាស្រីបាត់មុខពីសិល្បៈមួយរយៈកញ្ញា បេននី យ៉ាំង ក៏បានបន្ថែមទៀតដែរថា៖ «អ៊ីចឹងហើយខ្លួនខ្ញុំ មានសិទ្ធិធ្វើអ្វីដែលខ្ញុំចង់បាន និងចង់ធ្វើវា។ អ្នកណាក៏ដោយដែលមិនចូលចិត្តខ្ញុំសុំកុំមកប៉ះពាល់លើជីវិត និងការរស់នៅប្រចាំថ្ងៃរបស់ខ្ញុំ។ សូមប្រាប់ឲ្យច្បាស់ថា ខ្ញុំនៅតែជាខ្ញុំ ខ្ញុំពុំបានប្រែទៅជាអ្នកណាសម្រាប់អ្នកណាទេ យល់?»៕