.jpg)
ក្រុមសិល្បករវៀតណាម និងខ្មែរ ឈ្មោះ XEM នាថ្ងៃសម្ពោធពិព័រណ៍ «អន្តរសីមា» នៅគម្រោងស-ស។ រូប SASA ART PROJECT
ភ្នំពេញ៖ ពិព័រណ៍ស្នាដៃថ្មីមួយមានឈ្មោះថា «អន្តរសីមា» ដែលទទួលបានការគាំទ្រពីមូលនិធិ Rei Foundation នឹងតាំងបន្តនៅវិចិត្រសាលនៃគម្រោងសិល្បៈស-ស មានរយៈពេល ៣ ខែ ដែលនេះ គឺជាស្នាដៃថ្មី ពិសេសបង្កើតដោយក្រុមសិល្បករវៀតណាម និងខ្មែរ ឈ្មោះថា XEM បង្ហាញដំបូងនៅរាជធានីភ្នំពេញ។
បើតាមសេចក្តីប្រកាសព័ត៌មានកាលពីថ្ងៃសម្ពោធកាលពីសប្តាហ៍មុននេះ និងបន្តដល់ថ្ងៃទី ១០ ខែ មេសា ឆ្នាំ ២០២០ នោះក៏បានឲ្យដឹងដែរថា៖ «ពិព័រណ៍ឈ្មោះ «អន្តរសីមា» ដែលជាស្នាដៃថ្មីបង្កើតឡើង ដោយក្រុមឈ្មោះ XEM។
ហើយក្រុមនេះបង្កើតឡើងដោយមិត្តភក្តិ និងសិល្បករចំនួន ៥ នាក់ តាំងពីឆ្នាំ ២០១៣ មកដោយសារក្តីស្រឡាញ់វិស័យរូបថតដូចគ្នា។ ពិព័រណ៍នេះទទួលការគាំទ្រពីមូលនិធិ Rei Foundation តែសមាជិកម្នាក់ៗនៃក្រុមនេះ មានការងារសិល្បៈឯករាជ្យរៀងៗខ្លួន តែធ្វើការរួមគ្នា ខណៈការបោះពុម្ពផ្សាយទស្សនាវដ្ដីមួយឈ្មោះថា XEM ដោយប្រើថវិកាខ្លួនឯង។ ការបោះពុម្ពជាទស្សនាវដ្ដីនេះ គឺជាវេទិកាមួយដកពិសោធសម្រាប់អនុវត្ត និងចែករំលែករូបថត និងទម្រង់សិល្បៈណា ដែលពាក់ព័ន្ធ។ ចំពោះ XEM គឺមានន័យថា «មើលសង្កេត» ដូច្នេះគឺចង់សង្កត់ធ្ងន់ទៅលើការសង្កេតមើល ដែលជាវិធីសាស្រ្តដ៏សំខាន់មួយ សម្រាប់ចូលសិក្សា។
សេចក្តីព័ត៌មានខាងលើបានបន្តថា៖ «ដោយជឿលើពិធី ឱកាសនិងភាពចៃដន្យ ក្រុម XEM ប្រើវិធីសាស្រ្តនៃការជួបប្រទះយឺតៗ ដោយផ្ទាល់ និងដែលអាចបន្សល់ទុកនូវស្លាកស្នាមបានក្នុងយុគសម័យ ដែលនិយមភាពឌីជីថលដ៏ខ្លាំងក្លា។ អ្នកអានអាចស្វែងយល់ស្នាដៃសិល្បៈ និងសិល្បករបានតាមរយៈទស្សនាវដ្តីនេះ ដែលចែកចាយនៅតាមហាងកាហ្វេ និងបណ្ណាល័យនានា ហើយគេចែកចាយផ្សព្វផ្សាយបន្តពីមនុស្សម្នាក់ៗ»។
សិល្បករវៀតណាមប្រើបច្ចេកទេសរូបថតស្តេរ៉េអូ។ រូបថត SASA ART PROJECT
សម្រាប់លេខថ្មីពិសេសនេះ ដែលបង្ហាញក្នុងពិព័រណ៍នេះ ក្រុម XEM អញ្ជើញសិល្បករខ្មែរចំនួន ៥ រូប គឺ លោក ខៀវ កាណែល លោក ឃុន វណ្ណៈ លោក លីម សុខច័ន្ទលីណា ម៉ិច សេរីរ័ត្ន និង សៅ ស្រីម៉ៅ។ ក្នុងនាមជាតំណាងឲ្យក្រុមអ្នករៀបចំវេទិកានេះ ឲ្យបញ្ចេញមតិ ក្នុងទម្រង់សិល្បៈ ដោយគ្មានអន្តរាគមន៍ និងការកែសម្រួលពីអ្នកខាងក្រៅ XEM គឺជាឧទាហរណ៍មួយនៃតម្រូវការបោះពុម្ពផ្សាយរបស់សិល្បករ ជាពិសេស ក្នុងបរិបទអាស៊ីអាគ្នេយ៍ ដែលជាមធ្យោបាយផ្សព្វផ្សាយ ក៏ដូចជាទស្សនិកជនសហសម័យ មានទំហំតូចចង្អៀតនៅឡើយ។ អ្វីដែលសំខាន់បំផុតនោះ គឺមិត្តភាពនៃសមាជិកក្រុមនេះ និងភាពបើកទូលាយរបស់ពួកគេក្នុងការស្វាគមន៍ និងភ្ជាប់ទំនាក់ទំនងជាមួយអ្នកដទៃ ដែលអនុញ្ញាតឲ្យ XEM មានតម្លៃលើសពីទស្សនាវដ្តី។
ស្នាដៃរបស់សមាជិកក្រុម XEM ទាំង ៥ រូប ក៏លេចចេញជារូបរាងឡើងផងដែរក្នុងពិព័រណ៍។ ក្នុងស្នាដៃឈ្មោះ «Crash Simulacra ពីសាយហ្គន មកដល់ភ្នំពេញ» ដោយ ក្វាង ឡាម បង្ហាញពីកម្រងរូបថតបែប anaglyph ដែលជាបច្ចេកទេសរូបថតស្តេរ៉េអូ ម្យ៉ាងដែលចម្លងរូប១ធ្វីជារូប ២ ត្រួតលើគ្នា។ រូបភាពមានពណ៌ក្រហម និងខៀវខ្ចីទាំងនេះ អាចបំភាន់ឲ្យយើងមានអារម្មណ៍ថា មានចលនា និងមិននឹងនរ ហើយមើលទៅហាក់ដូចជារូបយន្ដហោះទាំងនេះ កំពុងតែហោះបុកចូលអគារ។ នៅជាប់នឹងរូបថតទាំងនេះគឺជាវីដេអូហ្គេម នៃការបើកយន្តហោះលើផែនទីទីក្រុងភ្នំពេញ ដែលសិល្បកររូបនេះបានធ្វើឡើង៕
