ភ្នំពេញៈ ឥទ្ធិពលនៃគំនិតបែងចែកពោរពេញទៅដោយភាពអាត្មានិយម បានជំរុញឲ្យមនុស្សខ្លះ ពេលឃើញអ្នកដទៃ មានចំណុចណាមួយអន់ខ្សោយជាងខ្លួនក៏មានគំនិតបន្ទាបបន្ថោក មើលស្រាល និងថែមទាំងមើលរំលងនូវចំណុចខ្លាំងរបស់គេ មិនថា ដោយចេតនា ឬដោយអចេតនានោះក៏ព្រោះតែក្រសែភ្នែករបស់គេ សម្លឹងមើលឃើញថា «ខ្លួនអស្ចារ្យជាងគេ» ដូចពាក្យមួយ តែងតែនិយាយលេងថា «មានអ្នកណាដល់អញ!ក្រៅពីអញមានតែអញ!»។
បើតាមការបកស្រាយអំពីគេហទំព័រ ៥០០០ ឆ្នាំ ទៅតាមពុទ្ធវចនៈ ឲ្យដឹងថា៖ «កម្ចាត់ចោលភាពអាត្មានិយមកាន់តែច្រើន អំណាចអ្នកនឹងកាន់តែខ្លាំង!ស្វែងរកការចាប់ផ្តើមគ្មានទីបញ្ចប់ទេ កុំអនុញ្ញាតឲ្យការភ័យខ្លាចមករំខានការងារត្រឹមត្រូវរបស់អ្នកឲ្យសោះ។ របស់សព្វយ៉ាង ដែលយើងកំពុងតែពេញចិត្ត និងមិនពេញចិត្តគ្រាន់តែជាគ្រឿងផ្សំមកពីដី ទឹក ភ្លើង ខ្យល់ តែប៉ុណ្ណោះ ប្រសិនបើលោកអ្នកមិនបានពិចារណាឲ្យរឿយៗទេ អ្នកនឹងជាប់ជំពាក់ កាលបើជាប់ជំពាក់អ្នកមិនអាច ចាកចេញពីលោកនេះបាននោះឡើយ»។
គេហទំព័រ ៥០០០ ឆ្នាំ ក៏បង្ហាញចំណុចកុំចំនួន ១០ យ៉ាង ដើម្បីកម្ចាត់ចោលភាពអាត្មានិយម នៅក្នុងចិត្តរបស់មនុស្សដូចតទៅ៖ «ទី ១ កុំប្រៀបធៀប បើចង់ប្រៀបធៀបត្រូវគិតឲ្យឃើញថា ខ្លួនខ្លាំង កុំប្រៀបធៀបឲ្យឃើញថា ខ្លួនអន់ថោកទាបទន់ខ្សោយជាងគេធ្វើអី។ ទី ២ កុំប្រកួតប្រជែង លទ្ធផលរបស់វា នាំមកតែភាពក្តៅក្រហាយតែប៉ុណ្ណោះ។ ទី ៣ កុំរិះគន់ វាជាអំពើរបស់មនុស្សទន់ខ្សោយទេ ជីវិតគ្មានអ្វីទៀងទាត់ឡើយ កង់ត្រាចកង់ធ្នង់ ម្តងគេម្តងយើងទេ។ ទី ៤ កុំខឹងច្រើន បានត្រឹមតែបំផ្លាញខ្លួនឯង គ្មានបានជួយអ្វីដល់យើងឡើយ មិនចាំបាច់ខឹងក៏គេដោះស្រាយបញ្ហាបានដែរ។ ចំណែកទី ៥ កុំសោកស្តាយ រឿងកន្លងហួស គឺហួសអស់ទៅហើយ យើងអាចនឹងកែប្រែបាននៅថ្ងៃខាងមុខ ដើម្បីកុំឲ្យមានកំហុសតទៅទៀត»។
អំពើអាក្រក់នៅក្នុងលោកនេះបើទោះជាមនុស្សអាក្រក់ឲ្យមានតម្លៃ ក៏នៅតែជាអំពើអាក្រក់ សូម្បីតែមនុស្សអាក្រក់ដូចគ្នាក៏ស្អប់ខ្ពើម ព្រោះជាអំពើថោកទាប អំពើល្អទោះជាអ្នកណាមិនឲ្យតម្លៃក៏នៅតែអាចកម្ចាត់សភាវៈអាក្រក់បានដែរ។ និរន្តរភាពនៅក្នុងលោកគឺជាអន្តរកម្មរវាង អំពើល្អនិងអំពើអាក្រក់ដែលប្រយុទ្ធដើម្បីសាងអត្ថិភាពនៃលោករៀងៗខ្លួន បើនិយាយឲ្យដល់ទីជម្រៅជីវិតជាសមរភូមិនៃអាតូមនេះឯង។
ចំពោះ ៥ យ៉ាង ទៀតគេហទំព័រ ៥០០០ ឆ្នាំ បានបន្តឲ្យដឹងថា៖ «ទី ៦ កុំបារម្ភច្រើន ក្តីបារម្ភមិនបានជួយឲ្យបញ្ហានៅថ្ងៃស្អែកធូរស្រាលនោះទេ វាបានត្រឹមតែលួចយកភាពរីករាយនៅថ្ងៃនេះទៅតែប៉ុណ្ណោះបើដេកឲ្យលក់ភ្ញាក់ឡើងមានកម្លាំងទុកដោះស្រាយបញ្ហានៅថ្ងៃស្អែកវិញល្អជាង។ ទី ៧ កុំស្តីបន្ទោស ឲ្យតែជាមនុស្សគឺនៅមានកំហុសជាធម្មតា គេខុសហើយ គេក៏ចេះឈឺចាប់នឹងកំហុសនេះ យើងមិនចាំបាច់ស្តីបន្ទោសបន្ថែមទៀតទេ ជួយគ្នាស្វែងរកដំណោះស្រាយកែប្រែកំហុសវិញល្អជាង។ ទី ៨ កុំតូចចិត្តកុំស្តីបន្ទោសខ្លួនឯងវាជារោគសញ្ញាធ្លាក់ទឹកចិត្តដែលនាំឲ្យខូចសុខភាពផ្លូវចិត្តខ្លួនឯងទេ ក្រោកឈរឡើង ហើយបន្តដំណើរទៅមុខទៀត លោកនេះមិនមែនត្រូវបញ្ចប់ត្រឹមនេះទេ។ ទី ៩ កុំភ័យខ្លាច វាមិនបានជួយឲ្យបញ្ហាបានធូរស្រាលនោះទេ វាកាន់តែធ្វើឲ្យបញ្ហាធំឡើងតែប៉ុណ្ណោះ ដោយសារការភ័យខ្លាច វានាំយើងឲ្យធ្វើខុសក៏មាន ឲ្យគ្រោះថ្នាក់ក៏មាន។ រីឯទី ១០ វិញគឺការធ្វើចិត្តឲ្យរីករាយ សើចពេញចិត្តយ៉ាងតិចបានម្តងនៅក្នុងមួយថ្ងៃៗ ជាពិសេស ពេលអ្នកមិនអាចលែងចោលរឿងខាងលើណាមួយបាននោះ»៕