នៅពេលដែលមនុស្សសម្ងំនៅផ្ទះ ព្រៃផ្កាកណ្ដឹងខៀវ នៅប្រទេសប៊ែលហ្ស៊ិក រីកបញ្ចេញសម្រស់ស្រស់ត្រកាល។ AFP
ក្រុងហាល៍ : នៅពេលដែលធម្មជាតិឈានដល់រដូវកាលដ៏ស្រស់ស្អាតបំផុតក្នុងឆ្នាំនេះ មនុស្សបែរជាពុំមានឱកាសទៅទស្សនាដោយផ្ទាល់ទៅវិញ។
ជារៀងរាល់រដូវផ្ការីក បណ្ដាឧទ្យាន និងព្រៃធម្មជាតិនៅប៊ែលហ្ស៊ិក ក៏ដូចជានៅអឺរ៉ុប បានរំលេចបុប្ផាចម្រុះពណ៌សាយភាយក្លិនពិដោរឈ្ងុយឈ្ងប់ ដែលធ្វើឲ្យមនុស្សម្នាខំស្កាត់មកគយគន់ ដោយលែងខ្លាចការប្រឈមនឹងជំងឺឆ្លង។
ឧទ្យាន និងព្រៃអភិរក្សមួយចំនួនត្រូវបានបិទទ្វារមិនឲ្យភ្ញៀវចូលទស្សនា ខណៈភ្ញៀវដែលល្មើសបម្រាមត្រូវបានពិន័យជាប្រាក់។
វិធានការដ៏តឹងរឹងបានធ្វើឲ្យមនុស្សជាច្រើនខកចិត្តនឹងបាត់បង់ឱកាសទៅទស្សនាព្រៃផ្កាកណ្ដឹងខៀវ Hallerbos ចម្ងាយប្រមាណ ១៥ គីឡូម៉ែត្រភាគខាងត្បូងទីក្រុងប៊្រុចសែល។
ទិដ្ឋភាពកាលពីឆ្នាំ ២០១៦ ដែលភ្ញៀវទេសចរខ្លះខំក្រោកពីព្រឹកព្រហាម ដើម្បីផ្ដិតយករូបថតផ្កាកណ្ដឹងខៀវរីកស្គុសស្គាយ។ AFP
ឆ្នាំដែលមានផ្ការីកស្គុសស្គាយល្អ ព្រៃបុប្ផាកណ្ដឹងខៀវនេះបានទាក់ទាញទេសចរដល់ទៅ ១០ ម៉ឺននាក់មកទស្សនាកម្រាលព្រំបុប្ផាពណ៌ខៀវស្វាយដុះចន្លោះដើមឈើធំៗត្រង់ខ្ពស់សន្លឹម។
អភិបាលក្រុងហាល៍ លោក Marc Snoeck បាននិយាយថា៖ «ពិតជាឈឺចិត្តណាស់។ អ្វីៗពិតជាមិនដូចអ្វីដែលយើងខិតខំធ្វើតាមការព្រាងទុកសោះ»។
ជារៀងរាល់ខែមេសា ពិធីបុណ្យផ្កាកណ្ដឹងខៀវ បានទាក់ទាញមនុស្សកកកុញ ជាពិសេសនៅចុងសប្ដាហ៍ចំថ្ងៃមានពន្លឺព្រះអាទិត្យ និងមេឃស្រឡះល្អ។
អំឡុងពេលរីកពេញស្អាតរយៈពេល ៣ សប្ដាហ៍ ព្រៃផ្កាកណ្ដឹងខៀវបានទាក់ទាញភ្ញៀវទេសចរពីចម្ងាយតាំងពីចិន រហូតដល់អាមេរិក។
នៅរដូវផ្ការីក ឆ្នាំ ២០២០ អភិបាលក្រុងចាត់ទុកថា ជាវេលាទុកឲ្យធម្មជាតិលូតលាស់ស្ដារសម្រស់ឡើងវិញ។ រូបថត AFP
បច្ចុប្បន្ន តាំងពីព្រឹកទល់ព្រលប់ មានតែពលរដ្ឋក្នុងស្រុកដើរកាត់ព្រៃនេះ ស្រូបក្លិនផ្កាយ៉ាងឯកា ខណៈព្រៃនេះធ្លាប់តែមានមនុស្សអ៊ូអរមកថតរូប និងជិះកង់ខ្វែងខ្វាត់តាមផ្លូវព្រៃ។
យ៉ាងណាមិញ លោកអភិបាលក្រុង Snoeck បានលើកឡើងថា ឱកាសខ្សត់ភ្ញៀវឆ្នាំនេះក៏ល្អម៉្យាងដែរ។
លោកបានបន្តថា៖ «មកទសល់ពេលនេះ ធម្មជាតិទទួលបានការគោរពពីមនុស្ស ហើយមនុស្សគួរតែបន្តនៅផ្ទះដើម្បីការពារជំងឺឆ្លង»។
អវត្តមានភ្ញៀវទេសចរ ក៏អំណោយផលល្អដល់ព្រៃផ្កាកណ្ដឹងខៀវផងដែរ ដោយសារតែកន្លងមកមនុស្សច្រើនតែងតែដើរជាន់ផ្កា ធ្វើឲ្យរុក្ខជាតិនេះងាប់អាចដុះទាន់សម្រាប់ឆ្នាំក្រោយ។ ពេលនេះផ្កាអាចមានឱកាសលូតលាស់វិញ នៅពេលដែលវាមិនរងការប៉ះពាល់បំផ្លាញពីមនុស្ស។
បុប្ផាកណ្ដឹងខៀវពណ៌បែកស្វាយ រីកបីដូចជាកម្រាលព្រំលម្អគល់ឈើដ៏ខ្ពស់សន្លឹម។ រូបថត AFP
សម្រាប់ទីក្រុងហាល៍ដែលមានពលរដ្ឋតែប្រមាណ ៣ ម៉ឺននាក់ ពិតជាពិបាកកាត់ចិត្តនឹងលុបចោលពិធីបុណ្យផ្កាកណ្ដឹងខៀវ។
អ្នកល្បីខាងផលិតសូកូឡា Marleen Van Volsem បាននិយាយត្អូញថា លោកធ្លាប់តែធ្វើសូកូឡាផ្កាកណ្ដឹងខៀវ ដោយមានស្នូលពណ៌ខៀវ និងស្វាយនៅខាងក្នុង។
លោកអភិបាកក្រុងបានបន្ថែមថា៖ «រឹតតែឈឺចាប់ទៀតនោះ គឺឱកាសធាតុក្ដៅខុសប្លែកពីសព្វមួយដង ហើយសេដ្ឋកិច្ចក៏រងផលប៉ះពាល់ ជាពិសេសអាជីវកម្មភោជនីយដ្ឋាន និងបារ៍តែម្ដង»៕ AFP
រាងដូចកណ្ដឹង កញ្ចុំផ្កាខៀវបែកស្វាយ រីកស្គុសស្គាយពេញស្អាតបំផុត ក្នុងរយៈពេល ៣ ទៅ ៤ សប្ដាហ៍។ រូបថត AFP
សកម្មភាពដ៏ពេញនិយមបំផុតកាលពីឆ្នាំមុនៗ គឺការជិះកង់ចន្លោះផ្លូវខ្វាត់ខ្វែងនៅក្នុងព្រៃផ្កាកណ្ដឹងខៀវ។ រូបថត AFP
