.jpg)
កៅ សេងហ៊ួ ក្នុងឈុត «រាជិនីពណ៌» ម៉ូដច្នៃដោយក្រុមទេពច្យុតថ្ងៃតាំងពិព័រណ៍ស្នាដៃសិស្សនៅសាលាហ្វារពន្លឺសិល្ប:។ សហការី
ភ្នំពេញ៖ វីដេអូគំនូរជីវចលប្រភេទ 2D ជាស្នាដៃម្ចាស់ជយលាភីលេខ ១ នៃកម្មវិធីប្រកួតប្រជែងគំនូរជីវចល Cambodia DigiCon6 ផលិតករភេទទី ៣ លោក កៅ សេងហ៊ួ មានចំណងជើងថា «Colors-ពណ៌» នឹងត្រៀមខ្លួនជាតំណាងកម្ពុជា នៅក្នុងការប្រកួតអន្តរជាតិឈ្មោះ 21st DigiCon6 ASIA Awards នៅទីក្រុងហុងកុង ប្រទេស ចិន ខែក្រោយ។
កៅ សេងហ៊ួ ដែលជានិស្សិតទើបតែបានរៀនចប់ជំនាញបរិញ្ញាបត្រផ្នែកគំនូរជីវចលនៅសាលាហ្វារពន្លឺសិល្បៈឆ្នាំ ២០១៩ នៅខេត្តបាត់ដំបង គឺជាម្ចាស់ជយលាភីលេខ ១ ក្នុងកម្មវិធីប្រកួតប្រជែងគំនូរជីវចល Cambodia DigiCon6 នៅប្រទេស កម្ពុជា ក្រោយពីបានប្រជែងឈ្នះក្រុមផ្សេងៗ ដែលចូលរួមប្រកួតសរុបមានចំនួន ១៣ ក្រុម ដែលបានប្រគល់ជយលាភីដោយឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីខែ សីហា ឆ្នាំ ២០១៩ កន្លងមក។
ជយលាភីលេខ១ Cambodian Digicon6 2019 កៅ សេងហ៊ួ ពេលទទួលវិញ្ញាបនបត្រពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ សហការី
វីដេអូគំនូរជីវចល 2D ដែលមានថេរវេលា ៥ នាទី ជាស្នាដៃផលិតករភេទទី ៣ លោក កៅ សេងហ៊ួ មានវ័យ ២២ ឆ្នាំ ដែលឆ្លុះបញ្ចាំងពីប្រវតិ្តរបស់ខ្លួន គឺជាភេទទី ៣ ដោយលោកប្រៀបធៀបពណ៌ច្រើនប្រភេទសុទ្ធតែមានសារៈសំខាន់នៅក្នុងបរិបទធម្មជាតិនៃពណ៌ ដោយមនុស្សច្រើនប្រភេទក៏សុទ្ធតែមានតម្លៃរៀងៗខ្លួនក្នុងបរិបទសង្គមមនុស្សឥឡូវ។
កៅ សេងហ៊ួ ក៏បានបង្ហើបឲ្យដឹងពីការត្រៀមខ្លួនក្នុងការប្រកួតអន្តរជាតិមានប្រទេសចូលរួម ១៤ ប្រទេស នៅទីក្រុងហុងកុង នោះថា៖ «ខ្ញុំនឹងយកវីដេអូដែលកាលប្រកួតនៅស្រុកខ្មែរមានពេល ៥ នាទី បន្ថែមឲ្យបាន ៦ នាទី ពេលប្រកួតនៅថ្ងៃទី ២៧ ខែ វិច្ឆិកា ឆ្នាំ ២០១៩ ខាងមុខ សម្រាប់បង្កើនគុណភាព និងសាច់រឿងឲ្យបានល្អបន្ថែមទៀត»។
ម្ចាស់ជយលាភីរូបនេះ ក៏ប្រាប់ពីអារម្មណ៍ខ្លួនថា៖ «ខ្ញុំសប្បាយចិត្តខ្លាំង ក្រោយពីទទួលបានជ័យជម្នះក្នុងប្រទេសរួចមក ហើយក៏ត្រូវបានក្លាយជាតំណាងឲ្យកម្ពុជាទៅប្រកួតលក្ខណៈអន្តរជាតិលើកដំបូងដែរ។ តែសម្រាប់មោទនភាព គឺខ្ញុំយល់ថា គេចាប់អារម្មណ៍ខ្លាំងពីមជ្ឈដ្ឋានទាំងក្នុងប្រទេសតាមរយៈគ្រូបង្រៀននៅសាលាដោយស្នាដៃនេះបានពិន្ទុខ្ពស់ជាងគេ និងឈ្នះនូវជយលាភីពីការប្រកួតឆ្នាំនេះ។ ថ្មីៗនេះ ក៏មានការចាប់អារម្មណ៍ពីអ្នករៀបចំការប្រកួតអន្តរជាតិផងដែរ ដោយគេយកវីដេអូខ្ញុំទៅវិភាគពីគុណតម្លៃក្នុងសហគមន៍ LGBT តែម្តង»។
កៅ សេងហ៊ួ ក៏បន្ថែមឲ្យដឹងពីអត្ថន័យក្នុងវីដេអូនៃរឿង «Colors» ផងដែរថា៖ «ខ្ញុំផលិតវីដេអូនេះក្នុងគោលបំណងជួយផ្តល់កម្លាំងចិត្តដល់អ្នកជាក្រុមសហគមន៍ LGBT ដែលកំពុងតែពុំទាន់ស្គាល់ខ្លួនឯងមិនច្បាស់ថា ជានរណានៅឡើយនោះ។ លើកទឹកចិត្តឲ្យពួកគាត់រៀនស្គាល់ខ្លួនឯងឲ្យច្បាស់ និងធ្វើអ្វីដែលជារបស់ខ្លួន និងជួយសង្គមជាតិ។ សម្រាប់ខ្ញុំផ្ទាល់វិញ ជារឿងដែលខ្ញុំបានជួបផ្ទាល់ក្នុងជីវិត និងចង់បង្ហាញអារម្មណ៍បុគ្គលដែលត្រូវគេរើសអើងនោះ គឺថាវាពិតជាពិបាកខ្លាំងណាស់»៕
