.jpg)
សាច់មាន់អាំងដោតចង្កាក់ ជាអាហារដ៏ពេញនិយមមួយនៅជប៉ុន។ រូបថត AFP
ក្រុងតូក្យូ៖ មិនយូរទេ ម្ហូបជប៉ុនសាច់មាន់ចង្កាក់ ជាអាហារឆ្ងាញ់ទាន់ចិត្ត ដែលប្រជាជនប្រទេសនេះនិយមទទួលទាន នឹងក្លាយជាជាអាហាររបស់អវកាសយានិក ខណៈពួកគេនឹងធ្វើដំណើរក្រឡឹងជុំវិញគន្លងផែនដី។ នេះបើយោងតាមការប្រកាសរបស់ទីភ្នាក់ងារអវកាសជប៉ុន។
សាច់មាន់អាំងប្រឡាក់គ្រឿងដោតចង្កាក់ដែលល្បីតាំងពីជប៉ុន ដល់ឯនាយសមុទ្រនឹងត្រូវបានច្រកកំប៉ុង ស្របតាមស្ដង់ដាម្ហូបនៅក្នុងយានអវកាស សម្រាប់ស្ថានីយអវកាសអន្តរជាតិនាពេលខាងមុខនេះ។
យោងតាមអ្នកនាំពាក្យទីភ្នាក់ងារស្រាវជ្រាវអវកាសជប៉ុន (JAXA) ថ្លែងកាលពីថ្ងៃពុធ សាច់មាន់ចង្កាក់ Yakitori ស្ថិតក្នុងបញ្ជីម្ហូបជប៉ុនទាំង ៣៤ មុខ រួមមាន បាយពូត មី ស៊ុបសារាយ និងត្រីសាបាក់ឆ្អិន ដែលទទួលបានវិញ្ញាបនបត្រជាម្ហូបជប៉ុនសម្រាប់បេសកកម្មអវកាស បន្ថែមពីលើអាហារមូលដ្ឋាន តាមការជ្រើសរើសដោយអង្គការ NASA។
សាច់មាន់ចង្កាក់ yakitori នឹងផ្ដល់ជូននូវ ២ រសជាតិ គឺរសជាតិទឹកស៊ីអ៊ីវ និងរសជាតិម្ទេសប្លោកបៃតង។
រូបតំណាង : អាកាសយានិកជប៉ុនក្រោយដំណើរត្រឡប់ពីអវកាស។ រូបថត AFP
ទោះបីជាអវកាសយានិកទំនងជាចង់ទទួលទានសាច់មាន់ជាប់ចង្កាក់ឫស្សី ដូចនៅលើផែនដីក្ដី ប៉ុន្តែគោលការណ៍សុវត្ថិភាពអវកាសមិនអនុញ្ញាតឲ្យមានចង្កាក់ឫស្សីឡើយ។
អ្នកនាំពាក្យ JAXA បានពន្យល់ថា៖ «ទោះជាការញ៉ាំសាច់មាន់ទាំងចង្កាក់ វាច្បាស់ជាឆ្ងាញ់ជាង ប៉ុន្តែនៅអវកាស យើងព្យាយាមកាត់បន្ថយសំរាមតាមតែអាចធ្វើទៅបាន»។
ដូច្នេះ មាន់ចង្កាក់នឹងត្រូវផ្ដល់ជូនដោយច្រកកំប៉ុង មានបច្ចេកវិទ្យាការពារកុំឲ្យវាអណ្ដែត ពេលទៅដល់បរិយាកាសសុញ្ញកាស។
ក្រុមហ៊ុន Hotei Foods ដែលជាអ្នកផលិតរំពឹងថា មាន់ចង្កាក់ដាក់កំប៉ុង នឹងបំពេញក្រពះអវកាសយានិកនៅឆ្នាំក្រោយ៕ AFP
