.jpg)
ជារៀងរាល់ព្រឹកថ្ងៃអាទិត្យ វិថីដ៏វែង និងធ្លាប់តែមមាញឹកនៅក្រុងហ្សាការតា បានបិទការធ្វើដំណើរដោយថយន្ត។ ភ្នំពេញ ប៉ុសិ៍្ត
ក្រុងហ្សាការតា៖ ផ្ដើមចេញពីបំណងកាត់បន្ថយការបំពុលបរិស្ថាន និងលើកកម្ពស់សុខភាពប្រជាពលរដ្ឋ ពេលនេះយុទ្ធនាការបិទផ្លូវហាមប្រាមរថយន្តបើកបរនៅវិថីដ៏អ៊ូអរមួយនៃទីក្រុងហ្សាការតានាថ្ងៃអាទិត្យ បានក្លាយជាទិដ្ឋភាពដ៏ទាក់ទាញមួយសម្រាប់ភ្ញៀវទេសចរមកកាន់ប្រទេសដែនកោះវប្បធម៌ចម្រុះមួយនេះ។
កាលពីខែកញ្ញា ឆ្នាំ ២០០៧ ទីក្រុងហ្សាការតា បានចាប់ផ្ដើមយុទ្ធនាការផ្លូវគ្មានរថយន្តដំបូងបង្អស់របស់ខ្លួន ដោយការបិទផ្លូវមួយកំណាត់ដ៏វែង ដើម្បីអនុញ្ញាតឲ្យថ្មើរជើង អ្នកជិះកង់ ឬយានជំនិះគ្មានផ្សែង ធ្វើដំណើរជាគុណប្រយោជន៍សុខភាព។
ការបិទផ្លូវធ្វើឡើងចាប់ពី Jalan Sudirman និង Jalan Thamrin ពីម៉ោង ៦ ព្រឹក ដល់ម៉ោង ១១ ព្រឹក ដើម្បីឲ្យពលរដ្ឋរីករាយនឹងការធ្វើដំណើរ ឬហាត់ប្រាណ។
នៅសប្ដាហ៍ទី ៤ នៃខែនីមួយៗ ចំនួនមនុស្សដើរ និងជិះកង់រឹតតែច្រើន។ រូបថត AFP
វិថីដែលធ្លាប់តែកកកុញដោយរថយន្តណែនណាន់តាន់តាប់ ត្រូវបានជំនួសដោយសកម្មភាពកីឡាយ៉ាងស្ងប់ស្ងាត់។
ដើមឡើយការបិទផ្លូវត្រូវបានធ្វើឡើងតែម្ដងគត់ក្នុង ១ ខែ ប៉ុន្តែចាប់តាំងពីឆ្នាំ ២០១២ យុទ្ធនាការវិថីគ្មានរថយន្ត បានធ្វើឡើងជារៀងរាល់ថ្ងៃអាទិត្យ ឆ្លើយតបនឹងការគាំទ្រដ៏ច្រើនពីប្រជាពលរដ្ឋនៅហ្សាការតា។
ទន្ទឹមនឹងនោះផងដែរ ទិដ្ឋភាពមានអ្នកលក់ដូរឥតសណ្ដាប់ធ្នាប់ នៅពេលបិទផ្លូវ ក៏ត្រូវបានលុបបំបាត់ដោយថ្មីៗនេះអភិបាលក្រុងហ្សាការតា បានកំណត់គោលដៅសម្រាប់លក់ដូរជាក់លាក់ ដើម្បីធានាឲ្យបាននូវសោភណភាពវិថីគ្មានយានជំនិះផ្សែង។
ទិដ្ឋភាពដ៏មមាញឹកនៃចរាចរណ៍នៃទីក្រុងហ្សាការតា ប្រទេស ឥណ្ឌូនេស៊ី។ រូបថត AFP
ជារៀងរាល់ព្រឹកថ្ងៃអាទិត្យ ពលរដ្ឋហ្សាការតា តែងតែរូតរះក្រោកពីព្រលឹម ដើម្បីទទួលបានបទពិសោធធ្វើដំណើរប្រកបដោយផាសុកភាព តាមរយៈការដើរ រត់កីឡា ជិះកង់ ជិះស្គី និងរុញរទេះកូនតូចជាដើម។
ភាពផ្ទុយគ្នារវាងទិដ្ឋភាពទីក្រុងដែលមានពលរដ្ឋជាង ១០ លាននាក់ ដ៏សែនមមាញឹក ប្រែមកជាវិថីកីឡាបែបស្ងប់ស្ងាត់ បានក្លាយជាប្រពៃណីមួយនៃអ្នកទីក្រុងឥណ្ឌូនេស៊ីមួយនេះ ក៏ដូចជាភាពពិសេសមួយក្នុងការទាក់ទាញទេសចរឲ្យមកទទួលបទពិសោធនេះផងដែរ៕
