ភ្នំពេញៈ ទីបំផុតបេក្ខនារីជាចុងភៅមកពីភោជនីយដ្ឋាន Topaz កញ្ញា បូ ណារិននី បានទទួលជ័យជម្នះពីការប្រកួតជ្រើសរើសចុងភៅឆ្នើមវ័យក្មេងលើកដំបូងនៅឆ្នាំ ២០១៩ ឬ Young Chef Talent Competitions Service 2019 ខណៈការប្រកួតធ្វើនៅថ្ងៃទី ៨ ខែ មិថុនា ឆ្នាំ ២០១៩ កន្លងមកដោយមានបេក្ខជន-បេក្ខនារីចូលរួមប្រកួតមានចំនួន ៧ រូប មកពីភោជនីយដ្ឋាន និងសណ្ឋាគារចំនួន ៤ នៅរាជធានីភ្នំពេញក្នុងភោជនីយដ្ឋានខេមានៅមហាវិថីព្រះនរោត្តម។
កញ្ញា បូ ណារិននី បានក្លាយជាម្ចាស់ជយលាភីនៃការប្រកួតជ្រើសរើសអ្នកមានទេពកោសល្យវ័យក្មេងថ្នាក់ជាតិផ្នែកសិល្បៈបម្រើម្ហូបអាហារតាមតុដែលធ្វើឡើងនៅថ្ងៃទី ៨ ខែ មិថុនា ឆ្នាំ ២០១៩ នៅភោជនីយដ្ឋានខេមានៅមហាវិថីព្រះនរោត្តមនឹងធ្វើការប្រកួតម្តងទៀតថ្នាក់អាស៊ាននៅទីក្រុងហុងកុង ប្រទេសចិន នៅខែវិចិ្ឆកា ឆ្នាំ ២០១៩ ខាងមុខនេះ។
កញ្ញា ហន រស្មី អ្នកសម្របសម្រួលផ្នែកទំនាក់ទំនងព័ត៌មាននៃសមាគមភោជនីយដ្ឋានកម្ពុជាបង្ហើបឲ្យដឹងពីចំនួនបេក្ខជនចូលរួមក្នុងការប្រកួតនេះថា៖ «ការប្រកួតនេះ យើងបានចម្រាញ់យកម្ចាស់ជយលាភីតែម្នាក់ទេ ខណៈមានបេក្ខជន-បេក្ខនារីចូលរួមប្រកួតចំនួន ៧ រូបដោយក្នុងនោះមានប្រុស ៤ រូប និងស្រី ៣ រូប ដែលមកពីភោជនីយដ្ឋាន និងសណ្ឋាគារចំនួន ៤ មានភោជនីយដ្ឋានតូប៉ាហ្ស (Topaz) ភោជនីយដ្ឋានខេមាសណ្ឋាគារសូហ្វីតែល និងសណ្ឋាគាររ៉ាហ្វល់ឡឺរ៉ូយ៉ាល់ (Raffle Le Royal) នៅក្នុងរាជធានីភ្នំពេញ»។
កញ្ញា ហន រស្មី បន្តឲ្យដឹងថា៖ «អ្នកឈ្នះការប្រកួតនេះទទួលបានពាន ១ វិញ្ញាបនបត្រ ១ និងរង្វាន់សម្រាប់ការឈ្នះនេះដែរគឺនឹងមានឱកាសចូលរួមការប្រកួតចុងភៅថ្នាក់តំបន់អាស៊ាននៅទីក្រុងហុងកុង ប្រទេសចិននៅខែវិច្ឆិកាខាងមុខ។ យើងមិនមានរង្វាន់ជាប្រាក់ឡើយ សម្រាប់បេក្ខជនជយលាភី ដោយយើងចាត់ទុកការបញ្ចូនគាត់ឲ្យទៅប្រកួតលក្ខណៈអន្តរជាតិនោះគឺជាប្រាក់រង្វាន់»។
ដោយសារចង់រកបេក្ខជនដែលមានទេពកោសល្យ និងមានជំនាញសិល្បៈផ្នែកចម្អិនម្ហូបអាហារសេវាកម្មនោះ សមាគមមេចុងភៅកម្ពុជាសហការជាមួយនឹងសមាគមភោជនីយដ្ឋានកម្ពុជាបានរៀបចំការប្រកួតជ្រើសរើសចុងភៅឆ្នើមវ័យក្មេងជាលើកដំបូងប្រចាំឆ្នាំ ២០១៩ ខណៈការប្រកួតបានរៀបចំឡើងនៅភោជនីយដ្ឋានខេមានៃមហាវិថីនរោត្តម។
ទោះបីដំណើរការលើកដំបូងមែនក្តី បើតាមស្តាប់ពីឆន្ទៈ និងស្មារតីនៃសមាគមទាំង ២ គឺទំនងជានឹងត្រូវមានការរៀបចំប្រកួតជ្រើសរើសចុងភៅឆ្នើមវ័យក្មេងនេះ មានលក្ខណៈប្រចាំហើយលទ្ធផលចុងក្រោយគឺត្រូវចម្រាញ់យកជយលាភីតែ ១ រូប។
លោក រីឆាត ហ្គីឡេត ជាប្រធានសមាគមមេចុងភៅកម្ពុជាធ្លាប់បានឲ្យដឹងពីគោលបំណងនៃការប្រកួតថា នេះគឺជាការរៀបចំលើកដំបូងដោយចង់ផ្សព្វផ្សាយក៏ដូចជា ចង់បើកឱកាសទូលាយសម្រាប់ក្រុមបេក្ខជន ជាពិសេសអ្នកមានចំណូលចិត្ត និងជំនាញចម្អិនម្ហូបអាហារទើបខាងសមាគមមេចុងភៅកម្ពុជាដែលបានសហការជាមួយសមាគមភោជនីយដ្ឋានកម្ពុជារៀបចំឡើង ដើម្បីចែករំលែកដល់បេក្ខជនមានជំនាញខាងចុងភៅ៕