.jpg)
លោកតា សាន់តា ក្លូស ចាក់វ៉ាក់សាំងផ្ដាសាយធំ។ AFP
ក្រុងហែលស៊ីនគី: លោកតា សាន់តា ក្លូស បានត្រៀមខ្លួនរួចជាស្រេច សម្រាប់បម្រើការងារនៅរដូវគ្រិស្តស្មាស់ដ៏រងាញ័រញាក់ ឯតំបន់ខាងជើង លេបលេន (Lapland) ។
ដើម្បីរក្សាសុខភាព សាន់តា ក្លូស តាំងពីខែវិច្ឆិកា ត្រូវបានតម្រូវឲ្យចាក់ថ្នាំវ៉ាក់សាំងគ្រុនផ្ដាសាយ នៅតំបន់ដ៏ត្រជាក់បំផុតនៃប្រទេសហ្វាំងឡង់។
អ្នកគ្រូពេទ្យ Tiia Kahkonen គឺជាអ្នកផ្ដល់សេវាកម្មចាក់ថ្នាំវ៉ាក់សាំង anti-influenza ដល់ក្រុមលោកតា សាន់តា ក្លូស នៅភូមិ សាន់តា ក្លូស ក្រុង Rovaniemi ភាគខាងជើងហ្វាំងឡង់ក្នុងរង្វង់មហាសមុទ្រទឹកកកអាក់ទិក។
ការចាក់ថ្នាំបង្ការផ្ដាសាយធំ ជួយធានាឲ្យបាននូវសុខភាពល្អដល់បុគ្គលិកកបម្រើការជាលោកតា សាន់តា ក្លូស អំឡុងរដូវកាលគ្រិស្តស្មាស់ដ៏មមាញឹកប្រចាំឆ្នាំ។
កាលពីខែធ្នូ ឆ្នាំមុន តំបន់ លេបលេន បានទទួលភ្ញៀវទេសចរបរទេស ៣៩ ម៉ឺននាក់ ដែលមានកំណើន ១០ ភាគរយបើធៀបទៅនឹងរដូវបុណ្យគ្រិស្តស្មាស់ឆ្នាំមុន។
យោងតាមទិន្នន័យផ្លូវការ ភ្ញៀវទេសចរជាក្រុមធំៗ ដែលបានមកដល់ភូមិ សាន់តា ក្លូស នៅប្រទេសហ្វាំងឡង់ ភាគច្រើនជាជនជាតិអង់គ្លេស រុស្ស៊ី បារាំង និងអាល្លឺម៉ង់។
នៅអំឡុងពេលនេះផងដែរ ទីភ្នាក់ងារផ្ដល់ធនធានមនុស្ស បានព្យាយាមស្វែងរកបុគ្គលិកបម្រើការជា សាន់តា ក្លូស នៅតំបន់ លេបលេន ក្នុងរង្វង់មហាសមុទ្រអាកទិក ដើម្បីបំពេញតម្រូវការភ្ញៀវទេសចរនៅរដូវធ្លាក់ទឹកកកចុងឆ្នាំ។
អ្នកដែលប្រាថ្នាក្លាយខ្លួនជា សាន់តា ក្លូស អាជីពត្រូវមានជំនាញផ្នែកបដិសណ្ឋារកិច្ច ទំនាក់ទំនង និងរាងកាយមាំមួនអាចស៊ូទ្រាំនឹងអាកាសធាតុក្រោមសូន្យ រហូតដល់ -៤០ អង្សារក៏មាន៕
