.jpg)
ស្នាដៃគំនូរលោក វ៉ាន់ ឆវ័ន្ត ឈ្មោះថា «End of Illusions»។ រូបថត សហការី
ភ្នំពេញ៖ ខណៈពេលសម្រាកនៅផ្ទះរៀងៗខ្លួន ក្នុងគ្រាបង្ការការឆ្លងជំងឺកូវីដ ១៩ នោះ វិចិត្រករអតីតជាសិស្សរៀនសិល្បៈគំនូរនៅសាលាហ្វារពន្លឺសិល្បៈ ខេត្តបាត់ដំបង ២ រូប ក៏បានឆ្លៀតបង្កើតស្នាដៃវិចិត្រកម្មខ្លួន ដើម្បីត្រៀមតាំងពិព័រណ៍នៅវិចិត្រសាល Factory Phnom Penh នាដើមខែកក្កដា ឆ្នាំ ២០២១ នៅភ្នំពេញ។
នេះបើតាមការបង្ហើបពីកញ្ញា ឡូរ៉េន អ៊ិអ៊ីដា ជាអ្នកសម្របសម្រួលរៀបចំពិព័រណ៍ និងស្ថាបនិក Open Studio Cambodia បង្ហើបឱ្យដឹងពីគម្រោងរៀបចំការតាំងពិព័រណ៍របស់វិចិត្រករ វ៉ាន់ ឆវ័ន្ត និងវិចិត្រករ ហួរ សីហា។
ស្នាដៃគំនូរលោក វ៉ាន់ ឆវ័ន្ត ឈ្មោះថា «My Ox Life» ។ រូបថត សហការី
កញ្ញា ឡូរ៉េន អ៊ិអ៊ីដា បានបង្ហើបឱ្យដឹងថា៖ «ប្រសិនបើមិនមានការប្រែប្រួលដោយសារបញ្ហាកូវីដ ១៩ ទេនោះ ការតាំងពិព័រណ៍ស្នាដៃរបស់វិចិត្រករ វ៉ាន់ ឆវ័ន្ត និងវិចិត្រករ ហួរ សីហា នឹងចាប់ផ្តើមបើកនៅថ្ងៃទី ៣ ខែ កក្កដា ឆ្នាំ ២០២១ ខាងមុខនេះហើយ ខណៈការដំឡើងស្នាដៃរបស់ពួកគេនឹងចាប់ផ្តើមធ្វើថ្ងៃទី ១ ខែកក្កដា។ លោក ហួរ សីហា បច្ចុប្បន្នជាសមាជិកនៃក្រុមវិចិត្រករនៅវិចិត្រសាលរំចេក ៥ គាត់នឹងមានស្នាដៃគំនូរសម្រាប់ការតាំងពិព័រណ៍នោះ ខណៈលោក វ៉ាន់ ឆវ័ន្ត ជាសហតំណាងក្រុមវិចិត្រករនៅវិចិត្រសាលរំចេក ៥ និងជាវិចិត្រករនៅវិចិត្រសាល Open Studio Cambodia គាត់មានស្នាដៃគំនូរផង និងស្នាដៃច្នៃពីឈើផង ដើម្បីចូលរួមតាំងពិព័រណ៍នោះ»។
លោក វ៉ាន់ ឆវ័ន្ត ជាវិចិត្រករជំនាញគំនូរ និងចម្លាក់ឈើនៅភូមិព្រែកកញ្រែ្ចង ឃុំព្រែកនរិន្ទ ស្រុកឯកភ្នំ ខេត្តបាត់ដំបង និងអតីតជានិស្សិតរៀនជំនាញសិល្បៈសូនរូបនៅសាលាហ្វារពន្លឺសិល្បៈ ខេត្តបាត់ដំបង នៅឆ្នាំសិក្សា ២០០៧-២០១១។
វិចិត្រករ វ៉ាន់ ឆវ័ន្ត ក៏មានឈាមជ័រសិល្បៈគំនូរផងដែរពីឪពុក គឺអតីតជាជាងគំនូរ។ ជំនាញសិល្បៈគំនូរលោកបានរៀនពីសាលាហ្វារពន្លឺសិល្បៈ ខណៈជំនាញចម្លាក់ឈើមិនមានសាលាឡើយ គឺគ្រាន់តែរៀនចេះពីការមើលឃើញ និងការអនុវត្តផ្ទាល់ដោយខ្លួនឯងតែប៉ុណ្ណោះ។ បច្ចុប្បន្នការបង្កើតស្នាដៃសិល្បៈ លោក វ៉ាន់ ឆវ័ន្ត ហាក់ដូចជាមានភាពសកម្មខ្លាំងទៅលើជំនាញគ្មានសាលាជាងគំនូរទៅវិញ។
វិចិត្រករ ហួរ សីហា វ័យ ៣១ ឆ្នាំ កើតនៅជំរំសាយប៊ី នៅឯតំបន់ព្រំដែនខ្មែរ-ថៃ ដល់ត្រឹមវ័យ ៦ ខែ ក៏ត្រូវបានឪពុកម្តាយយកមករស់នៅជាមួយវិញ ក្នុងតំបន់បន្ទាយទាហាន ដោយឪពុកលោកប្រចាំការរហូតពេញវ័យ និងបែកពីឪពុកម្តាយនៅក្នុងឆ្នាំ ២០០៥ និងមករៀនជំនាញសិល្បៈនៅឆ្នាំ ២០០៦ និងបានបញ្ចប់ឆ្នាំ ២០១៣ ជំនាញសិល្បៈសូនរូបនៅសាលាហ្វារពន្លឺសិល្បៈ ខេត្តបាត់ដំបង។
លោក ហូរ សីហា ចូលចិត្តគូរគំនូរបែបរូបី គំនូរដូចៗរូបពិត និងការបង្កើតស្នាដៃគំនូរបែបសហសម័យផងដែរ៕
ស្នាដៃគំនូរលោក វ៉ាន់ ឆវ័ន្ត ឈ្មោះថា «End of Illusions»។ រូបថត សហការី
