ខេត្តព្រៃវែង៖ បើទោះបីជាមុខរបរច្នៃសម្បកកង់ឡានធ្វើជាកៅអី តុឈុត ផើងផ្កា រូបសត្វសេក កង្កែប និងសត្វផ្សេងៗ លក់យកប្រាក់កម្រៃ ដើម្បីចិញ្ចឹមជីវិតគ្រួសារតាមសម្មាអាជីវោ នៅតែមានតក់ៗមែនក្តី តែដោយសារបច្ចុប្បន្នស្ថានភាពស្រុកទេសកំពុងតែមានវិបត្តិគ្រប់យ៉ាង ដោយសារមេរោគកូរ៉ូណាឬកូវីដ ១៩ នោះ ស្រាប់តែសិប្បករលោក សឿង សួគ៌ា បាននឹកឃើញច្នៃសម្បកកង់ឡាន និងម៉ូតូ មកធ្វើជាផើងសម្រាប់ដាំបន្លែបន្លុក ជាតម្រូវការលក្ខណៈគ្រួសារយ៉ាងទំនង ហើយចំណាយអស់លុយតិចទៀតផង។
ស្របពេលតំបន់នានាទាំងក្នុងក្រុង និងខេត្ត ត្រូវរដ្ឋាភិបាលជូនដំណឹងថា មិនតម្រូវឲ្យប្រជាជននៃក្រុមគ្រួសារមានការជួបជុំគ្នាច្រើននាក់ដែលបង្កើតភាពងាយស្រួលឆ្លងជំងឺផ្លវដង្ហើមកូវីដ ១៩ ឬត្រូវរក្សាការរស់នៅក្នុងស្ថានភាពដាច់ដោយឡែកពីគ្នា ឬរក្សាគម្លាតពីគ្នានៃសមាជិកក្រុមគ្រួសាររៀងៗខ្លួនប្រកបដោយអនាម័យគ្រប់ពេល។ ដូច្នេះមានសមាជិកគ្រួសារខ្លះអាចនឹងមានភាពធុញទ្រាន់នឹទង្វើបែបនេះ ព្រោះមិនទាន់ស៊ាំ។
ជាក់ស្តែងសិប្បករមានមុខរបរច្នៃសម្បកកង់ឡាន ធ្វើជាកៅអី តុឈុត ផើងផ្កា រូបសត្វសេក កង្កែប និងសត្វផ្សេងៗ ដើម្បីលក់យកប្រាក់កម្រៃចិញ្ចឹមជីវិត គ្រួសាររស់នៅឯភូមិព្រៃស្នៀតខាងជើង ឃុំព្រៃស្នៀត ស្រុកពារាំង ខេត្តព្រៃវែង បានចាប់ផ្តើមធ្វើការងារកសិកម្មខ្នាតតូចជាលក្ខណៈគ្រួសារច្នៃផើងពីសម្បកកង់ឡាន និងម៉ូតូ មកធ្វើជាថ្នាលដាំដំណាំបន្លែបន្លុក នៅខាងក្រោយផ្ទះមាន បន្លែស្ពៃ សាលាដ ខាត់ណា ត្រកួន ផ្ទី សណ្តែកកួរ ជាដើម ក្រៅពីការប្រកបរបរប្រចាំថ្ងៃជាចម្បងនៅផ្ទះ។
លោក សឿង សួគ៌ា ដែលសម្រេចចិត្តលាឈប់ពីការងារជំនាញរៀនចប់ផ្នែកបរិញ្ញាបត្រគណនេយ្យ គឺធ្វើជាមន្ត្រីឥណទាននៅក្នុងគ្រឹះស្ថានមីក្រូហិរញ្ញវត្ថុមួយចំនួន ៨ ឆ្នាំ មកក៏ចាប់ផ្តើមរបរជាសិប្បករច្នៃសម្បកកង់ឡាន ធ្វើជាកៅអី តុឈុត ផើងផ្កា រូបសត្វសេក កង្កែប និងសត្វផ្សេងៗទៀត លក់យកប្រាក់កម្រៃចិញ្ចឹមជីវិតគ្រួសារគួបផ្សំនឹងរបររបស់ភរិយាបង្ហើបរឿងច្នៃផើងដាំបន្លែនោះថា៖ «ដោយសារគិតថា រឿងវិបតិ្តសេដ្ឋកិច្ចពីជំងឺកូវីដ ១៩ មិនដឹងត្រូវចប់ពេលណា ហើយការសំងំនៅផ្ទះអាចនឹងមានការអផ្សុក មិនហ៊ានចេញក្រៅព្រោះខ្លាចជំងឺនេះ ទើបខ្ញុំច្នៃសម្បកកង់ឡាន ឬម៉ូតូ ធ្វើជាផើងដាក់ដីដាំបន្លែនានា តាមតម្រូវការសម្រាប់ធ្វើជាម្ហូបអាហារប្រចាំថ្ងៃ ដែលអាចជួយឲ្យយើងបាត់ភាពអផ្សុកផង និងអាចជួយសម្រួលជីវភាពនៃការចេញទៅទិញបន្លែពីផ្សារផង។ នាពេលនេះខ្ញុំបានច្នៃ និងចាប់ផ្តើម ដាំបន្លែបន្លុកច្រើនមុខមានប្រមាណជាង ៣០ ផើងនៅផ្ទះខ្លួនឯង។ ហើយការធ្វើផើងដាំបន្លែនេះ ក៏មានអ្នកចង់បានកុម្ម៉ង់ទិញពីខ្ញុំផងដែរ»។
លោក សឿង សួគ៌ា ក៏បង្ហើបពីតម្លៃផើងដាំបន្លែច្នៃពីសម្បកកង់ឡាន និងម៉ូតូដែរថា៖ «ប្រសិនបើបងប្អូនចង់កុម្ម៉ង់ទិញផើងទាំងនេះ ខ្ញុំក៏អាចច្នៃជូនតាមតម្រូវការបាន។ សម្រាប់ផើងនេះ អាចមាន ២ ជម្រើស គឺផើងធម្មតាមិនមានការលាបថ្នាំពណ៌ និងផើងលាបថ្នាំពណ៌។ ផើងធម្មតា ១ លក់តម្លៃចន្លោះ ២,៥ ដុល្លារ ទៅ ៣ ដុល្លារ ខណៈផើងលាបពណ៌ ១ តម្លៃចន្លោះ ៣,៥ ដុល្លារ ទៅ ៥ ដុល្លារ។ ក្រៅពីនេះក៏មានផើងច្នៃពីសម្បកកង់ម៉ូតូ ងាយស្រួលសម្រាប់ដាំបន្លែមានឬសចាក់រាក់ៗដែរ ដោយ ផើងមានតម្លៃចន្លោះពី ១, ៥ ដុល្លារ ទៅ ២ ដុល្លារ»។ សម្រាប់ការកុម្ម៉ង់ច្នៃកៅអី តុ ឬរបស់ផ្សេងៗច្នៃពីសម្បកកង់ឡាន ម៉ូតូ និងផើងដាំបន្លែអាចទាក់ទងតាមទូរស័ព្ទ 097 83 31 645 ឬ 087 872 778៕