.jpg)
តារាចម្រៀងស្រី ជ្រកទ្រនំហង្សមាស សុខ ស្រីនាង បង្ហើបរឿងនឹកស្ទីលខ្លួនកាលពី ១៥ ឆ្នាំ។ ហ្វេសប៊ុក
ភ្នំពេញ៖ តារាស្រីដែលរូបឆោមលោមពណ៌កាន់តែល្អស្រស់ស្អាត រាងស្រលូន អ្នកមេម៉ាយវ័យក្មេងសាច់សខ្ចីល្វក់ដូចពងមាន់បក ប្រចាំផលិតកម្មហង្សមាស អ្នកនាង សុខ ស្រីនាង ស្រាប់តែបង្ហើបរឿងនឹកអាឡោះអាល័យទៅដល់ស្ទីលតុបតែងកាយរបស់ខ្លួនកាលពីអតីតកាល រំលង ១ ទសវត្សរ៍កន្លះមុន បង្កើតការភ្ញាក់ផ្អើលយ៉ាងខ្លាំងពីប្រិយមិត្តគាំទ្រ។
ក្រោយពីបានដូរទ្រនំចាស់ផលិតកម្មសាន់ដេ មកទ្រនំថ្មីហង្សមាសមិនបានប៉ុន្មានឆ្នាំផង តារាចម្រៀង និងសម្តែងស្រី រាងស្រលូន សម្ផស្សកាន់តែផូរផង់ អ្នកមេម៉ាយវ័យក្មេង សុខ ស្រីនាង កំពុងតែមានរាសីឡើងក្រឺតៗ ត្រូវផលិតកម្មថ្មីផ្តល់កាដូលើកទឹកចិត្តជាហូរហែ មានឱកាសជាតួឯកកុន និងចុងក្រោយនេះ ក្លាយជាគណៈកម្មការនៃកម្មវិធីប្រឡងចម្រៀងថ្មីរបស់កុមារ Cambodian Idol Junior រដូវកាលទី១ ទៀតផង។
តារាចម្រៀង និងសម្តែងស្រី សម្រស់មិនស្រុតតាមវ័យរូបនេះ បានបង្ហាញអារម្មណ៍ខ្លួនមានការនឹកនាទៅដល់អតីតកាល ដោយសរសេរសារថា៖ «វិលត្រឡប់ទៅរកស្ទីលកាលពី ១៥ ឆ្នាំមុន ប៉ុន្តែខុសត្រង់មិនមានសក់សេះ រីករាយដែលបានរួមការងារជាមួយនឹងបងជាថ្មីម្ដងទៀត!»។
រំពេចនោះ ក៏មានការងឿងឆ្ងល់ដែរថា តើហេតុអ្វីបានជាអ្នកមេម៉ាយ សុខ ស្រីនាង បានបង្ហើរពីអារម្មណ៍នឹកអាល័យរឿងខ្លួនកាលពី ១៥ ឆ្នាំ មុន ឬតារាស្រីរូបនេះ មានវិបត្តិអ្វីក្នុងចិត្តទេដឹងក្រោយពីបានមកចូលនៅក្នុងសមាជិកនៃទ្រនំថ្មីហង្សមាសនោះ?
ទោះបីជាយ៉ាងណាអារម្មណ៍រឭកពីអតីតកាលដែលរំលងជាង ១ ទសវត្សរ៍កន្លះទៅហើយនោះ មិនត្រូវបានអ្នកមេម៉ាយវ័យក្មេង តែសម្រស់ស្រស់សោភា ក្រមុំសុំខ្មាសអ្នកនាង សុខ ស្រីនាង បកស្រាយឡើយ ដោយសារប្រព័ន្ធទូរស័ព្ទដែលធ្លាប់ទំនាក់ទំនងពីមុននោះ មិនអាចទាក់ទងបាននៅពេលនេះ។
បើងាកមើលពីបច្ចុប្បន្នភាពរបស់ សុខ ស្រីនាង វិញគេអាចនិយាយបានថា តារាចម្រៀងស្រីរូបនេះ ពិតជាមានលក្ខណសម្បត្តិមិនអន់ឡើយ ទើបត្រូវបានខាងផលិតកម្មហង្សមាសសម្រេចចិត្តជ្រើសយកនាងមកធ្វើជាគណៈកម្មការផ្តល់ពិន្ទុនៃកម្មវិធីប្រឡងប្រជែងចម្រៀងលំដាប់ពិភពលោកដ៏ថ្មីសន្លាង និងជាការចាប់ផ្តើមរដូវកាលទី១ សម្រាប់កម្ពុជាគឺ Cambodian Idol Junior ខណៈគណៈកម្មការ ២ រូបទៀតគឺតារាចម្រៀងជើងចាស់ហង្សមាសលោក ព្រាប សុវត្ថិ និង លោក ឆន សុវណ្ណរាជ៕
