ភ្នំពេញៈ ជាមជ្ឈមណ្ឌលបណ្តុះបណ្តាលនិស្សិតសិក្សាផ្នែកព័ត៌មានវិទ្យាមួយនៅកម្ពុជា អង្គការ Passerelles Numeriques Cambodia ហៅកាត់ថា PNC បានបណ្តុះបណ្តាលនិស្សិតក្រីក្រមកពីបណ្តាខេត្ត-ក្រុងទាំងអស់ចំនួន ១ ៤៣៧ នាក់ដែលក្នុងនោះ ៥០ ភាគរយ គឺជានិស្សិតស្រី។
PNC គឺជាអង្គការអន្តរជាតិមួយរបស់ប្រទេសបារាំងដែលបានបង្កើតឡើងនៅឆ្នាំ ២០០៥ ក្នុងគោលដៅរួមចំណែកផ្តល់ឱកាសដល់យុវជនកម្ពុជាក្រីក្រឲ្យសិក្សាថ្នាក់បរិញ្ញាបត្ររង ផ្នែកព័ត៌មានវិទ្យារយៈពេល ២ ឆ្នាំ ដោយឥតគិតថ្លៃ ។ បច្ចុប្បន្ននេះអង្គការបានប្រតិបត្តិការនៅប្រទេស កម្ពុជា វៀតណាម និងហ្វីលីពីន។
លោក រុន សារឹម ប្រធានទំនាក់ទំនង និងកៀរគរមូលនិធិរបស់អង្គការ PNC បានបញ្ជាក់ថា៖ «PNC បណ្តុះបណ្តាលសិស្ស ១ ៤៣៧ នាក់គឺមកពីគ្រួសារ ១ ៤៣៧ អ៊ីចឹងមួយគ្រួសារម្នាក់ឲ្យពួកគេបានចប់ពេញលេញ ហើយបានទទួលបានការងារធ្វើគ្រប់គ្នា អ៊ីចឹងពួកគេអាចជួយសម្រួលបន្ទុកជីវភាពគ្រួសារបាន ហើយបានចូលរួមចំណែកក្នុងការអភិវឌ្ឍនូវផ្នែកព័ត៌មានវិទ្យានៅក្នុងប្រទេសកម្ពុជាក៏ដូចជា ផ្លាស់ប្តូរ និងធ្វើឲ្យប្រសើរឡើងក្នុងការអភិវឌ្ឍសេដ្ឋកិច្ចជាតិផងដែរ»។
ឈរលើគោលការណ៍តម្លាភាព ស្មើភាព និងយុត្តិធម៌សម្រាប់ការជ្រើសរើសនិស្សិតឲ្យចូលសិក្សាដោយឆ្លងកាត់ ៤ ដំណាក់កាល។ ទី១ បុគ្គលិករបស់អង្គការ PNC ចុះទៅដល់សាលារៀន និងសហគមន៍តាមតំបន់គោលដៅ ដើម្បីធ្វើបទបង្ហាញពីអាហារូបករណ៍ទៅដល់សិស្ស និងពន្យល់ពួកគេឲ្យយល់ដឹងពីអ្វីដែលហៅថាជំនាញ IT។ សិស្ស និស្សិតដែលមានចំណាប់អារម្មណ៍ និងចង់សិក្សាអាចដាក់ពាក្យក្រោមការពន្យល់ពីលក្ខខណ្ឌផ្សេងៗពីក្រុមការងាររបស់ PNC ។
និស្សិតដែលអាចដាក់ពាក្យរៀននៅ PNC បានត្រូវតែជានិស្សិតក្រីក្រដែលរៀនចប់ថ្នាក់ទី ១២ ទោះបីជាជាប់ ឬក៏ធ្លាក់ និងត្រូវមានអាយុតិចជាង ២៤ ឆ្នាំ ។
ទី២ និស្សិតដែលបានដាក់ពាក្យរួចរាល់ ពួកគេនឹងត្រូវធ្វើការប្រឡងលើមុខវិជ្ជា តក្កវិជ្ជា គណិតវិទ្យា និងភាសាអង់គ្លេស ដើម្បីស្ទាបស្ទង់លទ្ធភាពក្នុងការសិក្សាជំនាញ IT នេះ។
ទី៣ និស្សិត នឹងត្រូវធ្វើការសម្ភាសភ្លាម បន្ទាប់ពីចេញលទ្ធផល។ PNC នឹងធ្វើការសួរសំណួរពីការតាំងចិត្ត និងការតស៊ូរបស់និស្សិតដោយត្រូវគោរពតាមគោលការណ៍របស់សាលារួមមាន ការស្នាក់នៅ ការសិក្សា និងវិន័យ ។
ទី៤ គឺការអង្កេតដល់ផ្ទះនិស្សិត ថតរូបទីតាំងផ្ទាល់ក៏ដូចជា សាកសួរព័ត៌មានទាក់ទងនឹងជីវភាពរបស់ពួកគេដើម្បីឲ្យប្រាកដថា សិស្ស និស្សិតទាំងនោះពិតជាក្រីក្រពិតមែន។
និស្សិតដែលត្រូវបានជ្រើសរើសនឹងទទួលបានការបណ្ដុះបណ្ដាលពីអង្គការ PNC នៅអគារផ្ទាល់ខ្លួនចំនួន ១ ខ្នងមានបន្ទប់កុំព្យូទ័រចំនួន ៦ និងបន្ទប់បង្រៀនទ្រឹស្តីចំនួន ៧ ដោយបង្រៀនលើមុខវិជ្ជា ២ ធំៗ គឺការគ្រប់គ្រងបណ្តាញប្រព័ន្ធណេតវើក (system network administration) និងទី ២ ជំនាញសរសេរកម្មវិធី (Web programming) ដែលត្រូវសិក្សាពេញមួយថ្ងៃពីថ្ងៃចន្ទ ដល់ថ្ងៃសុក្រ។
ក្រៅពីជំនាញស្នូល និស្សិត ក៏នឹងបានសិក្សាជំនាញបន្ថែមដូចជា ភាសាអង់គ្លេស និងជំនាញទន់ជាដើមក្នុងគោលបំណងដុសខាត់សមត្ថភាព ពួកគេបន្ថែមទៀត។
យុវតី ដួង តារា មកពីខេត្តសៀមរាបសិក្សាជំនាញ Web Programming បានឲ្យដឹងថា៖ «ខ្ញុំមានអារម្មណ៍ថាកក់ក្តៅដោយសារគេផ្តល់អាហារូបករណ៍ឲ្យទាំងការស្នាក់នៅ ប្រាក់ឧបត្ថម្ភ និងការញ៉ាំ ហើយគ្រូនៅទីនេះ យកចិត្តទុកដាក់ក្នុងការបង្រៀន ហើយធ្វើឲ្យខ្ញុំមានអារម្មណ៍ដូចជា គ្រួសារខ្ញុំអ៊ីចឹង។ មិត្តភក្តិវិញគឺកាន់តែល្អ ព្រោះយើងយល់អារម្មណ៍ឆ្ងាយផ្ទះដូចគ្នាយើងរាប់អានគ្នា ជួយគ្នា បើចេះអី យើងស៊ែរ (ចែករំលែក) នេះស៊ែរនោះ»។
ចំណែក កញ្ញា ស ស្រីអែម មកពីខេត្តរតនគិរីសិក្សាផ្នែក Developer បានបញ្ជាក់ថា កន្លងមកមានមនុស្សមួយចំនួននិយាយថា មនុស្សស្រីមិនអាចរៀន IT បាននោះទេ តែកញ្ញាបានតាំងចិត្តថា នឹងតស៊ូជម្នះពាក្យនេះឲ្យបាន។
អ្នកគ្រូ ចច សាវឿន បង្រៀនជំនាញបណ្តាញប្រព័ន្ធកុំព្យូទ័របញ្ជាក់ថា «មនុស្សស្រីស្រឡាញ់ IT កុំខ្លាច យើងស្រឡាញ់អី យើងរៀនវាទៅ។ IT មិនមែនសម្រាប់តែមនុស្សប្រុសនោះទេ ស្រីក៏រៀនបានដែរ»។
ទន្ទឹមនឹងនេះអ្នកគ្រូក៏បានរៀបរាប់អំពីគន្លឹះនៃការបង្រៀនថា ព័ត៌មានវិទ្យាគឺជាមុខវិជ្ជាថ្មីសម្រាប់កម្ពុជាដូចនេះដំបូងអ្នកគ្រូត្រូវពន្យល់ឲ្យសិស្សស្គាល់ថា អ្វីជាព័ត៌មានវិទ្យា ? បន្ទាប់មកអ្នកគ្រូតម្រូវឲ្យសិស្សអនុវត្តឲ្យបានច្រើន ជាពិសេសត្រូវពន្យល់ពាក្យគន្លឹះឲ្យសិស្សស្គាល់ យល់ និងដាក់ការងារធ្វើជាក្រុម ព្រមទាំងមាន Project ចុងឆ្នាំសម្រាប់និស្សិតជាដើម។
ជាមួយនឹងភាពជោគជ័យក្នុងការបណ្តុះបណ្តាលសិស្សក្រីក្រនៅកម្ពុជាលោក សារឹម បញ្ជាក់ថាអង្គការ PNC ក៏បានជួបប្រទះនឹងបញ្ហាមួយចំនួនផងដែរ រួមមានបញ្ហាហិរញ្ញវត្ថុ ដោយសារអង្គការទទួលជំនួយទាំងស្រុងពីប្រទេសបារាំង។ បញ្ហាមួយទៀតការធ្វើឲ្យប្រសើរឡើងនូវកម្មវិធី សិក្សាដោយសារតែ IT គឺតែងតែមានការវិវឌ្ឍថ្មីជានិច្ច។
អង្គការ PNC មានទីតាំងស្ថិតនៅភូមិត្រពាំងឈូក (បុរីសឡា) សង្កាត់អូរបែកក្អម ខណ្ឌសែនសុខ រាជធានីភ្នំពេញ។ សូមទាក់ទងតាមលេខទូរស័ព្ទ ០២៣ ៩៩ ៥៥ ០០ និងអ៊ីមែល info.cambodia@passerellesnumeriques.org៕
វីដេអូ៖