មណ្ឌលគិរី: ទឹកដីនៃភូមិភាគឦសានមណ្ឌលគិរី គឺជាឋានសួគ៌ធម្មជាតិបៃតង ដ៏ស្រស់ត្រកាលសម្រាប់ភ្ញៀវទេសចរ ដែលបានទៅដល់ទីនោះ។ ភូមិជនជាតិដើមភាគតិច សម្រស់ទឹកធ្លាក់ ព្រៃភ្នំ ជ្រលងដងអូរ និងវាលស្មៅខៀវស្រងាត់នារដូវវស្សាសុទ្ធសឹងតែជាតំបន់កម្សាន្តលេង និងមានភាពទាក់ទាញបំផុតសម្រាប់វិស័យទេសចរណ៍។
ដែនដីក្រហមនេះក៏មានកញ្ចប់ទស្សនកិច្ចដើរកម្សាន្តចូលព្រៃ ថតរូបសត្វព្រៃ ប៉ុន្តែពេលខ្លះ វាពិតជាពិបាកខ្លាំងក្នុងការប្រទះឃើញពួកវាទាំងនោះណាស់។
ភ្នំពេញ ប៉ុស្តិ៍ សូមណែនាំទីតាំងទេសចរណ៍មួយកន្លែង ដែលទេសចរអាចបានឃើញ និងប៉ះពាល់ផ្ទាល់ជាមួយប្រភេទសត្វកម្រមួយចំនួន ដែលកំពុងរងការគំរាមកំហែងពីការបរបាញ់។
សួនសត្វនេះ មានទំហំប្រមាណជា ១០ ហិកតាត្រូវបានបង្កើតឡើងក្រោមការឧបត្ថម្ភគាំពារពី «មូលនិធិ មយូរ៉ាការពារសត្វព្រៃ» ក្នុងគោលបំណងដើម្បីចូលរួមអភិរក្ស និងការពារបានមួយផ្នែក។
លោក សេង ធា ជាអ្នកមើលថែសួនសត្វនេះ ថ្លែងថា៖ «សួនសត្វនេះបាន បង្កើតឡើងច្រើនឆ្នាំមកហើយ ដោយបានចិញ្ចឹមសត្វព្រៃទាំងនេះ ដើម្បីចូលរួមចំណែកលើការគាំពារអម្បូរសត្វព្រៃកម្រ និងសម្រាប់ទាក់ទាញភ្ញៀវជាតិ និងអន្តរជាតិ មកទស្សនា ជាពិសេស ក្មេងៗជំនាន់ក្រោយ ឲ្យបានស្គាល់សត្វព្រៃដែលមានវត្តមាននៅកម្ពុជា»។
លោក ធា ដែលជាអ្នកមើលថែម្នាក់ ក្នុងចំណោមសមាជិក ៤ នាក់ទៀតបានបន្តថា នៅទីនេះមានប្រភេទសត្វខុសៗគ្នាដូចជា ប្រើស ប្រើសផ្កាយ ក្តាន់ ឈ្លូស ជ្រូកព្រៃ និងសត្វក្ងោក ។ល។ និងមានការផ្តល់ចំណីជាទៀងទាត់ផងដែរ។
យោងតាមការរៀបរាប់ប្រាប់ពីអ្នកថែសួនសត្វម្នាក់ទៀត លោក ហេង តូច បានឲ្យដឹងថា ក្នុងបរិវេណនេះ ឃើញមានវត្តមានហ្វូងសត្វក្ងោកជាច្រើនរយក្បាល ក្នុងប៉ុន្មានឆ្នាំចុងក្រោយនេះ។
លោកនិយាយថា៖ «ដោយសារទីនេះ ស្ថិតក្នុងដែនជម្រកសត្វព្រៃ អ៊ីចឹងសត្វក្ងោក វាចាប់ផ្តើមចុះចាប់ពីខែសីហា ឡើងទៅ និងឃើញកន្លះខែបានចុះម្តង»។
សួនសត្វព្រៃនេះ មិនមែនមានតែសត្វព្រៃសម្រាប់ទស្សនានោះទេ ប៉ុន្តែក៏មានសួនដាំផ្កាឈូករ័ត្នជាច្រើន សម្រាប់ទេសចរថតរូបលេងកម្សាន្តផងដែរ។
តាមផ្លូវមុនទៅកាន់ទីនោះត្រូវឆ្លងកាត់ ទេសភាពសមុទ្រព្រៃឈើ ជាប់ជើងមេឃគួរឲ្យគយគន់ និងផ្តល់អារម្មណ៍ស្រស់ស្រាយ។
សូមបញ្ជាក់ថា ភ្ញៀវទេសចរប្រាថ្នាទៅលេងនៅសួនសត្វព្រៃ មយូរ៉ា ត្រូវធ្វើដំណើរចេញពីក្រុងសែនមនោរម្យ ឆ្ពោះទៅកាន់ស្រុកកោះញែក ចម្ងាយជិត ៣០ គីឡូម៉ែត្រ ស្ថិតក្នុង ភូមិមេម៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី និងត្រូវបត់ចូលពីផ្លូវជាតិប្រមាណជា ៥០០០ ម៉ែត្រទៀត តាមផ្លូវលំ រដិបរដុប ឆ្លងកាត់ចម្ការព្រៃកៅស៊ូ ដែលមានដាក់ស្លាកសញ្ញាបង្ហាញផ្លូវផងដែរ។
បច្ចុប្បន្នតម្លៃសេវាចូលទស្សនា គឺអាស្រ័យលើសទ្ធារបស់ទេសចរប៉ុណ្ណោះ៕
វីដេអូ៖