.jpg)
ក្រោយពីអនុវត្តវិធានការរឹតបន្តឹងការធ្វើដំណើរ ពលរដ្ឋជាច្រើនទៅលេងនៅហាឡុងបេ ក្រោយអជ្ញាធរបើកការធ្វើដំណើរក្នុងស្រុកវិញ។ រូបថត AFP
ហាឡុងបេ: ពលរដ្ឋវៀតណាមនាំគ្នាសម្រុកទៅកាន់តំបន់ទេសចរណ៍ និងឆ្នេរកាលពីចុងសប្ដាហ៍ ដែលជាឱកាសធ្វើដំណើរថ្មីក្រោយពីរដ្ឋាភិបាលកុម្មុយនិស្ដបន្ធូរបន្ថយបម្រាមលើការធ្វើបំលាស់ទីក្នុងស្រុក ដើម្បីស្ដាវិស័យទេសចរណ៍ដែលរងផលប៉ះពាល់ពីវីរុសកូរ៉ូណា។
ទេសចររាប់រយនាក់បានរង់ចាំឡើងទូកទៅកម្សាន្ដនៅជ្រលងល្បីល្បាញ ហាឡុងបេ ដែលចុះក្នុងបញ្ជីបេតិកភណ្ឌពិភពលោក ដោយធ្វើឲ្យឱកាសរក្សាគម្លាតសុវត្ថិភាពបានតិចតួចបំផុត។
ទេសចរភាគច្រើនបំភ្លេចម៉ាសមុខ ខណៈពួកគេឡើងទូក និងថតរូបសែលហ្វី នៅតំបន់ឆ្នេរសមុទ្រ ដែលល្បីទេសភាពផ្ទាំងថ្មដុះច្រូងច្រាងផុសពីផ្ទៃសាគរ។
អ្នកទេសចរជាច្រើនត្រូវបានគេសម្គាល់ពីការធ្វេសប្រហែលមិនពាក់ម៉ាស និងរក្សាគម្លាតសុវត្ថិភាព។ រូបថត AFP
ស្ថិតក្នុងហ្វូងភ្ញៀវទេសចរ ដួង ខ្វាងហ៊ុយ អាយុ ២១ ឆ្នាំ មកពីខេត្ដតំបន់ភ្នំភាគខាងជើង ធូយ៉េន ក្វាង បាននិយាយថា៖ «នេះជាលើកដំបូងរបស់ខ្ញុំដែលមកលេង ហាឡុងបេ ក្រោយពីកូវីដ ១៩»។
អ្នកទេសចរវៀតណាមរូបនេះបន្តទៀតថា៖ «ខ្ញុំមកទីនេះដោយសារវាមានទេសភាពស្អាត ហើយជំងឺរាតត្បាតកូវីដ បានរសាយបាត់។ ដូច្នេះខ្ញុំមានអារម្មណ៍សុវត្ថិភាពហើយ។ ខ្ញុំគ្រោងទៅលេង ដាណាង និងកន្លែងផ្សេងៗទៀត»។
វៀតណាមបានទទួលការសាទរចំពោះវិធានការគ្រប់គ្រងការរាតត្បាតវិរុសកូរ៉ូណា ដែលបច្ចុប្បន្នមានចំនួនជាង ៣០០ ករណី អត់មានស្លាប់ ទោះស្ថិតនៅជាប់ប្រទេសចិនយ៉ាងណាក៏ដោយ។
ដំណើរកម្សាន្ត និងការថតរូបសែលហ្វីដ៏ច្រើន មិនមានវត្តមានម៉ាសការពារនោះទេ។ រូបថត AFP
ប៉ុន្ដែការប្រកាសបិទប្រទេសបានជះឥទ្ធិពលយ៉ាងខ្លាំងដល់សេដ្ឋកិច្ចជាតិ។
វិស័យទេសចរណ៍បានធ្លាក់ចុះមកត្រឹម ៣៤០ លានដុល្លារក្នុងរយៈពេល ៤ ខែដំបូងនៃឆ្នាំ២០២០។ នេះបើយោងតាមស្ថិតិរដ្ឋាភិបាល ដែលមានការធ្លាក់ចុះ ៤៥ ភាគរយពីឆ្នាំកន្លង។
យ៉ាងណាមិញ ច្រកទ្វារនៅតែបន្ដបិទចំពោះភ្ញៀវទេសចរបរទេស តែអាជ្ញាធរកំពុងប្រែក្លាយទីផ្សារក្នុងស្រុកដែលចំណាយរាប់លានដុល្លារ ជាមួយការរស់នៅបិទប្រទេស និងការបម្រាមធ្វើដំណើរដើម្បីឲ្យមានចរន្ដទេសចរឡើងវិញ។
ទាំងនៅលើនាវា និងនៅតំបន់ឆ្នេរ ការរក្សាគម្លាតពីគ្នា ដើម្បីបង្ការជំងឺឆ្លង ហាក់ពុំត្រូវបានអនុវត្ត។ រូបថត AFP
លោក ផាន វ៉ាន់គៀន មកពីក្រុងហាណូយ បាននិយាយថា៖ «ពិតជាល្អដែលយើងអាចធ្វើដំណើរបាននាពេលនេះ។ យើងមានសណ្ឋានច្រើនស្ថិតក្នុងជម្រើសរបស់យើង»។
លោក គៀន បានឲ្យដឹងថា គ្រួសាររបស់លោកចង់ធ្វើដំណើរកម្សាន្ដក្នុងស្រុកពេញមួយឆ្នាំដោយសារជើងហោះហើរអន្ដរជាតិជាច្រើនបានលប់ចោល ហើយណាមួយក៏បារម្ភពីការឆ្លងវីរុសផងដែរ។
ទីក្រុងដាឡាត កសាងឡើងដោយបារាំង ក៏បានទទួលភ្ញៀវទេសចរកុះកុញតាំងពីដើមខែឧសភា។ ក្នុងឆ្នាំ ២០១៩ វៀតណាមទទួលភ្ញៀវអន្ដរជាតិជាង ១៨ លាននាក់ ដែលភាគច្រើនមកពីតំបន់អាស៊ី៕ AFP/HR
អ្នកទេសចរក្នុងស្រុកទទួលទានអាហារលើនាវា ដែលដឹកភ្ញៀវទស្សនាតំបន់ភ្នំថ្មផុសពីលើផ្ទៃសមុទ្រ។ រូបថត AFP
អ្នកទេសចរមកលម្ហែកាយ ក្រោយពីស្ថានភាពចំនួនអ្នកឆ្លងជំងឺកូវីដ-១៩ មានភាពប្រសើរឡើង។ រូបថត AFP
ទេសចររាប់រយនាក់បានរង់ចាំឡើងទូក និងចុះងូតទឹកលេងកម្សាន្តនៅតំបន់ទេសចរ ហាឡុងបេ ដែលចុះក្នុងបញ្ជីបេតិកភណ្ឌពិភពលោក។ រូបថត AFP
