.jpg)
ទិដ្ឋភាពអាងហែលទឹកនៅវីគិរីរម្យ ផាញ រីស៊ត។ រូបថត វីគិរីរម្យ
កំពង់ស្ពឺ៖ ឧទ្យានជាតិគីរីរម្យគឺជាតំបន់ទេសចរណ៍ កម្សាន្តធម្មជាតិទឹកធ្លាក់ ជួរភ្នំ គ្របដណ្ដប់ដោយព្រៃឈើមានពណ៌បៃតងគ្រប់រដូវកាល និងសម្បូរទៅដោយសត្វព្រៃជាច្រើនប្រភេទ និងមានកេរ្ដិ៍ឈ្មោះល្បីល្បាញខ្លាំង តាំងពីសម័យសង្គមរាស្ត្រនិយម រហូតមកដល់បច្ចុប្បន្ននេះ។
ស្ថិតនៅក្នុងឧទ្យានជាតិគីរីរម្យ ដែលមានផ្ទៃដីធំល្វឹងល្វើយ រមណីយដ្ឋាន វីគិរីរម្យ ផាញ រីស៊ត បានក្លាយជាចំណុចចាប់អារម្មណ៍មួយសម្រាប់ភ្ញៀវទេសចរ ដែលមកកម្សាន្ត មិនអាចរំលងបាន។
វីគិរីរម្យ ផាញ រីស៊ត ត្រូវបានបង្កើតឡើងចាប់តាំងពីឆ្នាំ ២០១៤ មានផ្ទះស្នាក់ជាច្រើនប្រភេទដូចជា ផ្ទះវីឡា បឹងកាឡូ ផ្ទះលូ ផ្ទះខ្មែរ តង់ទំនើប និងតង់ធម្មតា ដោយតម្រូវតាមចំណង់ចំណូលចិត្តទេសចរ ដែលចង់មកសម្រាកលម្ហែរ រំលាយភាពតានតឹង និង សកម្មភាពកម្សាន្តផ្សេងៗជាច្រើន។
លោក HICHI OKAMOTO អនុប្រធានជាន់ខ្ពស់នៃរមណីយដ្ឋានវីគិរីរម្យ បានឲ្យដឹងថា «ផ្ទះស្នាក់ទាំងអស់គឺជាអត្តសញ្ញាណ របស់រមណីយដ្ឋាន វីគីរីរម្យ ដូចជា វីឡាប្រណីតមានបន្ទប់គេងចំនួន ៣ នៅខាងក្នុង។ យើងមានកន្លែងស្នាក់នៅដែលមានតម្លៃថ្លៃ ហើយក៏តម្លៃសមរម្យដែរ ដូចជា ការបោះតង់តម្លៃត្រឹមតែ ២០ ដុល្លារសម្រាប់មនុស្សពីរនាក់ ប៉ុន្តែតង់យើងគឺខុសប្លែកពីតង់ទូទៅគឺប្រណីតជាង។ ពួកយើងក៏មានផ្ទះខ្មែរ ដែលភ្ញៀវបរទេសចូលចិត្តណាស់ ព្រោះគេគិតថា នេះជាស្ទីលរស់នៅរបស់ប្រជាជនកម្ពុជា»។
ក្រៅពីផ្ទះស្នាក់ស្រស់ស្អាត និងប្លែកៗជាច្រើនប្រភេទ វីគីរម្យ ក៏មានកម្មវិធីសម្រាប់ភ្ញៀវទេសចរ មកកម្សាន្តសប្បាយជាច្រើនដូចជា ការជិះកង់ ការជិះគោយន្ត ដើរព្រៃគយគន់ទេសភាពព្រៃឈើ ដើរឆ្លងខ្សែរ៉ត ជិះប៉ាល់យក្សរត់លេង ហែលទឹក ជិះទូក និងកម្សាន្តជាមួយកីឡាចម្រុះប្រភេទទៀត។
រមណីយដ្ឋាននេះក៏មានប្រព័ន្ធអគ្គីសនី បណ្តាញទឹកស្អាត និង Wifi រួមទាំងភោជនីយដ្ឋាន ដែលបម្រើអាហារជាច្រើនមុខ មានរសជាតិឆ្ងាញ់ ចេញពីថ្វីដៃចុងភៅដែលមានបទពិសោធន៍យូរឆ្នាំ។
លោក HICHI OKAMOTO បញ្ជាក់ថា ស្ថាបនិក វីគិរីរម្យ លោក Takeshi Izuka បានមកទីនេះ ៥ ឆ្នាំមុន គឺគាត់ចង់ធ្វើឲ្យក្តីស្រម៉ៃរបស់គាត់ក្លាយជាការពិត។
លោកថ្លែងថា៖ «នៅទីនេះ មិនត្រឹមតែស្រស់ស្អាតប៉ុណ្ណោះទេ ហើយមានដើមស្រល់ដ៏កម្រជាច្រើនទៀត ខ្ញុំស្រឡាញ់ដើមឈើនេះ ពិសេស ហើយខ្ញុំអាចឃើញដើមស្រល់ និងសត្វហើរ វាធ្វើឲ្យខ្ញុំធូរស្បើយ នៅទីនេះ ខ្ញុំរីករាយបំផុត មិនត្រឹមតែទេសភាពស្អាតទេ ទីនេះមានកម្ពស់ ៧០០ ម៉ែត្របើធៀបនឹងនីវ៉ូទឹកសមុទ្រ ហើយកម្រិតសីតុណ្ហាភាព គឺត្រជាក់ជាងតំបន់ខាងក្រោមភ្នំ និងនៅភ្នំពេញទៀត»។
លោក HICHI OKAMOTO បន្តថា ដំបូងនៅទីនេះមិនមានអ្វីទាំងអស់ និងបានចាប់ផ្តើមសាងសង់អ្វីៗទាំងអស់ ជាពិសេសការបង្កើតប៉ុស្តិ៍យាម ដើម្បីការពារសុវត្ថិភាព និងការកាប់បំផ្លាញព្រៃឈើ។
លោកថា៖ «ការការពារល្អបំផុត គឺមានតែប្រជាពលរដ្ឋកម្ពុជាខ្លួនឯងនោះទេ គឺចូលរួមស្រឡាញ់ឧទ្យានជាតិគិរីរម្យ មកកម្សាន្តទីនេះឲ្យបានច្រើន ពេលនោះប្រជាជនកម្ពុជានឹងចាប់ផ្តើមស្គាល់ពីតម្លៃ ហើយពួកគេខ្លួនឯងនឹងព្យាយាមការពារតំបន់នេះ ដោយមិនឲ្យជនបរទេសណាមកបំផ្លាញ ហើយយើងនឹងព្យាយាមដើម្បីផ្សព្វផ្សាយ ពីឧទ្យានជាតិគិរីរម្យនេះ ព្រោះយើងចង់ឲ្យប្រជាជនកម្ពុជារីករាយ និងស្ញប់ស្ញែង ចំពោះធនធានធម្មជាតិដ៏អស្ចារ្យដែលពួកគេមាន និងជួយពួកគេក្នុងការការពារទីនេះផងដែរ»។
សូមបញ្ជាក់ថា រម្យណីយដ្ឋាន វីគីរម្យ មានផ្ទៃដីប្រមាណ ៩ ពាន់ហិកតា ក្រោមការសម្បទានរបស់រាជរដ្ឋាភិបាលរយៈពេល ៥០ឆ្នាំដល់អ្នកវិនិយោគិនជប៉ុន។ ផ្ទៃដីភាគច្រើនរបស់ វីគីរីរម្យ គឺជាតំបន់ការពារព្រៃឈើ និងមិនទាន់មានការអភិវឌ្ឍន៍ ចំណែកតំបន់អភិវឌ្ឍមានចំនួនតិចតួចតែប៉ុណ្ណោះ។
រមណីយដ្ឋានដ៏ស្រស់ស្អាតនេះ មានទីតាំងស្ថិតនៅក្នុងឧទ្យានជាតិព្រះសុរាម្រិតកុសុមៈគិរីរម្យ ស្រុកភ្នំស្រួច ខេត្តកំពង់ស្ពឺ ដោយធ្វើដំណើរតាមបណ្តាយផ្លូវជាតិលេខ ៤ ចម្ងាយប្រមាណ ១១៥ គីឡូម៉ែត្រពីរាជធានីភ្នំពេញ។ ទំនាក់ទំនងលេខទូរសព្ទ៖ ០៧៨ ៧៧៧ ៣៤១/ ០៧៨ ៤៤៤ ៦៦១/ ០៧៨ ៧៧៧ ២៨៤ ឬហ្វេសប៊ុក vKirirom Pine Resort ៕
វីដេអូ៖
