ឧទ្យាន យូយន់តាន មានផ្កាសាគូរ៉ា ជាង ២០០០ ដើម។ AFP
ក្រុងប៉េកាំង: និយាយដល់ផ្កាសាគូរ៉ា ភ្ញៀវទេសចរ ប្រាកដជានឹកដល់ទេសភាពបុប្ផាពណ៌សក្បុស ឬពណ៌ផ្កាឈូកខ្ចី រីកស្គុសស្គាយដុះជាជួរតាមសួនច្បារនៃដែនដីមនុស្សយន្ត គឺប្រទេសជប៉ុនពុំខាន។
យ៉ាងណាមិញ ប្រទេសជប៉ុនមិនបានលាក់ទុកសម្រស់បុប្ផានេះតែនៅទឹកដីខ្លួនឡើយ។ ផ្កាសាគូរ៉ាជាច្រើនពាន់ដើមត្រូវបានកាដូដល់ប្រទេសជាច្រើន រួមមានសហរដ្ឋអាមេរិក និងចិនផងដែរ។
ចាប់ពីអំឡុងខែមីនា រហូតដល់ចុងខែមេសា នៅទីក្រុងប៉េកាំង ប្រទេសចិន ដើមផ្កាសាគូរ៉ាជាង ២ ពាន់ ដើម នៅឧទ្យាន យូយន់តាន បានផ្ដើមបញ្ចេញសម្រស់ រីកស្គុសស្គាយ ខ្លះរំលេចត្របកផ្កាពណ៌សក្បុស រីឯខ្លះទៀតស្រទាប់ពណ៌ផ្កាឈូកខ្ចី។
ស្ថិតនៅ ស្រុក ហាយទៀន ក្បែរអគារស៊ីស៊ីធីវី និងសារមន្ទីរយោធា ឧទ្យាន យូយន់តាន មានដើមផ្កាសាគូរ៉ាជាង ៣០ ពូជ និងចំនួន ២៤០០ ដើម។ ក្នុងចំណោមរុក្ខជាតិមែកសាខាគ្របដណ្ដប់ដោយផ្កាស្ទើរគ្មានចន្លោះទាំងនេះ មានចំនួន ១៨០ ដែលជាអំណោយរឹតចំណងមិត្តភាពពីជប៉ុន ក្នុងឆ្នាំ ១៩៧៣។
ជារៀងរាល់ឆ្នាំ អំឡុងវេលា ដែលបុប្ផាសាគូរ៉ារីក និងកំពុងពេញស្អាតបំផុតនោះ មានមិនដល់ ២-៣ សប្ដាហ៍ផង ដែលធ្វើឲ្យមនុស្សម្នាសម្រុកទៅគយគន់ផ្កា ដោយមួយថ្ងៃៗមានចំនួនជាង ១០ ម៉ឺននាក់ឯណោះ។
តម្លៃចូលទស្សនាឧទ្យានពេលផ្កាសាគូរ៉ារីក គឺ ១០ យន់ (១,៦ ដុល្លារ)។ អ្នកទៅលេងឧទ្យាន យូយន់តាន ភាគច្រើនមិនភ្លេចឡើយ សកម្មភាពថតរូបសែលហ្វ៊ី តែវត្តមានមនុស្សអ៊ូអរស្ទើរតែមិនអាចរកកន្លែងឈរថតឲ្យស្រឡះភ្នែកផង។
ភ្ញៀវទេសចរផ្ដិតយករូបភាពផ្កាសាគូរ៉ា នៅក្រុងប៉េកាំង។ AFP
ឱកាសទស្សនាផ្កាសាគូរ៉ា ភ្ញៀវទេសចរក៏គួរតែមើលការព្យាករអាកាសធាតុផងដែរ ព្រោះនៅពេលមេឃពណ៌ខៀវស្រឡះ សម្រស់ឧទ្យានផ្ការីកស្គុសស្គាយកាន់តែស្អាតមួយកម្រិតថែមទៀត។
នៅឧទ្យាន យូយន់តាន ភ្ញៀវទេសចរមិនត្រឹមតែអាចគយគន់ផ្កាសាគូរ៉ាប៉ុណ្ណោះទេតែក៏មានលក់ចំណីអាហារ និងវត្ថុអនុស្សាវរីយ៍ ទាក់ទងនឹងបុប្ផាមួយនេះផងដែរ ដូចជាការ៉េមរសជាតិផ្កាសាគូរ៉ា បង្អែមសង់ខ្យាសាគូរ៉ា និងផ្កាសាគូរ៉ាក្រៀមសម្រាប់តាំងលម្អ។
ក្រៅពីរដូវផ្កាសាគូរ៉ា ឧទ្យានទំហំជាង ២០០ ហិកតា នេះក៏មានរុក្ខជាតិសរុប ១៩៩ ៥០០ ដើម ដូចជាផ្កាធូលីប និងផ្កាអង្គាសីល និងផ្ទៃបឹងសម្រាប់ជិះទូកកម្សាន្តផងដែរ៕
ផ្ទៃបឹងទំហំជាង ៦០ ហិកតា អាចអុំទូកលេងបន្តរហូតដល់រាជវាំងនិទាឃរដូវ។ AFP
