.jpg)
លោក Mauricio Garcia កំពុងលាយស្រាជូនភ្ញៀវនៅភោជនីយដ្ឋានរបស់លោក។ រូបថត AFP
ក្រុងឡាហាវ៉ានៈ លោក Mauricio Garcia អាចចាត់ទុកថាជាភ្ញៀវទេសចរម្នាក់ នៅពេលលោកធ្វើដំណើរទៅកាន់តំបន់ Old Havana ស្ថិតក្នុងរដ្ឋធានីឡាហាវ៉ាន។ ការវិលត្រឡប់ របស់លោកបន្ទាប់ពីរស់នៅក្រៅប្រទេសរយៈពេល ១៦ ឆ្នាំ គឺជាផ្នែកមួយនៃកត្តាប្រជាសាស្រ្តដែលស្ថិតនៅពីក្រោយការស្ទុះងើបឡើងវិញរបស់ទីផ្សារអចលនទ្រព្យក្នុងប្រទេសកុម្មុយនីស្ត គុយបា។
ប្រជាជនគុយបាប្រមាណ ៤ ម៉ឺននាក់ដូចជារូបគាត់ដែរ បានវិលត្រឡប់ទៅកាន់ប្រទេស គុយបា ដែលជាប្រទេសកំណើតរបស់ពួកគេ ដែលទាក់ទាញដោយកំណែទម្រង់ទេសន្តប្រវេសន៍របស់រដ្ឋាភិបាលដែលបានធ្វើឲ្យមានលក្ខណៈងាយស្រួលជាងមុនសម្រាប់ជនជាតិគុយបាដែលរស់នៅបរទេសក្នុងការវិលត្រឡប់មកស្រុកកំណើតវិញ និងទិញអចលនទ្រព្យនៅទីនោះ។
លោក Garcia បានត្រឡប់មកស្រុកកំណើតវិញក្នុងឆ្នាំ ២០១៦។ បុរសវ័យ ៤១ ឆ្នាំរូបនេះ ជាម្ចាស់ភោជនីយដ្ឋាន ទេសចរណ៍មួយនៅជិតកំពង់ផែ បានថ្លែងថា៖ «ការសម្រេចចិត្តនេះបានធ្វើឡើងដោយសារការពិតថា យើងត្រូវបានអនុញ្ញាតឲ្យធ្វើអាជីវកម្ម។ ហើយប្រសើរជាងដើរជុំវិញពិភពលោក វាជាការប្រសើរដែលមកទីនេះក្នុងប្រទេសផ្ទាល់របស់យើង»។
លោក Garcia អាចទាញយកអត្ថប្រយោជន៍ពីកំណែទម្រង់មួយទៀតក្នុងឆ្នាំ ២០១១ ដែលបានអនុញ្ញាតឲ្យតែជនជាតិគុយបា ទិញ និងលក់អចលនទ្រព្យ។ កន្លងមក ជនជាតិគុយបាត្រឹមតែត្រូវបានអនុញ្ញាតឲ្យដោះដូរអចលនទ្រព្យប៉ុណ្ណោះ។
លោក Carlos Garcia Pleyan ដែលជាមន្រ្តីផែនការ និងជាជនជាតិអេស្ប៉ាញមកពី តំបន់កាតាឡូនី និងបានរស់នៅក្នុងប្រទេស គុយបា ជាងកន្លះសតវត្សរ៍មកហើយនោះ បានថ្លែងថា ការលក់អចលនទ្រព្យបានកើនឡើងសម្រាប់ប្រទេសដែលមានប្រជាជន ១១ លាននាក់ និងមានសេដ្ឋកិច្ចដឹកនាំដោយរដ្ឋនេះ មុនពេលធ្លាក់ចុះបន្តិចវិញក្នុងឆ្នាំ ២០១៥។
ទោះយ៉ាងណាក្តី ទីផ្សារនៅតែ «សកម្មខ្លាំង» ទោះបីជាត្រូវ «ពុះពារជម្នះបញ្ហាជាច្រើនដូចជា លទ្ធភាពទទួលបានបច្ចេកវិទ្យាខ្សោយ កង្វះព័ត៌មានសាធារណៈ និងឧបករណ៍ហិរញវត្ថុ ការពន្យារពេលនីតិកម្ម» ក៏ដោយ។ នេះបើយោងតាមលោក Armando Portela អ្នកឯកទេសខាងអចលនទ្រព្យក្នុងបទសម្ភាសជាមួយទស្សនាវដ្តី Cuba Geografica របស់គុយបាដែលមានមូលដ្ឋាននៅទីក្រុង Miami សហរដ្ឋអាមេរិក។
រដ្ឋាភិបាលរបស់ប្រធានាធិបតី Miguel Diaz-Canel កំពុងព្យាយាមបំពេញការខ្វះខាតផ្ទះប្រមាណ ៧ សែនយូនីតក្នុងទីក្រុង ដោយបង្កើនការសាងសង់ពី ២ ម៉ឺនយូនីតនាពេលបច្ចុប្បន្នដល់ ៥ ម៉ឺនយូនីតក្នុង ១ ឆ្នាំ។
ទន្ទឹមនេះដែរ ប្រជាពលរដ្ឋគុយបាដែលបានត្រឡប់ទៅប្រទេសកំណើតវិញកំពុងទិញផ្ទះនិងជួសជុលអគារចាស់ដើម្បីធ្វើភោជនីយដ្ឋាន ឬអាផាតមិនទេសចរណ៍ និងដើម្បីរកប្រាក់ចំណេញពីអចលនទ្រព្យទាំងនោះ។
នោះជាអ្វីដែលលោក Maykel Galindo ដែលជាអ្នកបកប្រែអាយុ ៣៥ ឆ្នាំបានធ្វើ។ បន្ទាប់ពីការរស់នៅក្នុងប្រទេស បែលហ្ស៊ិក រយៈពេល ១៦ ឆ្នាំ លោកបានប្រើប្រាស់ប្រាក់សន្សំនៅអឺរ៉ុបរបស់លោកដើម្បីទិញអគារចំណាស់មួយដែលមានទំហំ ១៥០ ម៉ែត្រការ៉េក្នុងទីក្រុងឡាហាវ៉ាន។
ដោយមានជំនួយពីគ្រួសារ លោកបានជួសជុល និងរចនាអគារនេះ និងបានបែងចែកធ្វើជាបន្ទប់ៗសម្រាប់ជួល។
លោកបានចាំថា លោកបានទិញផ្ទះនេះក្នុងឆ្នាំ ២០១៥ ហើយផ្ទះមានតម្លៃទាបណាស់ ហើយឥឡូវនេះឡើងថ្លៃខ្ពស់ជាងមុន ៨ ដង។
សក្តានុពលខ្លាំង
តម្លៃបច្ចុប្បន្នមានចាប់ពី ៥,០០០ ដុល្លារសម្រាប់អាផាតមិនតូចៗ នៅជាយក្រុងរហូតដល់ ១ លានដុល្លារនៅតំបន់ល្អៗដូចជា Kholy, Miramar ឬ Vedado។ អ្នកលក់ផ្ទះជាទូទៅជាម្ចាស់ផ្ទះធំៗ ដែលចង់បន្ថយទំហំ និងត្រូវការលុយ ឬចង់ចាកចេញពីប្រទេស គុយបា ឬចង់វិនិយោគក្នុងអាជីវកម្មអ្វីមួយ។
អ្នកទិញភាគច្រើនជាជនជាតិគុយបាដែលត្រឡប់ទៅស្រុកវិញ ឬប្រជាជនដែលមានគ្រួសាររស់នៅបរទេស ឬអ្នកដទៃៗទៀតដែលចង់ចាប់ផ្តើមអាជីវកម្មផ្ទាល់ខ្លួន។ ក្នុងប្រទេស គុយបា មានច្បាប់ហាមប្រាមបរទេសមិនឲ្យទិញផ្ទះ ប៉ុន្តែអ្នកដែលរៀបការជាមួយនឹងជនជាតិគុយបាអាចគេចពីការដាក់កំហិតនេះបាន។
ការផ្សាយលក់អចលនទ្រព្យធ្វើឡើងតាមរយៈអីុនធឺណិត តាមរយៈទីភ្នាក់ងារអចលនទ្រព្យតូចៗ ឬនៅតាមផ្លូវ។ ផ្ទះដែលគេស្វែងរកទិញបំផុតគឺជាផ្ទះដែលសាងសង់មុនសម័យបដិវត្តន៍១៩៥៩ ដែលភ្នាក់ងារលក់ក្នុងប្រទេសនេះផ្សព្វផ្សាយថាជាអគារសាងសង់ដោយពួកមូលធននិយម ដែលមានគុណភាពល្អ។
ទោះបីយ៉ាងណាក្តី ទីផ្សារអចលនទ្រព្យប្រឈមមុខនឹងបញ្ហាបន្តិចបន្តួច ដោយសារការរឹតបន្តឹងថ្មីៗរបស់រដ្ឋាភិបាលគុយបាកាលពីខែធ្នូ ដែលប៉ះពាល់ដល់វិស័យដ៏ក្មេងខ្ចីនេះ។
ហើយការហាមឃាត់ការធ្វើពាណិជ្ជកម្មរបស់អាមេរិកក្រោមការដឹកនាំរបស់ប្រធានាធិបតី ដូណាល់ ត្រាំ បានធ្វើឲ្យប៉ះពាល់ដល់វិស័យទេសចរណ៍ និងចំណាប់អារម្មណ៍របស់វិនិយោគិនក្នុងទីផ្សារអចលនទ្រព្យ។ នេះបើយោងតាមលោក Garcia Pleyan។
លោកបានថ្លែងថា៖ «ប៉ុន្តែក្នុងរយៈពេលវែង សក្តានុពលមានធំធេង ហើយនឹងកើនឡើងម្តងទៀត»។ លោកបានបន្ថែមថា វិស័យអចលនទ្រព្យរបស់ប្រទេសគុយបា នៅទីបំផុតអាចនឹងបើកចំហទៅកាន់មូលធនបរទេស ដែលនឹងជំរុញឲ្យតម្លៃកើនឡើងខ្លាំង៕ AFP/PS
