.jpg)
ទិដ្ឋភាពសំណង់អគារខុនដូ និងលំនៅឋាននៅជុំវិញពហុកីឡដ្ឋានជាតិអូឡាំពិក។ ហេង ជីវ័ន
ភ្នំពេញៈ គម្រោងខុនដូចំនួន ៣ បន្ថែមទៀតត្រូវបានបញ្ចប់ការសាងសង់ និងបានដាក់លក់ទៅក្នុងទីផ្សារនៅត្រីមាសទី១ ឆ្នាំ ២០១៩ នេះ ដែលធ្វើឲ្យចំនួនបន្ទប់ខុនដូ ក្នុងរាជធានីភ្នំពេញ មានកំណើនប្រមាណជិត ៨ ភាគរយ បើធៀបទៅ នឹងដំណាច់ត្រីមាសទី៤ ឆ្នាំ ២០១៨។
របាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia បានបង្ហាញថា ក្នុងត្រីមាសទី១ មានគម្រោងអភិវឌ្ឍន៍ខុនដូចំនួន ៣ ដែលមាន ១ ០៩១ យូនីត ត្រូវបានបញ្ចប់ និងដាក់ចូលទីផ្សារ ដែលធ្វើឲ្យចំនួនបន្ទប់ខុនដូសរុបដែលបានបញ្ចប់នៅទីក្រុងភ្នំពេញមានចំនួន ១៥ ២៦៤ យូនីត គិតត្រឹមត្រីមាសទី១ ឆ្នាំនេះ។ គិតត្រឹមចុងឆ្នាំ ២០១៨ បន្ទប់ខុនដូសរុបមានចំនួន ១៤ ១៧៣ យូនីត។
ក្នុងចំណោមគម្រោងខុនដូ ដែលត្រូវបានដាក់បញ្ចូលទៅក្នុងទីផ្សារនេះមាន ៨៩,៣ ភាគរយជាខុនដូប្រភេទតម្លៃមធ្យម ហើយសល់ពីនោះ គឺជាខុនដូប្រភេទប្រណីត និងខុនដូតម្លៃសមរម្យ។
សម្រាប់តម្លៃលក់ និងជួលវិញ គេឃើញថា ហាក់មិនមានអ្វីប្រែប្រួលគួរឲ្យចាប់អារម្មណ៍នោះទេ បើទោះបីជាមានការកើនឡើងនូវចំនួនបន្ទប់ស្នាក់នៅរហូតដល់ជាង ១ ពាន់យូនីតបន្ថែមក៏ដោយ។
គម្រោងទាំង ៣ ដែលបញ្ចប់ការសាងសង់ក្នុងត្រីមាសទី១ មាន ១ ស្ថិតក្នុងខណ្ឌ៧ មករា ១ នៅក្នុងខណ្ឌសែនសុខ និង ១ ទៀត ស្ថិតនៅក្នុងខណ្ឌចំការមន។
កញ្ញា គឹម គិនកេសា អ្នកស្រាវជ្រាវផ្នែកអចលនទ្រព្យជាន់ខ្ពស់នៃក្រុមហ៊ុន CBRE Cambodia បានឲ្យដឹងថា បច្ចុប្បន្ននេះទីផ្សារខុនដូតម្លៃសមរម្យ ទទួលបានការចាប់អារម្មណ៍ច្រើនពីអតិថិជនក្នុងស្រុក។ កញ្ញាបានថ្លែងថា៖ «សម្រាប់ពេលនេះ គឺវាមិនមានបញ្ហាអ្វីនោះទេសម្រាប់ទីផ្សារទិញ លក់ខុនដូនៅកណ្តាលក្រុង»។ ទោះបីយ៉ាងណាកញ្ញាបញ្ជាក់ថា វាអាចនឹងមានបញ្ហាតិចតួចសម្រាប់ខុនដូដែលនៅឆ្ងាយៗ ពិសេសខុនដូសម្រាប់ដាក់ជួល។
តាមការស្រាវជ្រាវ បច្ចុប្បន្នតម្លៃលក់ជាមធ្យមសម្រាប់ខុនដូប្រណីត គឺស្ថិតក្នុងរង្វង់ ៣ ២៥០ ដុល្លារក្នុង ១ ម៉ែត្រការ៉េ ប្រភេទតម្លៃមធ្យម នៅរង្វង់ ២ ៦០០ ដុល្លារ និងប្រភេទតម្លៃសមរម្យ ក្នុងរង្វង់ ១ ៥០០ ដុល្លារ។
តាមការព្យាករ នៅដំណាច់ឆ្នាំ ២០១៩ ចំនួនបន្ទប់ខុនដូ នៅក្នុងរាជធានីភ្នំពេញនឹងកើនឡើងដល់ ៣១ ១១២ យូនីត។ ក្នុងនោះខុនដូតម្លៃសមរម្យ អាចនឹងមានកំណើនច្រើនជាងគេ។ នេះបើយោងតាម CBRE Cambodia។
របាយការណ៍របស់ក្រសួងរៀបចំដែនដី នគរូបនីយកម្ម និងសំណាង់ បានឲ្យដឹងថា ក្នុងរយៈពេល ២ ខែ ដើមឆ្នាំ ២០១៩ នេះការវិនិយោគវិស័យសំណង់នៅកម្ពុជាមានតម្លៃជាង ១,៣ ពាន់លានដុល្លារ កើនឡើងជាង ២ ដងបើធៀបនឹងរយៈពេលដូចគ្នាក្នុងឆ្នាំ ២០១៨៕ LA
