ក្រុងបាងកកៈ ក្រុមហ៊ុនផ្តល់ប្រឹក្សាអចលនទ្រព្យ JLL បានឲ្យដឹងថា ការវិនិយោគលើវិស័យអចលនទ្រព្យនៅតំបន់អាស៊ីប៉ាស៊ីហ្វិកអាចនឹងជួបប្រទះឆ្នាំដ៏ខ្លាំងមួយផ្សេងទៀតនៅឆ្នាំ ២០២០ នេះ បន្ទាប់ពីបានកត់ត្រាកំណើន ១០ ភាគរយ ក្នុងពេល ៣ ត្រីមាសដំបូងក្នុងឆ្នាំ ២០១៩ ធៀបនឹងរយៈពេលដូចគ្នាក្នុងឆ្នាំ ២០១៨ ដល់ ១២៥ ពាន់លានដុល្លារ។ នេះបើយោងតាមកាសែតបាងកកប៉ុស្តិ៍។
ក្រុមហ៊ុនផ្តល់ប្រឹក្សាអចលនទ្រព្យលំដាប់អន្តរជាតិមួយនេះបានឲ្យដឹងថា ការវិនិយោគបរទេសលើវិស័យនេះបានកើនឡើងដល់កម្រិតខ្ពស់មិនធ្លាប់មានក្នុងរយៈពេល ១ ទសវត្សរ៍នៅឆ្នាំ ២០១៩ ដែលស្មើនឹង ៣៥ ភាគរយ នៃការវិនិយោគសរុបក្នុងតំបន់អាស៊ីប៉ាស៊ីហ្វិក ភាគច្រើនត្រូវបានជំរុញដោយមូលនិធិវិនិយោគឯកជន និងប្រតិបត្តិការធំៗ។
លោក Stuart Crow នាយកប្រតិបត្តិទទួលបន្ទុកទីផ្សារមូលធនក្នុងតំបន់អាស៊ីប៉ាស៊ីហ្វិកនៃក្រុមហ៊ុន JLL បានថ្លែងថា៖ «អចលនទ្រព្យក្នុងតំបន់អាស៊ីប៉ាស៊ីហ្វិកបានកើនឡើងភាពអំណោយផល ខណៈវិនិយោគិនបន្តស្វែងរកផលចំណេញខ្ពស់ និងស្ថិរភាពក្នុងគ្រាដែលមានបរិយាកាសមិនប្រាកដប្រជាផ្នែកភូមិសាស្ត្រ និងការថយចុះកំណើនសេដ្ឋកិច្ច»។
លោកមានប្រសាសន៍ថា៖ «ខណៈដែលការកើនឡើងបរិមាណមូលធនកំពុងត្រូវបានបែងចែកទៅកាន់វិស័យអចលនទ្រព្យ យើងកំពុងមើលឃើញអតិថិជនកាន់តែច្រើនធ្វើការវិនិយោគខ្នាតធំ ដើម្បីពង្រីកផលបត្រវិនិយោគរបស់ពួកគេ»។
លោកបន្ថែមថា៖ «ក្នុងពេល ២ ឆ្នាំបន្ទាប់ យើងរំពឹងថាទំហំប្រតិបត្តិការអចលនទ្រព្យពិភពលោកនឹងរក្សាបានកម្រិតខ្ពស់ ហើយតំបន់អាស៊ីប៉ាស៊ីហ្វិកទទួលបានលទ្ធផលល្អជាងអឺរ៉ុប និងអាមេរិក ដោយមានចំណែកមិនធម្មតាមួយនៃអត្ថប្រយោជន៍របស់វិនិយោគិនពិភពលោក»។
ក្រុមហ៊ុន JLL បានកំណត់និន្នាការសំខាន់ៗមួយចំនួនដែលវិនិយោគិនគួរសម្លឹងមើលនៅក្នុងឆ្នាំ ២០២០។
១. ទ្រព្យសកម្មឡូជីស្ទីកដែលមានតម្រូវការខ្លាំង៖ ចំណាប់អារម្មណ៍របស់វិនិយោគិនចំពោះឡូជីស្ទីកបន្តកើនឡើង ប៉ុន្តែប្រភេទសម្ភាររូបវន្តទាំងនេះត្រូវបានកាន់កាប់យ៉ាងតឹងណែន។ ជាលទ្ធផល វិនិយោគិនត្រូវមានការច្នៃប្រឌិតបន្ថែម ដើម្បីទទួលបានទ្រព្យដែលមានគុណភាពល្អ។
លោក Crow បានថ្លែងថា៖ «យើងកំពុងមើលឃើញវិនិយោគិនកាន់តែច្រើនមកពីក្រុមហ៊ុនបណ្តាក់ទុនរួមគ្នាជាមួយតួអង្គរធំៗ»។ លោកបន្ថែមថា៖ «វិនិយោគិនខ្លះកំពុងទិញយកភាគហ៊ុនមួយផ្នែក ឬសូម្បីតែទិញយកតាមរយៈទីផ្សារភាគហ៊ុន។ ឧទាហរណ៍ថ្មីៗមួយគឺការវិនិយោគធំមួយដោយក្រុមហ៊ុន Omers ដែលជាក្រុមហ៊ុនសោធននិវត្តន៍របស់ប្រទេសកាណាដានៅក្នុងក្រុមហ៊ុនឡូជីស្ទីក ESR នៅពេលដែលក្រុមហ៊ុន ESR បានដាក់ពាក្យសុំចុះបញ្ជីលើផ្សារហ៊ុនក្រុងហុងកុង»។
លោកបន្តថា៖ «វិធីមួយផ្សេងទៀតត្រូវបានធ្វើឡើងតាមរយៈការច្របាច់បញ្ចូលគ្នា និងការទិញភាគហ៊ុន (M&A) ដូចជាប្រតិបត្តិករឃ្លាំង GLP មូលនិធិវិនិយោគអចលនទ្រព្យ Viva Industrial និងមូលនិធិវិនិយោគអចលនទ្រព្យ Propertylink ដែលស្ថិតក្នុងចំណោមក្រុមហ៊ុនធំៗមួយចំនួនដែលបានត្រូវទិញយក»។
២. មូលនិធិវិនិយោគអចលនទ្រព្យ (REIT) គឺជាក្រុមហ៊ុនមួយដែលត្រូវឃ្លាំមើល៖ មូលនិធិ REIT ក្នុងតំបន់អាស៊ីប៉ាស៊ីហ្វិកបានប្រមូលមូលនិធិបានចំនួន ១៤ ពាន់លានដុល្លារកាលពីឆ្នាំមុន ដែលកើនលើសចំនួនខ្ពស់បំផុត ១៣,៨ ពាន់លានដុល្លារនៅឆ្នាំ ២០១៣។
ក្រុមហ៊ុន JLL ព្យាករថា ប្រទេសសិង្ហបុរី និងឥណ្ឌានឹងមើលឃើញការបោះផ្សាយមូលបត្របំណុលជាសាធារណៈ (IPO) របស់មូលនិធិ REIT កាន់តែច្រើនក្នុងឆ្នាំ ២០២០ ដែលត្រូវបានជំរុញដោយយុទ្ធសាស្ត្រផ្តោតលើកំណើនរបស់មូលនិធិទាំងនោះ និងលទ្ធផលពាណិជ្ជកម្មរឹងមាំ។ M&A ជាយុទ្ធសាស្ត្របន្ថែមទៀតនឹងអនុញ្ញាតឲ្យមូលនិធិនានារីកលូតលាស់ទៅតាមទីតាំងភូមិសាស្ត្រ និងធ្វើឲ្យការវិនិយោគរបស់ពួកគេកើតមានកាន់តែខ្លាំងទៅក្នុងទីផ្សារថ្មីៗនៅសហរដ្ឋអាមេរិក និងអឺរ៉ុប។
លោក Crow បានថ្លែងថា៖ «យើងអាចរំពឹងថានឹងមើលឃើញការទិញលក់បន្ថែមទៀតក្នុងវិស័យនេះ»។
៣. គំនិតផ្តួចផ្តើមប្រកបដោយនិរន្តរភាព៖ អគារជំនាន់ក្រោយគ្រោងនឹងកាន់តែមានភាពបៃតងរួមជាមួយនឹងបច្ចេកវិទ្យាប្រកបដោយចីរភាព ដើម្បីសន្សំសំចៃថ្លៃដើមប្រតិបត្តិការព្រមទាំងការរចនាប្រកបដោយនវានុវត្តន៍ ដើម្បីទាក់ទាញអ្នកស្នាក់នៅបន្ថែមទៀតនេះបើយោងតាមក្រុមហ៊ុន JLL។ ឧទាហរណ៍ មូលនិធិ (REIT) Keppel ថ្មីៗនេះបានទទួលកម្ចីបៃតងដើម្បីពង្រីកផលបត្រអគារបៃតងរបស់ខ្លួន។
លោកថ្លែងថា៖ «យើងជឿថា រដ្ឋាភិបាលនានានៅក្នុងតំបន់នេះយល់ដឹងយ៉ាងច្បាស់ និងចាត់វិធានការជាមុនក្នុងការបំលែងទីក្រុងរបស់ខ្លួនទៅជាទីក្រុងកាន់តែឆ្លាតវៃ និងកាន់តែចង់រស់នៅ»។ លោកបន្ថែមថា៖ «គំនិតផ្តួចផ្តើមទាំងនេះបង្ហាញពីឱកាសសម្រាប់វិនិយោគិនអចលនទ្រព្យដែលឆ្លាតវៃ តាមរយៈការទិញ ឬអភិវឌ្ឍន៍ទ្រព្យប្រកបដោយចីរភាព ឬធ្វើជាផ្នែកមួយនៃដំណើរការអភិវឌ្ឍទីក្រុង»។
ឧទាហរណ៍ ប្រទេស សិង្ហបុរី កំពុងដើរឆ្ពោះទៅរកការធ្វើវិមជ្ឈការតំបន់ពាណិជ្ជកម្មកណ្តាល (CBD) របស់ខ្លួនដោយលើកទឹកចិត្តឲ្យមានការអភិវឌ្ឍឡើងវិញនូវអគារការិយាល័យចាស់ៗឲ្យទៅជាការអភិវឌ្ឍសម្រាប់ការប្រើប្រាស់ចម្រុះ និងកាត់បន្ថយការប្រើប្រាស់មធ្យោបាយដឹកជញ្ជូនឯកជន។
ស្រដៀងគ្នានេះដែរ ទីក្រុងប៉េកាំងបានរឹតបន្តឹងទំហំអភិវឌ្ឍន៍លក្ខណៈពាណិជ្ជកម្មនៅក្នុងតំបន់កណ្តាល និងមានបំណងកាត់បន្ថយចំនួនប្រជាជនក្នុងតំបន់កណ្តាល (The central area) ចំនួន ៦ របស់ខ្លួនចំនួន ១៥ ភាគរយធៀបនឹងចំនួនប្រជាជននៅឆ្នាំ ២០១៤។
៤. ទីក្រុងនវានុវត្តន៍គ្របដណ្តប់ទីផ្សារការិយាល័យ៖ យោងតាម Premium Office Rent Tracker របស់ក្រុមហ៊ុន JLL ក្រុមហ៊ុនបច្ចេកវិទ្យាជាពិសេសគេហទំព័រអនឡាញកំពុងដើរតួនាទីយ៉ាងខ្លាំងក្នុងការជំរុញឲ្យមានការជួលការិយាល័យតម្លៃថ្លៃ ដែលកន្លងមកត្រូវបានគ្របដណ្តប់ដោយឧស្សាហកម្មសេវាធនាគារ និងហិរញ្ញវត្ថុ។ ការណ៍នេះគឺជាករណីនៅក្នុងទីក្រុងនវានុវត្តន៍នានាដូចជាទីក្រុងប៉េកាំង តូក្យូ សេអ៊ូល ស៊ាងហៃ សិង្ហបុរី និងអូសាកា។
ដូចទៅនឹងវិនិយោគិនអចលនទ្រព្យដែរ អ្នកកាន់កាប់ដែលជាសាជីវកម្មត្រូវបានទាក់ទាញទៅកាន់ទីតាំងនានាដែលមានប្រព័ន្ធអេកូឡូស៊ីនវានុវត្តន៍ទំនើប។ ទីក្រុងទាំងនេះរក្សានិរន្តរភាពកម្លាំងពលកម្មជំនាញខ្ពស់ និងជាទីកន្លែងល្អប្រសើរដើម្បីទទួលបានជោគជ័យក្នុងទីផ្សារពិភពលោក។
លោក Crow ថ្លែងថា៖ «ទីផ្សារការិយាល័យក្នុងទីក្រុងប៉េកាំងនឹងក្លាយជាចំណុចក្តៅមួយសម្រាប់វិនិយោគិននៅឆ្នាំក្រោយ ដោយសារវាមានបណ្តុំអ្នកមានទេពកោសល្យខ្លាំងៗច្រើនដែលត្រូវបានគាំទ្រដោយប្រព័ន្ធអេកូឡូស៊ីនវានុវត្តន៍ដែលចាក់ឫសកប់ជ្រៅ»៕ KC