ទីក្រុងឌូបៃៈ ក្រុមអ្នករៀបចំពិព័រណ៍ឆ្នាំ ២០២០ ដែលជាពិព័រណ៍ពាណិជ្ជកម្មពិភពលោកមានតម្លៃច្រើនពាន់លានដុល្លារ ដែលបានកំណត់កាលបរិច្ឆេទបើកដំណើរការនៅទីក្រុងឌូបៃនៅខែតុលាចុងឆ្នាំ ២០២០ នេះកាលពីថ្ងៃចន្ទ បានផ្ដល់អនុសាសន៍ឲ្យពន្យាររយៈពេល ១ ឆ្នាំដោយសារតែការរីករាលដាលវីរុសកូរ៉ូណា។
ឌូបៃ គឺជាទីក្រុងដ៏ភ្លឺចិញ្ចាចដែលជាផ្នែកមួយនៃប្រទេសអេមីរ៉ាតអារ៉ាប់រួមបានសង្ឃឹមថានឹងទាក់ទាញភ្ញៀវប្រហែល ២៥ លាននាក់មកទស្សនានៅក្នុងព្រឹត្តិការណ៍នោះ។
លោកស្រី Reem alHashimi ប្រធានព្រឹត្តិការណ៍ពិព័រណ៍ឌូបៃ ឆ្នាំ ២០២០ បាននិយាយថា៖ «ប្រទេសជាច្រើនបានរងផលប៉ះពាល់យ៉ាងខ្លាំងពីកូវីដ១៩ ហើយប្រទេសទាំងនោះបានបង្ហាញពីបំណងក្នុងការពន្យារពេលការបើកដំណើរការពិព័រណ៍ឌូបៃឆ្នាំ ២០២០ រយៈពេល ១ ឆ្នាំ»។
លោកស្រីបន្តថា៖ «ប្រទេស UAE និងអ្នករៀបចំពិព័រណ៍ឌូបៃ ឆ្នាំ ២០២០ បានស្ដាប់តាម [ពួកគេ]។ ក្នុងស្មារតីសាមគ្គី និងឯកភាពគ្នា យើងបានគាំទ្រសំណើនេះដើម្បីស្វែងរកការពន្យារពេល ១ ឆ្នាំ»។
វិស័យសំខាន់ៗរបស់ទីក្រុងនេះមានដូចជា អចលនទ្រព្យ ទេសចរណ៍ និងពាណិជ្ជកម្មត្រូវបានចុះខ្សោយយ៉ាងខ្លាំងក្នុងរយៈពេលប៉ុន្មានឆ្នាំនេះ។
ក្រុមអ្នករៀបចំពិព័រណ៍ និងការិយាល័យពិព័រណ៍អន្តរជាតិ (BIE) ដែលមានមូលដ្ឋាននៅទីក្រុងប៉ារីសដែលជាស្ថាប័នផ្ដល់ពានរង្វាន់ដល់ព្រឹត្តិការណ៍នេះ បានយល់ព្រមឲ្យមានការសិក្សាពីការផ្លាស់ប្តូរពេលវេលាសម្រាប់ព្រឹត្តិការណ៍មួយនេះ។
លោកស្រី Hashimi បានថ្លែងថា៖ «យើងទន្ទឹងរង់ចាំស្វាគមន៍ពិភពលោកដោយក្ដីរីករាយ។ យើងពិតជានឹងចេញផុតពីបញ្ហាប្រឈមដ៏ខ្លាំងនេះ និងកាន់តែរឹងមាំខ្លាំងជាងពេលណាៗទាំងអស់»។
ការសម្រេចចិត្តចុងក្រោយលើការពន្យារពេលនឹងត្រូវធ្វើឡើងដោយ BIE ខណៈអគ្គលេខាធិការស្ថាប័ននេះគឺលោក Dimitri Kerkentzes បានស្វាគមន៍អនុសាសន៍នេះ។
លោកថ្លែងថា៖ «ការសម្រេចចិត្តរបស់ UAE ដើម្បីគាំទ្រការពន្យារពេល ១ ឆ្នាំបង្ហាញពីភាពជាក់ស្ដែង ភាពបើកចំហ និងការប្ដេជ្ញាចិត្តក្នុងការផ្ដល់ពិព័រណ៍ដែលបំពេញមហិច្ឆតារួមរបស់យើង»។
ទីក្រុងឌូបៃដែលល្បីខាងការរៀបចំសន្និសីទរាប់រយប្រចាំឆ្នាំបានលុបចោលរួចមកហើយនូវព្រឹត្តិការណ៍វប្បធម៌ និងការកម្សាន្តជាច្រើននៅសប្ដាហ៍ថ្មីៗនេះ ដោយសារតែការរីករាលដាលជំងឺដែលបណ្ដាលឲ្យមានមនុស្សស្លាប់យ៉ាងច្រើនមកទល់ពេលនេះ ។
លោក M.R. Raghu ប្រធានផ្នែកស្រាវជ្រាវនៅមជ្ឈមណ្ឌលហិរញ្ញវត្ថុកូវែត (Markaz) បានថ្លែងថា៖ «ការសម្រេចចិត្តក្នុងការពន្យារពេលពិព័រណ៍ឆ្នាំ ២០២០ ធ្វើឡើងក្នុងពេលវេលាដ៏សំខាន់មួយ នៅពេលសេដ្ឋកិច្ចបានធ្លាក់ចូលទៅក្នុងសភាពថមថយ»។
លោកថ្លែងថា៖ «សហគ្រាសធុនតូច និងមធ្យម (SME) វិស័យបដិសណ្ឋារកិច្ច ទេសចរណ៍ និងលក់រាយដែលកំពុងមានដំណើរការមិនល្អរួចហើយនោះនឹងរងផលប៉ះពាល់ចំនួន ២ ដោយសារតែតម្លៃប្រេងទាប និងការរីករាលដាលវីរុសកូរ៉ូណាដែលសង្ឃឹមថានឹងអាចប៉ះប៉ូវបាន និងស្ទុះងើបឡើងវិញនូវអាជីវកម្មដែលខាតបង់នៅក្នុងអំឡុងពេលពិព័រណ៍នេះ»។
មកទល់ពេលនេះប្រទេសអេមីរ៉ាតអារ៉ាប់រួមបានប្រកាសពីការរកឃើញវីរុសកូរ៉ូណាចំនួន ៦១១ ករណី និងមានមនុស្ស ៥ នាក់បានស្លាប់។ ប្រទេសនេះត្រូវបានអនុវត្តវិធានការបិទការធ្វើចរាចរណ៍ដ៏ទូលំទូលាយ ដើម្បីទប់ស្កាត់ការរីករាលដាលជំងឺនេះរួមទាំងបម្រាមគោចរនៅពេលយប់ដែលកំពុងបន្តអនុវត្ត៕ LA