.jpg)
អ្នកលេងល្បែងបញ្ជល់មាន់ ដែលត្រូវបានកងរាជអាវុធហត្ថឃាត់ខ្លួននាំយកទៅ សាកសួរកាលពីថ្ងៃទី ១ ខែ មិថុនា ឆ្នាំ ២០២០។ រូបថត នគរបាល
កំពង់ធំៈ កងរាជអាវុធហត្ថខេត្តកំពង់ធំ កាលពីម្សិលមិញ នៅកំពុងបន្តសាកសួរបុរសចំនួន ១១ នាក់ បន្ទាប់ពីត្រូវបានឃាត់ខ្លួនកាលពីថ្ងៃទី ១ ខែមិថុនា ដោយរឹបអូសបានម៉ូតូចំនួន ៥៩ គ្រឿង និងមាន់ជល់ចំនួន ១១ ក្បាលនៅពេលចុះបង្ក្រាប ខណៈពួកគេកំពុងលេងល្បែងបញ្ជល់មាន់ នៅភូមិគ្រួស ឃុំដូង ស្រុកប្រាសាទបល្ល័ង្ក។
លោក ផុន សុផល នាយការិយាល័យព្រហ្មទណ្ឌ នៃបញ្ជាការដ្ឋានកងរាជអាវុធហត្ថខេត្តកំពង់ធំ ឲ្យដឹងពីម្សិលមិញថា ខណៈដែលកំពុងសាកសួរបុរសទាំងនោះ រូបលោកក៏កំពុងរង់ចាំការបង្គាប់ពីព្រះរាជអាជ្ញាសិនដែរ ថាតើត្រូវបញ្ជូនពួកគេទៅសាលាដំបូងខេត្តកំពង់ធំ ឬគ្រាន់តែធ្វើការអប់រំពួកគេ។
លោកបញ្ជាក់ថា៖« បើអយ្យការឲ្យបញ្ជូនទៅតុលាការ យើងក៏ធ្វើតាមនោះទៅ»។ លោក សុផល ថ្លែងថា ដោយអនុវត្តគោលនយោបាយភូមិ-ឃុំមានសុវត្ថិភាព និងដើម្បីរក្សាការពារសន្តិសុខសង្គម កងរាជអាវុធហត្ថ បានស៊ើបអង្កេត ដឹងថា នៅក្នុងភូមិសាស្រ្តខាងលើ មានការលួចលេងល្បែងភ្នាល់ជល់មាន់ និងល្បែងអាប៉ោងទើបសមត្ថកិច្ចបានចាត់វិធានការចុះបង្ក្រាប។
លោកបន្តថា ការបង្ក្រាបទីតាំងល្បែងស៊ីសងខាងលើ បានធ្វើឡើង នៅរសៀលថ្ងៃទី ១ ខែមិថុនា ដែលប្រតិបត្តិការនេះ សមត្ថកិច្ចបានឃាត់ខ្លួនបុរសចំនួន ១១ នាក់ ក្នុងនោះក៏មានអ្នកលេងល្បែងចាក់អាប៉ោងផងដែរ។ ចំពោះវត្ថុតាង ដែលសមត្ថកិច្ចដកហូតបាន មានម៉ូតូចំនួន ៥៩ គ្រឿង ដែលម៉ូតូទាំងនោះ ម្ចាស់បានរត់ចោលពេលសមត្ថកិច្ចចុះទៅដល់។
បើតាមលោក សុផល ល្បែងបែបនេះគេគិតថា ជាល្បែងតូចតាចហើយជាល្បែងកំសាន្ត ប៉ុន្តែវាមានផលប៉ះពាល់ដល់សុវត្ថិភាព សណ្តាប់ធ្នាប់សាធារណៈនៅក្នុងស្រុកភូមិ។ ម៉្យាងវាធ្វើឲ្យប៉ះពាល់ដល់គោលនយោបាយភូមិ-ឃុំ មានសុវត្ថិភាព ទើបសមត្ថកិច្ចចុះបង្ក្រាប។
លោកពន្យល់ថា ធម្មតាអ្នកញៀនល្បែង តែងមានចិត្តលោភលន់ ហើយបើពេលណាលេងចាញ់ ក៏រឹតតែមានអារម្មណ៍មួរម៉ៅ ជួនកាលអាចឈានដល់អំពើឃាតកម្ម ឬប្រើអំពើហិង្សាធ្ងន់ធ្ងរទៀតផង។
លោកបន្ថែមថា៖ «កាលណាគាត់លេងល្បែងចាញ់ហើយ បើលួចទ្រព្យអ្នកដទៃមិនបាន ក៏លួចទ្រព្យសម្បត្តិនៅក្នុងផ្ទះដែរ ដើម្បីយកលុយទៅលេងល្បែង។ ជួនកាលក៏កើតមានជាអំពើហិង្សាក្នុងគ្រួសារអ៊ីចឹងទៅ»៕
