.jpg)
ទាហានវិស្វកម្មកម្ពុជាពេលឡើងយន្តហោះទៅលីបង់។ រូប ក្រសួងការពារជាតិ
ភ្នំពេញៈ កម្ពុជាបានបញ្ជូនទាហានកងវិស្វកម្មពហុជំនាញចំនួន ៩២ នាក់បន្ថែមទៀតទៅកាន់ប្រទេសលីបង់ ដែលធ្វើឱ្យកងកម្លាំងរបស់កម្ពុជានៅក្នុងប្រទេសនេះកើនដល់ ១៨៤ នាក់ ដើម្បីចូលរួមបំពេញបេសកកម្ម រក្សាសន្តិសុខជូនប្រជាពលរដ្ឋលីបង់ក្រោមឆត្រអង្គការសហប្រជាជាតិ។
លោកស្រី កុសល ម៉ាលីនដា អ្នកនាំពាក្យមជ្ឈមណ្ឌលជាតិរក្សាសន្តិភាពបានប្រាប់ ភ្នំពេញ ប៉ុស្តិ៍ នៅថ្ងៃចន្ទថា កងកម្លាំងទាហានវិស្វកម្មទាំងនោះមកពីកងអនុសេនាតូចលេខ ៩២៨។ ពួកគេបានចេញដំណើរពីអាកាសយានដ្ឋានអន្តរជាតិភ្នំពេញទៅកាន់ប្រទេសលីបង់កាលពីល្ងាចថ្ងៃទី ៣១ ខែមករា ឆ្នាំ ២០២១ តាមជើងយន្តហោះ UN លេខ ET8801។
លោកស្រីថ្លែងថា៖ «នៅពេលទៅដល់ប្រទេសលីបង់ ពួកគេនឹងត្រូវទទួលភារកិច្ចដូចជាកម្លាំងកងទាហានវិស្វកម្មមុនៗផងដែរគឺត្រូវបំពេញភារកិច្ចក្នុងការសាងសង់សំណង់លើផ្ទៃរាប និងបញ្ឈរដូចជារបងការពារព្រំដែនសន្តិភាពនៃប្រទេសលីបង់ និងអ៊ីស្រាអែលរួមទាំងការបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះដែលស្ថិតនៅតាមបណ្ដោយជួរបន្ទាត់ព្រំប្រទល់នៃប្រទេសទាំង ២»។
បើតាមលោកស្រី ម៉ាលីនដា វត្តមានរបស់ពួកគេបានធ្វើឱ្យកងកម្លាំងមួកខៀវកម្ពុជា ដែលកំពុងបន្តបេសកកម្មការងារក្រោមឆត្រអង្គការសហប្រជាជាតិ នៅក្នុងប្រទេសលីបង់នាពេលនេះកើនឡើងដល់ ១៨៤ នាក់ក្នុងនោះមានស្ត្រីចំនួន ៣០ នាក់។ ក្រៅពីការងារសាងសង់របងព្រំដែនសន្តិភាព និងបោសសម្អាតមីន ពួកគេមួយចំនួនក៏បានចូលរួមនៅក្នុងកម្មវិធីសង្គ្រោះបឋម ដល់យុទ្ធជននៃបណ្ដាប្រទេសមួយចំនួនដែលបានចូលរួមបំពេញបេសកកម្មការងារក្រោមឆត្រអង្គការសហប្រជាជាតិនៅក្នុងប្រទេសនេះ។
ចាប់តាំងពីផ្ទុះករណីជំងឺរាតត្បាតកូវីដ ១៩ ជាសកលជាលើកដំបូងរហូតមកទល់ពេលនេះ ប្រទេសកម្ពុជាបានបញ្ជូនកម្លាំងទាហានមួកខៀវតាមការស្នើសុំរបស់អង្គការសហប្រជាជាតិចំនួន ៣ លើកក្នុងនោះលើកទី ១ នៅថ្ងៃទី ១១ ខែកញ្ញា ឆ្នាំ ២០២០ បានបញ្ជូនក្រុមកម្លាំងកងអនុសេនាធំវិស្វកម្មព្រលានយន្តហោះ និងកងអនុសេនាធំកម្ទេចគ្រាប់សរុបចំនួន ២១៨ នាក់ទៅកាន់ប្រទេសម៉ាលី និងលើកទី ២ នៅថ្ងៃទី ២៥ ខែតុលា ឆ្នាំ ២០២០ បានបញ្ជូនកម្លាំងពហុជំនាញវិស្វកម្មចំនួន ៧៣ នាក់ទៅកាន់ប្រទេសស៊ូដង់ខាងត្បូង ហើយលើកទី ៣ នៅថ្ងៃទី ៣១ ខែមករា ឆ្នាំ ២០២១ ទៅកាន់លីបង់ចំនួន ៩២ នាក់។
គួរបញ្ជាក់ផងដែរថា កាលពីថ្ងៃទី ២៩ ខែ ឧសភា ឆ្នាំ ២០២០ កងកម្លាំងរក្សាសន្តិភាពកម្ពុជា ១ រូបបានស្លាប់បន្ទាប់ពីឆ្លងជំងឺកូវីដ ១៩ នៅប្រទេសម៉ាលី។ ទាហានដែលបានទទួលមរណភាពនេះ គឺលោកឧត្តមសេនីយ៍ទោ ស សាវី អាយុ ៦៣ ឆ្នាំមានលំនៅភូមិចុងបឹង ឃុំម្កាក់ ស្រុកអង្គស្នួល ខេត្តកណ្តាល៕
