.jpg)
កម្មកររោងចក្រកាត់ដេរប្រមូលផ្ដុំគ្នានៅលើផ្លូវជាតិលេខ៤ ក្នុងខណ្ឌពោធិ៍សែនជ័យកាលពីម្សិលមិញ។ រូបថត សហការី
ភ្នំពេញៈ កម្មកររោងចក្រកាត់ដេរប្រមាណ ៧០០ នាក់នៅរោងចក្រ Chim Li Cambodia PTE, LTD បានធ្វើការតវ៉ាបិទផ្លូវជាតិលេខ ៤ នៅកំបូល ខណ្ឌពោធិ៍សែនជ័យ កាលពីថ្ងៃ ទី១៧ ខែកញ្ញា ដើម្បីទាមទារអត្ថប្រយោជន៍ពីម្ចាស់រោងចក្រដែលកម្មករអះអាងថា ម្ចាស់រោងចក្រមិនផ្តល់ប្រាក់អត្ថប្រយោជន៍ដល់ពួកគេបន្ទាប់ពីរោងចក្រនេះបានបិទទ្វារ ហើយរោងចក្រថ្មីដែលកម្មករទៅធ្វើការមិនផ្តល់អត្ថប្រយោជន៍ដដែលដល់កម្មករចាស់របស់ខ្លួន។
លោក យឹម សារ៉ាន់ អធិការនគរបាលពោធិ៍សែនជ័យ បានថ្លែងថា កម្មករបានចាប់ផ្តើមធ្វើការតវ៉ាតាំងពីម៉ោង៨ព្រឹករហូតដល់ម៉ោង ១២ ថ្ងៃត្រង់ទើបពួកគេឈប់។ រោងចក្រនេះ មានកម្មករប្រមាណ ៣០០០ នាក់។
លោកបានថ្លែងថា៖«ពួកគេអង្គុយកណ្តាលផ្លូវ វាបង្កឲ្យមានការស្ទះចរាចរណ៍យ៉ាងខ្លាំង ប៉ុន្តែមិនមានការប្រឈមមុខដាក់គ្នារវាងកម្មករនិងប្រជាពលរដ្ឋដែលប្រើប្រាស់ផ្លូវទេ។ យើងបានធ្វើឲ្យប្រាកដថា វាជាការតវ៉ាដោយសន្តិវិធី»។
លោក ថ្លែងថា៖«វាបង្កឲ្យមានការស្ទះចរាចរណ៍យ៉ាងខ្លាំង ប៉ុន្តែមិនមានកម្មករអង្គុយនៅកណ្តាលថ្នល់ទេ»។
អ្នកស្រី ខន ថាវីរី អាយុ៣៥ឆ្នាំ ជាកម្មករម្នាក់ ដែលកំពុងធ្វើការឲ្យរោងចក្រនេះអស់រយៈពេលបួនឆ្នាំមកហើយ បានថ្លែងថា អ្នកនាងត្រូវបានផ្តល់ប្រាក់ឲ្យប្រមាណ ៣០០ ដុល្លារអាមេរិកនៅពេលធ្វើការងារថែមម៉ោង។
យោងតាមអ្នកនាង ថាវរី បានឲ្យដឹងថា កម្មករត្រូវបានបញ្ជូនទៅធ្វើការនៅរោងចក្រថ្មី និងកន្លែងថ្មីតាំងពីថ្ងៃទី ១៥ ខែសីហា ឆ្នាំ ២០១៨។
អ្នក ស្រី បានថ្លែងបន្តថា៖«រោងចក្រចង់បើកប្រាក់ឲ្យយើងនៅថ្ងៃទី២២ ខែសីហា ប៉ុន្តែយើងមិនយល់ព្រម ដូច្នេះយើងប្តឹងទៅក្រសួង។ ហើយបន្ទាប់មក នៅទីបំផុតយើងទទួលបានការបើកប្រាក់នៅថ្ងៃទី១៨ ខែសីហា។ ទោះយ៉ាងណាក្តី រោងចក្រគ្រាន់តែអាចផ្តល់នូវប្រាក់ខែរបស់យើង និងប្រាក់បំណាច់ឆ្នាំរបស់យើងចំនួន៧៥ដុល្លារ»។
អ្នកស្រីបានថ្លែងបន្តថា៖ «យើងបានប្តឹងទៅក្រសួង ប៉ុន្តែមិនមានការឆ្លើយតប ដូច្នេះវាជាមូលហេតុដែលធ្វើឲ្យយើងបិទផ្លូវនៅថ្ងៃនេះ។ ហើយយើងក៏មិនត្រូវបានផ្តល់ឲ្យនូវប្រាក់ថ្លៃបាយថ្ងៃត្រង់ដែរ។ «ខ្ញុំបានចាប់ផ្តើមធ្វើការឲ្យរោងចក្រថ្មីនៅកន្លែងថ្មីរយៈពេលបីទៅបួនថ្ងៃហើយ។ យើងទាមទារឲ្យរោងចក្រចាស់ផ្តល់ប្រាក់អត្ថប្រយោជន៍ដល់កម្មករជាមុនសិន»។
អ្នកស្រី ថាវរី បានថ្លែងថា កិច្ចសន្យារបស់អ្នកនាងនឹងបញ្ចប់នៅថ្ងៃទី២ ខែកុម្ភៈ ឆ្នាំ២០១៩។
អ្នក ស្រី ថ្លែងថា៖«កិច្ចសន្យាថ្មីរបស់ខ្ញុំនឹងធ្វើឡើងនៅខែកុម្ភៈ ឆ្នាំ២០១៩។ ហើយពួកគេបាននាំយកកម្មករទៅធ្វើការនៅរោងចក្រថ្មី រដ្ឋបាលថ្មីនៅការិយាល័យថ្មីបានប្រាប់យើងថា ពួកគេមិនអាចផ្តល់អត្ថប្រយោជន៍ដូចនៅរោងចក្រចាស់ទេ ឧទាហរណ៍ យើងត្រូវបានផ្តល់ឲ្យនូវប្រាក់៧ដុល្លារសម្រាប់សោហ៊ុយធ្វើដំណើរ ប៉ុន្តែនៅកន្លែងថ្មី ត្រូវអាចផ្តល់ឲ្យតែ៦ដុល្លារប៉ុណ្ណោះ»។
លោក ហែម ហឿន មន្រ្តីជាន់ខ្ពស់ម្នាក់នៅក្រសួងការងារ បានថ្លែងថា ក្រុមរបស់លោកបានជជែកជាមួយកម្មកររួចហើយ។
លោក ថ្លែងថា៖ «ឥឡូវនេះ យើងកំពុងធ្វើរបាយការណ៍ យើងកំពុងសម្រួលកម្មករឲ្យបើកផ្លូវ។ យើងប្រាប់ពួកគេឲ្យបើកផ្លូវនិងដោះស្រាយទៅតាមច្បាប់ យើងបានជជែកជាមួយកម្មកររួចហើយ»។
លោក ឃុន ថារ៉ូ អ្នកសម្របសម្រួលនៅអង្គការ Central បានជំរុញឲ្យរដ្ឋាភិបាលពង្រឹងការអនុវត្តច្បាប់ការងារ។
លោកបានថ្លែងថា៖ «វាជាការល្អដែលរដ្ឋាភិបាលកំពុងផ្តល់ប្រាក់បុរេប្រទានដើម្បីដោះស្រាយបញ្ហា ប៉ុន្តែពួកគេមិនអាចបន្តអនុញ្ញាតឲ្យរោងចក្រគេចពីការទទួលខុសត្រូវរបស់ខ្លួនអំពីអត្ថប្រយោជន៍សម្រាប់កម្មករទៅតាមច្បាប់នោះទេ»។
លោកបានថ្លែងថា៖ «ពួកគេគួរអនុវត្តច្បាប់ឲ្យមានប្រសិទ្ធភាព និងត្រួតពិនិត្យតាមដានរោងចក្រដែលបិទទ្វារ ក្ស័យធន និងធ្វើការស៊ើបអង្កេត»៕ PS
