ភ្នំពេញៈ ក្នុងរយៈពេល ៦ ខែដើមឆ្នាំនេះ សមត្ថកិច្ចបង្ក្រាបគ្រឿងញៀនបានចំនួន ៤ ១៧៥ ករណី ដែលមានការកើនឡើង ៩ ភាគរយ និងបានឃាត់ខ្លួនជនសង្ស័យ ៨ ៩១១ នាក់ គឺកើនឡើង ១៧ ភាគរយ ខណៈការរឹបអូសគ្រឿងញៀនបានចំនួន ៣៤១ គីឡូ កើនឡើង ១៣៥ ភាគរយ បើប្រៀបធៀបរយៈពេលដូចគ្នាកាលពីឆ្នាំមុន។ នេះបើតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនចេញផ្សាយកាលពីម្សិលមិញ។
របាយការណ៍ដដែលបានឲ្យដឹងថា សមត្ថកិច្ចបានបង្ក្រាបបទល្មើសគ្រឿងញៀនសរុបបានចំនួន ៤ ១៧៥ ករណី បើធៀបនឹងឆមាសទី១ កាលពីឆ្នាំ ២០១៨ មាន ៣ ៨៣៨ ករណី ដែលកើនឡើងចំនួន ៣៣៧ ករណី ស្មើនឹង ៩ ភាគរយ ក្នុងនោះ អំពើជួញដូរ រក្សាទុកគ្រឿងញៀនមានចំនួន ២ ៥៣១ ករណី ការប្រើប្រាស់គ្រឿងញៀនមានចំនួន ១ ៦២៤ ករណី ការដាំដុះមានចំនួន ១៩ ករណី និងការផលិតកែច្នៃមានចំនួន ១ ករណី ។
របាយការណ៍បានបន្តថា សមត្ថកិច្ចបានឃាត់ខ្លួនជនសង្ស័យសរុប មានចំនួន ៨ ៩១១ នាក់ បើធៀបនឹងឆមាសទី១ កាលពី ២០១៨ មានចំនួន ៧ ៥៨០ នាក់ កើនលើស ១ ៣០៤ នាក់ ស្មើនឹង ១៧ ភាគរយ ក្នុងនោះមានជនសង្ស័យក្នុងករណីជួញដូរ រក្សាទុកមានចំនួន ៤ ៧៩៥ នាក់ ជនសង្ស័យក្នុងករណីប្រើប្រាស់គ្រឿងញៀនមានចំនួន ៤ ១១២ នាក់ ជនសង្ស័យក្នុងករណឺដាំដុះមាន ៤ នាក់ ហើយចាប់រឹបអូសគ្រឿងញៀនបានចំនួន ៣៤១ គីឡូ បើធៀបកាលពីឆ្នាំ ២០១៨ ចាប់យកបានចំនួន ១៤៥ គីឡូ កើនឡើងទ្វេដងគឺ ១៩៦ គីឡូដែលស្មើនឹង ១៣៥ ភាគរយ។
របាយការណ៍បានបញ្ជាក់ថា៖ «តាមរយៈកិច្ចសហការផ្តល់ព័ត៌មានរហ័សឲ្យគ្នាទៅវិញទៅមកជាមួយប្រទេសជិតខាងនិងស្ថាប័នអន្តរជាតិបានល្អធ្វើឲ្យសមត្ថកិច្ចទប់ស្កាត់ និងបង្ក្រាបបទល្មើសបានច្រើនករណីធំៗ។ការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលបានជះឥទ្ធិពលជាវិជ្ជមានធ្វើឲ្យបទល្មើសទូទៅមានការថយចុះ ជាពិសេសបទល្មើសព្រហ្មទណ្ឌ»។
របាយការណ៍បានបន្តថា ការបើកកិច្ចប្រតិបត្តិការបង្ក្រាបបទល្មើសគ្រឿងញៀនជាទ្រង់ទ្រាយធំនៅតាមក្លិបកម្សាន្ត និងទីកន្លែងសប្បាយបានផ្តល់នូវបទពិសោធល្អៗក្នុងការបង្រួមទីផ្សារជួញដូរ និងប្រើប្រាស់គ្រឿងញៀននៅផ្ទៃក្នុងប្រទេស ហើយក៏ជាសក្ខីកម្មឆ្លុះបញ្ចាំងអំពីឆន្ទៈមុតស្រួចរបស់ កម្លាំងអនុវត្តច្បាប់ និងការគាំទ្រយ៉ាងពេញទំហឹងពីពលរដ្ឋ។
ថ្លែងនៅក្នុងកិច្ចប្រជុំពិនិត្យនិងពិភាក្សាលើសេចក្តីព្រាងរបាយការណ៍ស្តីពីលទ្ធផលត្រួតពិនិត្យគ្រឿងញៀនប្រចាំឆមាសទី១ និងលើកទិសដៅឆមាសទី២ ឆ្នាំ ២០១៩ នៅក្រសួងមហាផ្ទៃកាលពីម្សិលមិញ លោកឧបនាយករដ្ឋមន្ត្រី លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា ក្នុងរយៈពេល ៦ ខែ កន្លងមកនេះ អាជ្ញាធរបានអនុវត្តសកម្មភាពការងារ ដោយទទួលបានលទ្ធផលគួរជាទីមោទនៈ ក្នុងប្រយុទ្ធប្រឆាំងគ្រឿងញៀន។
លោកបានបញ្ជាក់ថា៖ «ការអនុវត្តប្រកបដោយការទទួលខុសត្រូវខ្ពស់នូវគោលនយោបាយភូមិ-ឃុំ មានសុវត្ថិភាពបានធ្វើឱ្យមានការថយចុះផងដែរនូវបញ្ហា ក៏ដូចជាបទល្មើសផ្សេងៗទៀតនៅតាមមូលដ្ឋាន ដោយរួមទាំងអំពើចោរកម្ម លួច ឆក់ប្លន់» ។
យ៉ាងណាក្ដី លោក កែ គឹមយ៉ាន បានបង្ហាញក្ដីបារម្ភថា ការប្រើប្រាស់គ្រឿងញៀនខុសច្បាប់នៅតែបន្តកើនឡើង ពិសេសកញ្ឆានៅតែបន្តមានដាំដុះផលិត និងប្រើប្រាស់ច្រើនជាងគេរួមទាំងការចរាចរ និងការប្រើប្រាស់សារធាតុញៀនប្រភេទថ្មីដែលប៉ះពាល់ប្រព័ន្ធសរសៃប្រសាទបាន និងកំពុងរីករាលដាលគួរឱ្យបារម្ភផងដែរ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថា នៅពេលការបង្ក្រាបគ្រឿងញៀនកើនឡើង វាបង្ហាញថាបញ្ហាគ្រឿងញៀនបាន និងកំពុងរីករាលដាលខ្លាំង ហើយវាក៏បង្ហាញថា ការបង្ក្រាបនៅមានកម្រិតផងដែរ។
លោកថា៖ «ការកើនឡើងបែបនេះវាបង្ហាញថា ការបង្ក្រាបនាពេលកន្លងមក នៅមិនទាន់ចំគោលដៅ ពិសេសអ្នកជួញដូរគ្រឿងញៀនធំ ដូច្នេះវាធ្វើឲ្យបទល្មើសនៅតែបន្តកើតឡើង និងរីករាលដាល ដូច្នេះសមត្ថកិច្ចត្រូវមានវិធីក្នុងការបង្ក្រាបអ្នកជួញដូរគ្រឿងញៀនធំៗ»។
កាលពីថ្ងៃទី ១៧ ខែ កក្កដា ឆ្នាំ ២០១៩ ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនិងជាប្រធានយុទ្ធនាការប្រយុទ្ធប្រឆាំងគ្រឿងញៀន បានបញ្ជាឲ្យសមត្ថកិច្ចពាក់ព័ន្ធទាំងអស់មិនត្រូវបន្ធូរដៃចំពោះការងារប្រយុទ្ធប្រឆាំងគ្រឿងញៀននោះទេ គឺត្រូវតែប្រឹងប្រែងយកចិត្តទុកដាក់ប្រយុទ្ធប្រឆាំងឲ្យបានខ្លាំងក្លាឡើងបន្ថែមទៀត។
លោកបានបញ្ជាក់ថា៖ «ជាទូទៅប្រជាពលរដ្ឋលោកកំពុងតែអបអរសាទរសប្បាយរីករាយចំពោះលទ្ធផលនៃការប្រយុទ្ធប្រឆាំងគ្រឿងញៀនរបស់យើង អ៊ីចឹងយើងមិនអាចបន្ធូរបានទេ។ ជាពិសេសត្រូវអនុវត្តឱ្យខាងតែបាននូវការប្តេជ្ញាចិត្តរបស់យើង គឺការបោសសម្អាត ការប្រើប្រាស់ ការចែកចាយ នៅតាមក្លិបកម្សាន្តនានា នៅចុងឆ្នាំ ២០១៩ នេះ»៕