ភ្នំពេញៈ មន្ត្រីក្រសួងមហាផ្ទៃ និងតំណាងអង្គការក្រៅរដ្ឋាភិបាលមួយចំនួនបានជួបប្រជុំគ្នាកាលពីម្សិលមិញពិភាក្សាគ្នាលើក្ដីកង្វល់សុំធ្វើវិសោធនកម្មមាត្រាមួយចំនួននៃច្បាប់ស្ដីពីសមាគម និងអង្គការមិនមែនរដ្ឋាភិបាលដែលបានអះអាងថា ច្បាប់នេះប៉ះពាល់ដល់សិទ្ធិ និងលទ្ធិប្រជាធិបតេយ្យដែលពួកគេកំពុងធ្វើសកម្មភាពការងារនានា។
លោក ប៊ុន ហុន រដ្ឋលេខាធិការក្រសួងមហាផ្ទៃបានឲ្យដឹងថា កិច្ចពិភាក្សាពិគ្រោះយោបល់ដែលបានធ្វើឡើងកាលពីម្សិលមិញដោយហេតុអង្គការសង្គមស៊ីវិលមួយចំនួននៅក្នុងប្រទេសកម្ពុជាស្នើធ្វើវិសោធនកម្មមាត្រាមួយចំនួននៃច្បាប់។
លោក ប៊ុន ហុន ថ្លែងថា៖ «យើងអញ្ជើញតំណាងអង្គការសង្គមស៊ីវិល (មកពិភាក្សា) គឺយើងចង់ដឹងឲ្យច្បាស់ថា តើសំណើរបស់គាត់ដែលបានលើកឡើងទាំង ១៧ មាត្រានោះ គាត់មានមូលដ្ឋានស្នើកែរបៀបម៉េចខ្លះ ពីព្រោះថា សំណើដែលយើងទទួលក៏មានចំណុចខ្លះក៏យើងមិនយល់ដែរ ដូច្នេះហើយបានជាយើងស្នើឲ្យគាត់មកជួបផ្ទាល់គ្នា ដើម្បីឲ្យគាត់ពន្យល់ថាគាត់ចង់បានរបៀបម៉េច ហើយកែសម្រួលយ៉ាងម៉េចវិញ ហើយការអនុវត្តកន្លងមកមានការលំបាកយ៉ាងម៉េចខ្លះ»។
លោកបានបញ្ជាក់ថា៖ «គាត់ (ក្រុមអង្គការក្រៅរដ្ឋាភិបាល) នៅមិនទាន់ច្បាស់នូវខ្លឹមសារដែលគាត់ចង់កែនៅឡើយទេ។ អង្គការគាត់មិនទាន់បានឯកភាពគ្នា ហើយគាត់មិនទាន់ឲ្យខ្លឹមសារថា តើត្រូវកែរបៀបម៉េចដូច្នេះ កិច្ចប្រជុំព្រឹក (ម្សិលមិញ) យើងស្នើឲ្យគាត់ពិនិត្យពិចារណាផ្ទៃក្នុងឡើងវិញ ដើម្បីបានជាខ្លឹមសាររួមមួយសម្រាប់ឲ្យយើងខ្ញុំពិនិត្យពិចារណា និងធ្វើរបាយការណ៍ជូនរាជរដ្ឋាភិបាលពិនិត្យ និងសម្រេច»។
លោក ប៊ុន ហុន ក៏បានឲ្យដឹងផងដែរថាក្នុងកិច្ចប្រជុំកាលពីថ្ងៃចន្ទនោះភាគីទាំង ២ បានពិភាក្សា និងជជែកគ្នាបាន ៤ មាត្រាដែលមាត្រាទាំងនោះផ្តោតទៅលើវិសាលភាព និងនិយមន័យនៃច្បាប់អព្យាក្រឹតភាព និងការធ្វើរបាយការណ៍សកម្មភាព និងហិរញ្ញវត្ថុ។
លោកថ្លែងថា៖ «កិច្ចប្រជុំនោះពុំទាន់បានទទួលចេញជាលទ្ធផលនៅឡើយទេ»។
លោក យឿង សុធារ៉ា ប្រធានផ្នែកកសាងបណ្តាញភាពជាដៃគូ និងការតស៊ូមតិនៃគណៈកម្មាធិការសហប្រតិបត្តិការដើម្បីកម្ពុជា បានឲ្យដឹងថានៅក្នុងកិច្ចពិភាក្សានោះពិតជាមានការខ្វែងគំនិតគ្នារវាងអង្គការសង្គមស៊ីវិលមួយចំនួនពាក់ព័ន្ធទៅលើពាក្យពេចន៍នឹងខ្លឹមសារនៃមាត្រាដែលពួកគេបានស្នើសុំវិសោធនកម្មហើយពួកគេនឹងធ្វើតាមការស្នើសុំរបស់ក្រសួងមហាផ្ទៃដែលឲ្យអង្គការសង្គមស៊ីវិលធ្វើការពិគ្រោះយោបល់ និងឯកភាពគ្នាផ្ទៃក្នុងទៅលើខ្លឹមសារ និងសំណើមុនពេលមកជជែកគ្នាជាមួយក្រសួងមហាផ្ទៃជាថ្មីម្តងទៀត។
លោក សុធារ៉ា ថ្លែងថា៖ «មានមាត្រាខ្លះ មានការយល់ខុសគ្នា យើងមិនទាន់បានខ្លឹមសារច្បាស់លាស់ និងមិនទាន់បានផ្លែផ្កាអីច្បាស់លាស់ទេ ដូច្នេះការជជែកលើកទៅពេលក្រោយទៀតគឺក្រោយបុណ្យអុំទូក»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថា អង្គការសង្គមស៊ីវិលមួយចំនួនបានប្រឈមមុខការរឹតត្បិតសិទិ្ធសេរីភាព និងបានធ្វើឲ្យប៉ះពាល់ដល់សកម្មភាពរបស់ពួកគេ។
លោក ប៊ុន ហុន បានអះអាងថាចាប់តាំងពីច្បាប់នេះត្រូវបានដាក់ឲ្យប្រើប្រាស់នៅឆ្នាំ ២០១៥ មករាជរដ្ឋាភិបាលបានបង្កលក្ខណៈងាយស្រួលដល់អង្គការសង្គមស៊ីវិលទាំងជាតិ និងអន្តរជាតិដែលបានចុះបញ្ជីត្រឹមត្រូវនៅក្រសួងមហាផ្ទៃ គឺជាដៃគូដ៏ល្អរបស់រាជរដ្ឋាភិបាលក្នុងការចូលរួមអភិវឌ្ឍសង្គម ហើយរាជរដ្ឋាភិបាលមិនដែលបង្កបញ្ហាលំបាកទៅដល់អង្គការសង្គមស៊ីវិលដូចការចោទប្រកាន់នោះទេ។
យោងតាមរបាយការណ៍របស់អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃបានឲ្យដឹងថា គិតត្រឹមដំណាច់ឆ្នាំ ២០១៨ មានសមាគម និងអង្គការមិនមែនរដ្ឋាភិបាលក្នុងស្រុកបានតម្កល់សំណុំឯកសារ និងចុះបញ្ជីនៅក្រសួងមហាផ្ទៃមានចំនួនសរុប ៥ ៥២៣ ដែលក្នុងនោះសមាគមមានចំនួន ២ ២៩៧ សមាគម ហើយសមាគម និងអង្គការមិនមែនរដ្ឋាភិបាលប្រមាណជាង ២ ០០០ ស្ថាប័នប៉ុណ្ណោះ ដែលបានធ្វើសកម្មភាពនៅក្នុងព្រះរាជាណាចក្រកម្ពុជា៕